பிரான்ஸில் போராட்டங்கள் வன்முறையாக மாறியுள்ள நிலையில், அங்கு வசிக்கும் இந்தியர்கள் மற்றும் சுற்றுலா செல்லத் திட்டமிட்டுள்ள இந்தியர்களுக்கு பாரீஸில் உள்ள இந்தியத் தூதரகம் முக்கிய எச்சரிக்கை விடுத்துள்ளது. போராட்டங்கள் நடைபெறும் பகுதிகள், மக்கள் அதிகம் கூடும் இடங்களுக்குச் செல்வதைத் தவிர்த்து, பாதுகாப்புடன் இருக்குமாறு அறிவுறுத்தியுள்ளது.
பிரான்ஸின் பல்வேறு நகரங்களில் வாழ்க்கைச் செலவு அதிகரிப்பு, பொதுச் சேவைகளின் தரம் குறைதல், கல்வித்துறையில் நிலவும் பிரச்சினைகள் உள்ளிட்ட காரணங்களால் போராட்டங்கள் தீவிரமடைந்துள்ளன. பாரீஸ், மார்செய், லியோன் உள்ளிட்ட நகரங்களில் வன்முறைச் சம்பவங்கள் அரங்கேறியுள்ளன. கடைகள் சூறையாடப்படுதல், தீவைப்பு மற்றும் காவல்துறையினருடன் மோதல் போன்ற சம்பவங்களும் நடந்துள்ளன.
இதையடுத்து, பிரான்ஸின் சில பகுதிகளில் ஊரடங்கு கட்டுப்பாடுகள் அமல்படுத்தப்பட்டுள்ளன. இந்தச் சூழலில், இந்தியர்கள் மிகுந்த எச்சரிக்கையுடன் இருக்க வேண்டும் என்றும், போராட்டங்கள் நடைபெறும் இடங்களிலிருந்து விலகி இருக்க வேண்டும் என்றும் இந்தியத் தூதரகம் கேட்டுக்கொண்டுள்ளது. மேலும், பிரான்ஸ் அதிகாரிகள் வெளியிடும் பாதுகாப்பு அறிவுறுத்தல்களைப் பின்பற்றுவதுடன், போக்குவரத்துச் சேவைகளில் ஏற்படக்கூடிய மாற்றங்கள் குறித்தும் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும் என அறிவுறுத்தியுள்ளது.
அவசர உதவி தேவைப்படும் இந்தியர்கள் பாரீஸில் உள்ள இந்தியத் தூதரகத்தை +33 6 48 34 00 63 என்ற தொலைபேசி எண்ணிலோ, cons.paris@mea.gov.in என்ற மின்னஞ்சல் முகவரியிலோ தொடர்புகொள்ளலாம்.
பிரான்ஸில் பள்ளிகளுக்கான நிதி ஒதுக்கீடு குறைவு, அடிப்படை வசதிகள் பற்றாக்குறை, ஆசிரியர் மற்றும் பணியாளர் தட்டுப்பாடு உள்ளிட்ட பிரச்சினைகளை முன்வைத்து உயர்நிலைப் பள்ளி மாணவர்கள் போராட்டத்தில் ஈடுபட்டுள்ளனர். குறிப்பாக, குறைந்த வருமானம் கொண்ட மக்கள் வசிக்கும் பகுதிகளில் உள்ள பள்ளிகளில் இந்தப் பிரச்சினைகள் அதிகமாக இருப்பதாக மாணவர்கள் சுட்டிக்காட்டுகின்றனர்.
காலை 8 மணி முதல் மாலை 6 மணி வரை நீடிக்கும் பள்ளி நேரம் சோர்வை ஏற்படுத்துவதாகவும், பல்கலைக்கழக மாணவர் சேர்க்கை நடைமுறைகள் சிக்கலானதாகவும் நியாயமற்றதாகவும் இருப்பதாகவும் மாணவர்கள் எதிர்ப்பு தெரிவித்துள்ளனர்.
வார இறுதியில் ஏற்பட்ட வன்முறையைத் தொடர்ந்து, பிரான்ஸில் தொடர்ந்து இரண்டு இரவுகள் அமைதி நிலவியது. இருப்பினும், பாரீஸ் உள்ளிட்ட முக்கிய நகரங்களின் சில பகுதிகளில் ஊரடங்கு கட்டுப்பாடுகள் தொடர்கின்றன. மாணவர் அமைப்புகள் மற்றும் மஞ்சள் அங்கி இயக்கத்துடன் தொடர்புடைய குழுக்கள் வியாழன் மற்றும் சனிக்கிழமைகளில் மீண்டும் போராட்டங்களுக்கு அழைப்பு விடுத்துள்ளன.
2018 மற்றும் 2019ஆம் ஆண்டுகளில் எரிபொருள் விலை உயர்வுக்கு எதிராக மஞ்சள் அங்கி இயக்கம் நடத்திய போராட்டங்கள் பிரான்ஸில் பெரும் அமைதியின்மையை ஏற்படுத்தின. தற்போது மீண்டும் போராட்டங்கள் தீவிரமடையக்கூடும் என்ற அச்சம் எழுந்துள்ளதால், பாரீஸில் வியாழக்கிழமை நடைபெறத் திட்டமிடப்பட்டிருந்த ஒரு போராட்டத்துக்குப் பொதுப் பாதுகாப்பு மற்றும் சொத்துச் சேதம் ஏற்படும் அபாயத்தைக் காரணம் காட்டி காவல்துறை தடை விதித்துள்ளது.
போராட்டங்களின்போது கைது செய்யப்பட்ட 2,500 பேரில் 174 பேர் சிறையில் அடைக்கப்பட்டுள்ளதாகவும், மேலும் 917 பேர் மீது முறைப்படி வழக்குத் தொடரப்பட்டுள்ளதாகவும் பிரான்ஸ் நீதித்துறை அமைச்சர் ஜெரால்ட் டார்மானின் தெரிவித்துள்ளார்.
இதற்கிடையே, பிரதமர் செபாஸ்டியன் லெகோர்னு தொழிற்சங்கப் பிரதிநிதிகளைச் சந்தித்துப் பேசியுள்ளார். சனிக்கிழமை நடைபெறவுள்ள போராட்டங்களின்போது வன்முறை மீண்டும் ஏற்படுவதைத் தடுக்கும் வகையில், நாடு முழுவதும் விரிவான பாதுகாப்பு ஏற்பாடுகள் மேற்கொள்ளப்படும் என்றும் அவர் தெரிவித்துள்ளார்.
இதேபோல், வாழ்க்கைச் செலவு உயர்வு மற்றும் பொதுச் சேவைகளின் குறைபாடுகளுக்கு எதிரான போராட்டங்கள் காரணமாக, இத்தாலியில் உள்ள இந்தியர்களுக்கும் அந்நாட்டுக்கான இந்தியத் தூதரகம் முன்னதாகப் பாதுகாப்பு அறிவுறுத்தல்களை வெளியிட்டிருந்தது குறிப்பிடத்தக்கது.
Also Read: உடலில் நீர்ச்சத்து குறையாமல் இருக்க என்ன செய்யணும்? கட்டாயம் தெரிஞ்சுக்கோங்க!
