வேலூர் மாவட்டம் குடியாத்தத்தில், பேசுவதை நிறுத்திய நபரிடம் விளக்கம் கேட்கச் சென்ற நான்கு பெண்கள், ஏற்பட்ட மோதலில் அவரைத் தாக்கியதில் அவர் உயிரிழந்த சம்பவம் பரபரப்பை ஏற்படுத்தியுள்ளது. ஐந்து ஆண்டுகளாக நீடித்த பழக்கத்தில் ஏற்பட்ட விரிசல், இறுதியில் கொலை வழக்காக மாறியிருக்கிறது.
குடியாத்தம் கொண்டசமுத்திரம் அம்பேத்கர் நகரைச் சேர்ந்த கதிரவன் (40), காட்பாடியில் உள்ள தனியார் டிராக்டர் ஷோரூமில் வேலை செய்து வந்தார். வழக்கறிஞர் படிப்பையும் முடித்திருந்த அவர், திருமணம் செய்துகொள்ளாமல் வசித்து வந்தார். இவருக்கும் குடியாத்தம் அருணாச்சல நகரில் வசிக்கும் நட்சத்திரா (36) என்பவருக்கும் ஐந்து ஆண்டுகளுக்கு முன்பு அறிமுகம் ஏற்பட்டது. கணவரைப் பிரிந்து தனது மகனுடன் தனியாக வசித்து வந்த நட்சத்திராவுடன் கதிரவன் நெருங்கிப் பழகி வந்துள்ளார்.
இருவருக்கும் இடையிலான உறவில் கடந்த சில மாதங்களாகச் சிக்கல் ஏற்பட்டது. நட்சத்திராவிடம் பேசுவதைக் கதிரவன் தவிர்த்து வந்ததால், அவரைத் தொடர்புகொள்ள நட்சத்திரா பலமுறை முயன்றுள்ளார். ஆனால், அவர் பேச மறுத்ததால் ஏற்பட்ட அதிருப்தியைத் தனது அக்கா அமுதாவிடம் (55) பகிர்ந்துகொண்டார்.
இதையடுத்து, நட்சத்திராவும் அமுதாவும் நேரில் சென்று கதிரவனிடம் விளக்கம் கேட்கத் தீர்மானித்தனர். அமுதாவின் மகள்களான பிரபாவதி (34), லட்சுமி (32) ஆகியோரையும் அழைத்துக்கொண்டு, சம்பவத்தன்று இரவு சுமார் 9 மணிக்கு கதிரவனின் வீட்டுக்குச் சென்றனர்.
அங்கு நட்சத்திராவுடன் ஏன் பேசுவதை நிறுத்தினார் என்று கேள்வி எழுப்பியபோது இருதரப்புக்கும் இடையே வாக்குவாதம் ஏற்பட்டது. சிறிது நேரத்தில் தகராறு முற்றிய நிலையில், நான்கு பெண்களும் கதிரவனைத் தாக்கியதாகக் கூறப்படுகிறது. தாக்குதலில் அவர் கீழே விழுந்து மயக்கமடைந்தார்.
சத்தம் கேட்டு வந்த அக்கம்பக்கத்தினர் கதிரவனை மீட்டு குடியாத்தம் அரசு மருத்துவமனைக்குக் கொண்டு சென்றனர். ஆனால், அவரைப் பரிசோதித்த மருத்துவர்கள் அவர் ஏற்கெனவே உயிரிழந்துவிட்டதாகத் தெரிவித்தனர். இதையடுத்து, போலீசார் வழக்குப் பதிவு செய்து விசாரணையைத் தொடங்கினர்.
நட்சத்திரா, அமுதா, பிரபாவதி, லட்சுமி ஆகிய நான்கு பேரையும் போலீசார் கைது செய்துள்ளனர். கதிரவனுக்கும் நட்சத்திராவுக்கும் இடையே ஏற்பட்ட பிரச்சினை, அதைத் தொடர்ந்து நடந்த மோதல் ஆகியவை குறித்து விசாரணை தொடர்ந்து நடைபெற்று வருகிறது. ஒருவருடன் பேசுவதை நிறுத்திய விவகாரம், நேரடி மோதலாக மாறி உயிரிழப்பில் முடிந்த சம்பவம் குடியாத்தம் பகுதியில் அதிர்ச்சியை ஏற்படுத்தியுள்ளது.
Also Read: பெற்றோருடன் தூங்கிய 7 வயது சிறுமி திடீர் மாயம்! 5 நாட்களாகியும் கிடைக்காத தடயம்! 100 போலீசார் தீவிர தேடுதல்!
