ஸ்கூட்டர் வாங்கும்போது விலை மட்டும் முக்கியமல்ல. தினசரி எவ்வளவு தூரம் பயணம் செய்கிறோம், பெட்ரோல் செலவு எவ்வளவு, வாகனத்தை எளிதாக கையாள முடியுமா, அதில் தேவையான நவீன வசதிகள் உள்ளனவா என்பதையும் கவனிக்க வேண்டும். அந்த வகையில், ரூ.1 லட்சத்திற்குள் பட்ஜெட்டை வைத்திருப்பவர்களுக்கு பல்வேறு தேவைகளுக்கு ஏற்ற சில பிரபலமான மாடல்கள் சந்தையில் உள்ளன.
மைலேஜ் முக்கியம் என்றால் யமஹா ஃபாசினோ 125
பெட்ரோல் செலவை குறைக்க விரும்புபவர்களுக்கு ஃபாசினோ 125 கவனம் செலுத்தக்கூடிய மாடலாக உள்ளது. 125cc இன்ஜினுடன் ஹைப்ரிட் தொழில்நுட்பம் இடம்பெற்றுள்ள இந்த ஸ்கூட்டர் சுமார் 99 கிலோ எடை கொண்டது. இதனால் நகர்ப்புற போக்குவரத்தில் கையாள்வது எளிதாக இருக்கும். லிட்டருக்கு சுமார் 65 கி.மீ. வரை மைலேஜ் கிடைக்கும் என குறிப்பிடப்படுகிறது. ஆன்-ரோடு விலை சுமார் ரூ.92,500.
ஸ்மார்ட் அம்சங்கள் வேண்டும் என்றால் டிவிஎஸ் என்டார்க் 125
இளைஞர்களை கவரும் ஸ்போர்ட்டியான தோற்றத்துடன் வரும் என்டார்க் 125, செயல்பாடு மற்றும் தொழில்நுட்ப வசதிகளை இணைக்கிறது. 124.8cc, 3-வால்வு இன்ஜின் கொண்ட இதில் புளூடூத் இணைப்பு, நேவிகேஷன் உள்ளிட்ட வசதிகள் உள்ளன. இதன் அதிகபட்ச வேகம் மணிக்கு 95 கி.மீ. வரை செல்லும். மைலேஜ் சுமார் 40 முதல் 50 கி.மீ. வரை கிடைக்கலாம். ஆரம்ப எக்ஸ்-ஷோரூம் விலை ரூ.96,600.
குறைந்த விலையில் எளிய பயன்பாடு வேண்டுமா? ஹீரோ பிளெஷர் பிளஸ்
குறைந்த பட்ஜெட்டில் ஸ்டைலான ஸ்கூட்டரை தேடுபவர்களுக்கு பிளெஷர் பிளஸ் பொருத்தமான தேர்வாக இருக்கிறது. குறைந்த எடை காரணமாக கையாள்வதும் எளிது. புளூடூத் இணைப்பு, கால் மற்றும் SMS அலர்ட்கள், LED ஹெட்லேம்ப், மொபைல் சார்ஜிங் போர்ட் போன்ற வசதிகளும் உள்ளன. மைலேஜ் சுமார் 50 முதல் 55 கி.மீ. வரை கிடைக்கும் எனக் கூறப்படுகிறது. ஆன்-ரோடு விலை சுமார் ரூ.82,000 முதல் ரூ.87,000 வரை உள்ளது.
நீண்ட பயணங்களுக்கும் அதிக ஸ்டோரேஜுக்கும் சுஸுகி அவெனிஸ்
நகருக்குள் மட்டுமின்றி சற்று நீண்ட தூரப் பயணங்களுக்கும் பயன்படுத்தக்கூடிய ஸ்கூட்டரை விரும்புபவர்கள் அவெனிஸை பரிசீலிக்கலாம். மேக்சி-ஸ்கூட்டர் போன்ற தோற்றத்துடன், நீண்ட நேரம் அமர்வதற்கு வசதியான இருக்கை அமைப்பும் இதில் உள்ளது. ஹெல்மெட் உள்ளிட்ட பொருட்களை வைக்க பெரிய அண்டர்-சீட் ஸ்டோரேஜ் வழங்கப்பட்டுள்ளது. புளூடூத் வசதியுடன் கூடிய டிஜிட்டல் இன்ஸ்ட்ரூமென்ட் கிளஸ்டரும் உள்ளது. சுமார் 45 முதல் 50 கி.மீ. வரை மைலேஜ் கிடைக்கும் நிலையில், ஆரம்ப எக்ஸ்-ஷோரூம் விலை ரூ.95,000 முதல் தொடங்குகிறது.
நம்பகமான தினசரி பயன்பாட்டுக்கு ஹோண்டா ஆக்டிவா 6G
தினசரி அலுவலகப் பயணம், குடும்ப பயன்பாடு என பல்வேறு தேவைகளுக்கு நீண்ட காலமாக பயன்படுத்தப்பட்டு வரும் மாடல் ஆக்டிவா 6G. உயர்நிலை வேரியண்டில் ஸ்மார்ட் கீ வசதி உள்ளது. முன்பக்க டெலஸ்கோபிக் சஸ்பென்ஷன் காரணமாக சீரற்ற சாலைகளிலும் பயணத்தை சற்று வசதியாக்குகிறது. சுமார் 55 கி.மீ. வரை மைலேஜ் கிடைக்கும் என குறிப்பிடப்படும் இதன் ஸ்டாண்டர்டு வேரியண்டின் ஆரம்ப எக்ஸ்-ஷோரூம் விலை ரூ.79,378.
ஒரே பட்ஜெட்டில் இருந்தாலும் இந்த 5 ஸ்கூட்டர்களும் வெவ்வேறு தேவைகளை மையமாகக் கொண்டுள்ளன. அதிக மைலேஜ், குறைந்த எடை, ஸ்மார்ட் வசதிகள், அதிக ஸ்டோரேஜ் அல்லது தினசரி பயன்பாடு என உங்கள் முன்னுரிமைக்கு ஏற்ப தேர்வு செய்வது சிறந்தது. விலை மற்றும் வேரியண்ட் வசதிகள் காலத்துக்கு ஏற்ப மாறக்கூடும் என்பதால், வாங்குவதற்கு முன்பு அருகிலுள்ள டீலரிடம் தற்போதைய விலையை உறுதி செய்வது அவசியம்.
Also Read: ரூ.1 இருந்தால் போதும்.. 24 நாட்களுக்கு தினமும் 1GB டேட்டா; BSNL-ன் சூப்பர் ஆஃபர்!
