மகாராஷ்டிராவில் கல்வி உரிமைச் சட்டத்தின் கீழ் தனியார் பள்ளியில் சேர்க்கை பெற்ற 6 வயது சிறுமியின் வாய்ப்பை, வீட்டுக்கும் பள்ளிக்கும் இடையிலான தூரத்தைக் காரணம் காட்டி பறிக்க முடியாது என மும்பை உயர் நீதிமன்றம் அதிரடி உத்தரவு பிறப்பித்துள்ளது. ஏழை குடும்பத்தைச் சேர்ந்த அந்தச் சிறுமிக்கு ஒரு வாரத்திற்குள் முதல் வகுப்பில் சேர்க்கை வழங்க வேண்டும் என்றும் நீதிமன்றம் உத்தரவிட்டுள்ளது.
மும்பையின் வொர்லி பகுதியில் உள்ள பி.டி.டி. சால் குடியிருப்பில் வசிக்கும் கருணா காம்ப்ளே, தனது மகளின் பள்ளிச் சேர்க்கைக்காக நீதிமன்றத்தை நாடினார். பொருளாதாரத்தில் பின்தங்கிய குடும்பங்களைச் சேர்ந்த குழந்தைகளுக்குத் தனியார் பள்ளிகளில் 25 சதவீத இடங்களை ஒதுக்கும் கல்வி உரிமைச் சட்டத்தின் கீழ், அவரது மகளுக்கு தாதர் பகுதியில் உள்ள பால்மோகன் வித்யாமந்திர் பள்ளியில் ஏப்ரல் மாதம் சேர்க்கை கிடைத்தது.
தேவையான ஆவணங்களைச் சமர்ப்பித்த பிறகும் பள்ளி நிர்வாகம் தனது மகளைச் சேர்க்க மறுத்ததாகக் கருணா குற்றம்சாட்டினார். இதுதொடர்பாகக் கல்வித்துறை அதிகாரிகளிடம் முறையிட்டபோது, அவரது வீட்டுக்கும் பள்ளிக்கும் இடையிலான தூரம் நிர்ணயிக்கப்பட்ட அளவைவிட அதிகமாக இருப்பதாகக் காரணம் முன்வைக்கப்பட்டது. இதை ஏற்றுக்கொண்ட மும்பை மண்டலக் கல்வித்துறை துணை இயக்குநர், ஆகஸ்ட் மாதம் சிறுமியின் சேர்க்கையை ரத்து செய்தார்.
கல்வி ஆய்வாளரின் அறிக்கையின்படி, சிறுமியின் வீடு பள்ளியிலிருந்து 4 கிலோமீட்டர் தொலைவில் இருந்தது. ஆனால், இதேபோல் 1 முதல் 3 கிலோமீட்டர் தொலைவில் வசித்த வேறு சில குழந்தைகளுக்குப் பள்ளியில் சேர்க்கை வழங்கப்பட்டதாகக் கருணா தனது மனுவில் குறிப்பிட்டார். சேர்க்கை ரத்து செய்யப்பட்டால் மகளின் ஓராண்டுக் கல்வி பாதிக்கப்படும் என்றும் அவர் வாதிட்டார்.
இதற்கு எதிராக மாநில அரசு, கல்வி உரிமைச் சட்டத்தின் விதிகளுக்கு உட்பட்டே நடவடிக்கை எடுக்கப்பட்டதாகத் தெரிவித்தது. வீட்டுக்கும் பள்ளிக்கும் இடையிலான தூரம் குறித்து மனுதாரர் தவறான தகவல் அளித்ததாகவும் குற்றம்சாட்டியது. பள்ளி நிர்வாகமும், கல்வி உரிமைச் சட்டத்தின் கீழ் சேர்க்கைக்கு விதிக்கப்பட்டுள்ள எல்லை நிபந்தனைகளை நீதிமன்றம் ஏற்கெனவே பல வழக்குகளில் உறுதிப்படுத்தியுள்ளதாக வாதிட்டது.
இந்த வழக்கை விசாரித்த நீதிபதி என்.ஜே. ஜமாதார், பள்ளி அமைந்துள்ள பகுதியின் புவியியல் சூழல் மற்றும் போக்குவரத்து வசதிகளைக் கருத்தில் கொள்ளாமல் தூர விதியை மிகவும் கடுமையாகப் பயன்படுத்தக் கூடாது எனக் குறிப்பிட்டார். மகாராஷ்டிராவின் கல்வி உரிமைச் சட்ட விதிகளின்படி, முடிந்தவரை 3 கிலோமீட்டர் தொலைவுக்குள் அருகாமைப் பள்ளி இருக்க வேண்டும் என்ற நிபந்தனை உள்ளது. இதில் நெகிழ்வுத்தன்மைக்கு இடமிருப்பதாகவும் நீதிபதி சுட்டிக்காட்டினார்.
மும்பை போன்ற பெருநகரங்களில் போக்குவரத்து வசதிகள், பள்ளியை எளிதில் அணுகும் வாய்ப்பு உள்ளிட்ட பல காரணிகள் தூரத்தின் முக்கியத்துவத்தை மாற்றுகின்றன. எனவே, பள்ளிக்கும் வீட்டுக்கும் இடையிலான தூரத்தைத் துல்லியமான கணக்கீட்டின் அடிப்படையில் மட்டும் தீர்மானிக்க முடியாது என நீதிமன்றம் தெரிவித்தது.
அருகாமைப் பள்ளி என்ற கருத்தை மிகவும் குறுகிய பார்வையில் அணுகுவது, குழந்தைகளுக்குக் கட்டணமின்றிக் கட்டாயக் கல்வி வழங்கும் அரசியலமைப்பு உரிமையையே பாதிக்கும் என்றும் நீதிபதி எச்சரித்தார். இதையடுத்து, சிறுமியின் சேர்க்கையை ரத்து செய்த கல்வித்துறை உத்தரவை ரத்து செய்த நீதிமன்றம், ஒரு வாரத்திற்குள் அவரைப் பால்மோகன் வித்யாமந்திர் பள்ளியின் முதல் வகுப்பில் சேர்க்க உத்தரவிட்டது.
Also Read: பிரான்ஸில் வன்முறை போராட்டம்; இந்தியர்களுக்கு தூதரகம் அவசர எச்சரிக்கை!
