பிறந்தநாளைக் கொண்டாடிய அடுத்த சில மணி நேரங்களிலேயே 7 வயது சிறுமி காணாமல் போன சம்பவம் செஞ்சி பகுதியில் பெரும் கவலையை ஏற்படுத்தியுள்ளது. பெற்றோருடன் வீட்டில் தூங்கிக்கொண்டிருந்த சிறுமி அதிகாலையில் மாயமான நிலையில், ஐந்து நாட்களாகியும் அவரைப் பற்றிய எந்தத் தடயமும் கிடைக்கவில்லை. நூற்றுக்கும் மேற்பட்ட போலீசார் களமிறங்கித் தேடி வரும் நிலையில், சிறுமிக்கு என்ன நடந்தது என்ற கேள்வி அப்பகுதி மக்களிடையே எழுந்துள்ளது.
விழுப்புரம் மாவட்டம், செஞ்சி அருகே ஆலம்பூண்டி ஊராட்சிக்கு உட்பட்ட கிராமத்தில் இந்தச் சம்பவம் நடந்துள்ளது. அங்கு வசிக்கும் 7 வயது சிறுமி கடந்த 11-ஆம் தேதி தனது பிறந்தநாளை குடும்பத்தினர் மற்றும் நண்பர்களுடன் கொண்டாடியுள்ளார். இரவு பெற்றோருடன் வீட்டில் உறங்கிய சிறுமி, மறுநாள் அதிகாலையில் காணாமல் போனது குடும்பத்தினருக்குப் பெரும் அதிர்ச்சியை ஏற்படுத்தியது.
சிறுமியைப் பல இடங்களில் தேடியும் கண்டுபிடிக்க முடியாததால், பெற்றோர் காவல்துறையில் புகார் அளித்தனர். இதையடுத்து வழக்குப் பதிவு செய்த போலீசார், சிறுமி மாயமானதற்கான காரணத்தைக் கண்டறிய விசாரணையைத் தொடங்கினர். தொடக்கத்தில் கிடைத்த தகவல்களின் அடிப்படையில் தேடுதல் பணி நடைபெற்றாலும், அடுத்தடுத்த நாட்களில் சிறுமி குறித்த எந்தத் தகவலும் கிடைக்கவில்லை.
இதனால் தேடுதல் பணியை முடுக்கிவிட்ட விழுப்புரம் மாவட்ட காவல் கண்காணிப்பாளர் மதிவாணன், நான்கு டி.எஸ்.பி.க்கள் தலைமையில் எட்டு தனிப்படைகளை அமைத்தார். 100-க்கும் மேற்பட்ட போலீசார் இந்தப் பணியில் ஈடுபட்டுள்ளனர். சிறுமி மாயமான 11-ஆம் தேதி இரவு 11 மணி முதல் 12-ஆம் தேதி அதிகாலை 3 மணி வரையிலான நேரத்தில், அப்பகுதி செல்போன் கோபுரங்களில் பதிவான 500-க்கும் மேற்பட்ட அழைப்புகளையும் போலீசார் ஆய்வு செய்துள்ளனர்.
தேடுதல் பணி கிராமத்தைச் சுற்றியுள்ள பகுதிகளுக்கும் விரிவுபடுத்தப்பட்டுள்ளது. கோட்டக்குப்பம் பகுதி மீனவர்களின் உதவியுடன், அப்பகுதியில் உள்ள கிணறுகள் உள்ளிட்ட நீர்நிலைகளிலும் சிறுமியைத் தேடும் பணி நடைபெற்றது. இருப்பினும், ஐந்து நாட்கள் கடந்தும் விசாரணையில் குறிப்பிடத்தக்க முன்னேற்றம் ஏற்படாதது போலீசாருக்குச் சவாலாக உள்ளது.
சிறுமி வீட்டிலிருந்து எவ்வாறு வெளியேறினார், அவர் மாயமான நேரத்தில் என்ன நடந்தது, அவரைக் கண்டுபிடிக்க உதவும் தடயங்கள் ஏதேனும் உள்ளனவா எனப் பல்வேறு கோணங்களில் விசாரணை தொடர்ந்து நடைபெற்று வருகிறது. பிறந்தநாளன்று மகிழ்ச்சியாக இருந்த சிறுமி மறுநாளே காணாமல் போன சம்பவம், அவரது குடும்பத்தினரையும் கிராம மக்களையும் ஆழ்ந்த கவலையில் ஆழ்த்தியுள்ளது.
Also Read: தூங்கியும் சோர்வு குறையவில்லையா? பெண்கள் அலட்சியம் செய்யக்கூடாத அறிகுறிகள்!
