ஜிஎஸ்டி வரி விகிதங்கள் சீரமைக்கப்பட்டதைத் தொடர்ந்து, அடுத்த கட்ட முக்கியச் சீர்திருத்தங்களை மேற்கொள்ள மத்திய அரசு ஆயத்தமாகி வருகிறது. இதில் ஜிஎஸ்டி அதிகாரிகளிடம் உள்ள நேரடிக் கைது அதிகாரங்களைப் பறித்து, நீதிமன்றத்தின் உத்தரவுக்குப் பிறகே கைது நடவடிக்கைகளை மேற்கொள்ளும் வகையில் சட்டத்தில் முக்கிய மாற்றங்களைக் கொண்டுவர ஜிஎஸ்டி கவுன்சில் திட்டமிட்டுள்ளது.
அக்டோபர் 7 அன்று நடைபெறவுள்ள ஜிஎஸ்டி கவுன்சிலின் உயர்மட்டக் கூட்டத்தில், இந்த வரலாற்றுச் சிறப்புமிக்க முன்மொழிவு குறித்து ஆலோசிக்கப்பட உள்ளதாகத் தகவல்கள் தெரிவிக்கின்றன.
மத்திய ஜிஎஸ்டி சட்டத்தின் பிரிவு 69-ன் படி, வரி ஏய்ப்பு அல்லது குறிப்பிட்ட தவறுகள் இழைக்கப்பட்டதாகக் கருதினால், ஆணையரின் அனுமதியுடன் அதிகாரிகளே நேரடியாகக் கைது நடவடிக்கை எடுக்க இதுவரை அதிகாரம் இருந்தது.
தற்போது கொண்டுவரப்பட உள்ள புதிய மாற்றத்தின்படி, அதிகாரிகளின் இந்த நேரடிக் கைது அதிகாரம் முற்றிலுமாக நீக்கப்படும். இனி எந்தவொரு கைதாக இருந்தாலும், அதற்கு உரிய நீதிமன்றத்தின் முன்அனுமதி பெறுவது கட்டாயமாக்கப்படும்.
அத்துடன், ஜிஎஸ்டி தொடர்பான குற்றவியல் வழக்குகளைத் தொடங்குவதற்கான குறைந்தபட்ச நிதி வரம்பை ரூ. 5 கோடியாக உயர்த்தவும் ஆலோசிக்கப்பட்டு வருகிறது.
சரக்கு வகைப்பாடு, மதிப்பு கணக்கீடு அல்லது உள்ளீட்டு வரி வரவு போன்றவற்றில் அரசுக்கும் வர்த்தகர்களுக்கும் இடையே ஏற்படும் சாதாரணக் கருத்து வேறுபாடுகள் மற்றும் தகராறுகளுக்குக் குற்றவியல் சட்டப் பிரிவுகள் இனி பயன்படுத்தப்பட மாட்டாது என்றும் தெரிவிக்கப்பட்டுள்ளது.
அதேவேளையில், கைது அதிகாரம் நீக்கப்பட்டாலும், அரசுக்குச் சேர வேண்டிய வரிகளை வசூலிப்பதிலோ அல்லது அபராதம் விதிப்பதிலோ எந்தத் தளர்த்தலும் இருக்காது என அதிகாரிகள் தெளிவுபடுத்தியுள்ளனர்.
வரி ஏய்ப்பு செய்தவர்களிடமிருந்து வரி, வட்டி மற்றும் அபராதத்தை வசூலிக்கும் சட்டப்பூர்வ நடவடிக்கைகள் வழக்கம்போல் தொடரும். தவறை ஒப்புக்கொண்டு உரிய அபராதத்தைச் செலுத்துவதன் மூலம் வழக்குகளை முடிவுக்குக் கொண்டுவரும் முறையும் நடைமுறையில் இருக்கும்.
கடந்த செப்டம்பர் 2025-இல் நடைமுறைப்படுத்தப்பட்ட வரி விகிதச் சீரமைப்பில் ஜிஎஸ்டி முறையானது 5% மற்றும் 18% என எளிமையாக்கப்பட்டதைத் தொடர்ந்து, தற்போது நிர்வாகத்தை எளிதாக்குதல் மற்றும் தொழில்களுக்கான சிரமங்களைக் குறைப்பதே அரசின் முதன்மை இலக்காக உள்ளது.
எளிமையான ஜிஎஸ்டி பதிவு நடைமுறைகள், வேகமான ரீஃபண்ட் வழங்கும் முறைகள் மற்றும் அபராத நடைமுறைகளில் மாற்றங்கள் கொண்டுவருவதும் இந்தச் சீர்திருத்தப் பேக்கேஜின் ஒரு பகுதியாகும்.
