தம்பதிகளுக்குள் கருத்து வேறுபாடுகள் ஏற்படுவது இயல்பானதுதான். ஆனால், ஒரு முக்கியமான விஷயத்தைப் பேசத் தொடங்கும் விதம், அந்த உரையாடல் சுமுகமாக முடியுமா அல்லது வாக்குவாதமாக மாறுமா என்பதைத் தீர்மானிக்கிறது. கோபமான குரலில் பேசுவது, குற்றம் சாட்டும் வார்த்தைகளைப் பயன்படுத்துவது போன்றவை பிரச்சினையைத் தீர்ப்பதற்குப் பதிலாக இருவருக்கும் இடையிலான மனக்கசப்பை அதிகரிக்கலாம்.
கருத்து வேறுபாடுகளைத் தவிர்ப்பது மட்டுமே ஆரோக்கியமான உறவுக்கு அடையாளம் அல்ல. ஒருவருக்கொருவர் மனதில் இருப்பதைப் புரிந்துகொண்டு, பிரச்சினைகளை நிதானமாகப் பேசி தீர்வு காண்பதுதான் முக்கியம். குறிப்பாக, துணையிடம் முக்கியமான விஷயங்களைப் பேசும்போது சில அணுகுமுறைகளைப் பின்பற்றுவது தேவையற்ற சண்டைகளைத் தவிர்க்க உதவும்.
இருவரில் ஒருவர் சோர்வாக இருக்கும்போதோ, அவசரத்தில் இருக்கும்போதோ அல்லது ஏற்கெனவே கோபத்தில் இருக்கும்போதோ முக்கியமான விஷயங்களைப் பேசுவது நல்ல முடிவைத் தராமல் போகலாம். எனவே, இருவரும் நிதானமாக இருக்கும் நேரத்தைத் தேர்ந்தெடுத்துப் பேசுவது அவசியம். உரையாடலின்போது கோபம் அதிகரித்தால், சிறிது நேரம் இடைவெளி எடுத்துக்கொண்டு பின்னர் பேசலாம். இது தேவையற்ற வாக்குவாதம் ஏற்படுவதைத் தடுக்க உதவும்.
ஒரு பிரச்சினையைப் பற்றிப் பேசும்போது, துணையின் குணத்தை விமர்சிப்பது நிலைமையை மேலும் சிக்கலாக்கலாம். உதாரணமாக, ‘நீ எப்போதுமே பொறுப்பில்லாமல் நடந்துகொள்கிறாய்’ என்று கூறுவதற்குப் பதிலாக, குறிப்பிட்ட ஒரு செயலால் தங்களுக்கு ஏற்பட்ட வருத்தத்தை விளக்கலாம். ‘நீங்கள் இப்படிச் செய்தபோது எனக்கு வருத்தமாக இருந்தது’ என்று தங்களுடைய உணர்வுகளை வெளிப்படுத்துவது, மற்றவரைக் குற்றம் சாட்டாமல் பிரச்சினையைப் புரியவைக்க உதவும்.
அதேபோல், உரையாடும்போது துணையின் கருத்தையும் முழுமையாகக் கேட்க வேண்டும். அவர் பேசும்போது இடைமறிப்பது அல்லது உடனடியாக எதிர்வாதம் செய்வது பிரச்சினையை அதிகரிக்கலாம். அவருடைய கருத்துடன் உடன்படவில்லை என்றாலும், அவர் ஏன் அப்படிச் சிந்திக்கிறார் என்பதைப் புரிந்துகொள்ள முயற்சி செய்ய வேண்டும். ஏதேனும் ஒரு விஷயம் தெளிவாகப் புரியவில்லை என்றால், தவறாக ஊகிப்பதற்குப் பதிலாகக் கேள்விகளைக் கேட்டு விளக்கம் பெறலாம்.
சரியான கருத்தைக்கூடக் கோபமாகவோ, கிண்டலாகவோ அல்லது தொடர்ந்து குற்றம் சாட்டியோ பேசினால், அதை மற்றவர் ஏற்றுக்கொள்வது கடினமாகிவிடும். எனவே, பேசும்போது குரலை உயர்த்துவதைத் தவிர்ப்பதுடன், சம்பந்தமில்லாத பழைய பிரச்சினைகளையும் ஒரே உரையாடலில் கொண்டுவராமல் இருப்பது நல்லது. பேச்சு வாக்குவாதமாக மாறத் தொடங்கினால், தொடர்ந்து வாதிடுவதற்குப் பதிலாகச் சிறிது நேரம் அமைதியாக இருந்து, மனநிலை சீரான பிறகு மீண்டும் பேசலாம்.
தம்பதிகளுக்கு இடையிலான உரையாடலின் நோக்கம் ஒவ்வொரு விவாதத்திலும் வெற்றி பெறுவது அல்ல; இருவருக்கும் இடையிலான பிரச்சினையைப் புரிந்துகொண்டு தீர்வு காண்பதுதான். திறந்த மனதுடன் பேசுவது, பொறுமையாகக் கேட்பது, ஒருவருக்கொருவர் உணர்வுகளுக்கு மதிப்பளிப்பது ஆகியவை உறவில் புரிதலை மேம்படுத்தவும், தேவையற்ற மனக்கசப்புகளைக் குறைக்கவும் உதவும்.
Also Read: ஃப்ரிட்ஜில் தயிரை எத்தனை நாட்கள் வைக்கலாம்? எப்போது விஷமாக மாறும்? இல்லத்தரசிகளே உஷார்!
