இந்தியாவில் சாலை விபத்துகளைக் குறைக்கும் நோக்கில், கார்களில் மேம்பட்ட பாதுகாப்புத் தொழில்நுட்பங்களை அறிமுகப்படுத்த மத்திய அரசு திட்டமிட்டுள்ளது. இதன் ஒரு பகுதியாக, புதிய கார் மாடல்களில் தானியங்கி அவசரகால பிரேக்கிங் அமைப்பைக் கட்டாயமாக்குவதற்கான நடவடிக்கைகள் மேற்கொள்ளப்பட்டுள்ளன. இதற்கான நடைமுறை 2030 அக்டோபர் முதல் அமலுக்கு வரத் திட்டமிடப்பட்டுள்ளதாகத் தகவல்கள் தெரிவிக்கின்றன.
திட்டத்தின்படி, 2030 அக்டோபர் முதல் அறிமுகமாகும் புதிய கார் மாடல்களில் மேம்பட்ட அவசரகால பிரேக்கிங் சிஸ்டம் (AEBS) பொருத்தப்பட வேண்டும். ஏற்கெனவே உற்பத்தியில் உள்ள கார் மாடல்களுக்கு இந்த விதிமுறையை அமல்படுத்த 2032 அக்டோபர் வரை கால அவகாசம் வழங்கப்பட உள்ளது. இதுதொடர்பான காலக்கெடு மற்றும் பாதுகாப்பு விதிகள் அடங்கிய வரைவு அறிவிப்பு விரைவில் வெளியாகும் என எதிர்பார்க்கப்படுகிறது.
கார்களைத் தொடர்ந்து, வர்த்தக வாகனங்களின் பாதுகாப்பிலும் கூடுதல் கவனம் செலுத்தப்படுகிறது. ஓட்டுநருக்குத் தெரியாத வாகனப் பகுதிகளில் உள்ள ஆபத்துகளை உணர்த்தும் அமைப்பு, ஓட்டுநரின் தூக்கக் கலக்கத்தைக் கண்டறிந்து எச்சரிக்கும் தொழில்நுட்பம், வாகனம் செல்லும் பாதையிலிருந்து விலகும்போது எச்சரிக்கும் வசதி உள்ளிட்ட பாதுகாப்பு அம்சங்களையும் கட்டாயமாக்கும் திட்டம் இடம்பெற்றுள்ளது.
ஏடிஏஎஸ், ஏஇபிஎஸ் தொழில்நுட்பங்கள் என்றால் என்ன?
மேம்பட்ட ஓட்டுநர் உதவி அமைப்புகள் (ADAS) என்பது வாகனத்தைச் சுற்றியுள்ள சூழலைக் கண்காணித்து, ஆபத்துகளை முன்கூட்டியே கண்டறிந்து ஓட்டுநருக்கு எச்சரிக்கை வழங்கும் தொழில்நுட்பங்களின் தொகுப்பாகும். சில சூழல்களில், வாகனத்தின் பிரேக் அல்லது ஸ்டீயரிங் செயல்பாட்டையும் இந்த அமைப்புகள் தானாகக் கட்டுப்படுத்த உதவும். தற்போது சில உயர்தரக் கார் மாடல்களில் இத்தகைய வசதிகள் உள்ளன.
அதேபோல், மேம்பட்ட அவசரகால பிரேக்கிங் அமைப்பு (AEBS), முன்னால் செல்லும் வாகனம் அல்லது சாலையில் உள்ள தடையுடன் மோதும் அபாயத்தைக் கண்டறியும். ஓட்டுநர் உரிய நேரத்தில் பிரேக் போடத் தவறினால், மோதலைத் தவிர்க்க அல்லது அதன் பாதிப்பைக் குறைக்க இந்த அமைப்பு தானாகவே பிரேக்கைப் பயன்படுத்தும்.
இதற்கிடையே, புதிய லாரிகள் மற்றும் பேருந்து மாடல்களில் 2027 ஜனவரி முதல் ஏஇபிஎஸ் வசதியை அறிமுகப்படுத்தும் திட்டமும் இடம்பெற்றுள்ளது. வாகனங்களில் இத்தகைய பாதுகாப்புத் தொழில்நுட்பங்கள் அதிகரிப்பதன் மூலம் சாலை விபத்துகளையும் அவற்றால் ஏற்படும் உயிரிழப்புகளையும் குறைக்க முடியும் என எதிர்பார்க்கப்படுகிறது.
Also Read: UPI-ல் பணம் அனுப்பியும் வரவில்லையா? ரீஃபண்ட் தாமதமானால் தினமும் ரூ.100 இழப்பீடு.. RBI முக்கிய விதிமுறை!
