ஓய்வூதியம் பெறுவதற்கான வாழ்நாள் சான்றிதழைப் பெற்றுத் தருவதாகக் கூறி, 84 வயது முன்னாள் விமானப்படை அதிகாரியிடம் ரூ.4.5 லட்சத்தை சைபர் மோசடி கும்பல் பறித்த சம்பவம் புனேவில் அதிர்ச்சியை ஏற்படுத்தியுள்ளது. வங்கி அதிகாரிகள் போலத் தொலைபேசியில் பேசி, வாட்ஸ்அப் மூலம் கோப்புகளை அனுப்பி, ரகசிய வங்கி விவரங்களையும் ஓடிபி எண்ணையும் பெற்றதன் மூலம் இந்த மோசடி அரங்கேறியுள்ளது.
மகாராஷ்டிர மாநிலம் புனேவைச் சேர்ந்தவர் 84 வயதான ஓய்வுபெற்ற இந்திய விமானப்படை அதிகாரி. இவர் தனது ஓய்வூதியத்தைத் தொடர்ந்து பெறுவதற்கான வாழ்நாள் சான்றிதழைச் சமர்ப்பிக்க வேண்டியிருந்தது. இதைப் பயன்படுத்திக் கொண்ட அடையாளம் தெரியாத நபர்கள், பொதுத்துறை வங்கி அதிகாரிகள் எனக் கூறி அவரைத் தொடர்புகொண்டுள்ளனர்.
கடந்த அக்டோபர் 8 மற்றும் 9ஆம் தேதிகளில் அவருக்குத் தொடர்ச்சியாக அழைப்புகள் வந்துள்ளன. அப்போது, ஓய்வூதியத்திற்கான வாழ்நாள் சான்றிதழை உருவாக்க வேண்டும் என்றும், அதற்கான இணைப்பு வாட்ஸ்அப் மூலம் அனுப்பப்படும் என்றும் மோசடி நபர்கள் தெரிவித்துள்ளனர்.
அக்டோபர் 9ஆம் தேதி மருத்துவச் சிகிச்சைக்காக கமாண்ட் மருத்துவமனைக்குச் சென்றுகொண்டிருந்தபோது, மீண்டும் அவருக்கு அழைப்பு வந்துள்ளது. வங்கி அதிகாரி போலப் பேசிய நபர், வாட்ஸ்அப் மூலம் ஒரு கோப்பை அனுப்பியுள்ளார். மேலும், வங்கியின் சின்னத்தைக் காண்பித்தபடி வீடியோ அழைப்பிலும் பேசியுள்ளார்.
இதனை நம்பிய முன்னாள் விமானப்படை அதிகாரி, அந்தக் கோப்பில் கேட்கப்பட்ட விவரங்களைப் பதிவு செய்ததுடன், தனது கைப்பேசிக்கு வந்த ஒருமுறை கடவுச்சொற்களையும் (OTP) அந்த நபரிடம் பகிர்ந்துள்ளார். இதையடுத்து, வாழ்நாள் சான்றிதழ் தயாராகிவிட்டதாகவும், ஒரு மணி நேரத்திற்குள் கிடைத்துவிடும் என்றும் மோசடி நபர் உறுதியளித்துள்ளார்.
ஆனால், மருத்துவமனைக்குச் சென்றுவிட்டுத் திரும்பிய அவர் தனது கைப்பேசியைப் பார்த்தபோது அதிர்ச்சியடைந்தார். அவரது வங்கிக் கணக்கிலிருந்து ரூ.4.5 லட்சம் வேறு கணக்கிற்கு மாற்றப்பட்டிருப்பதாகக் குறுஞ்செய்தி வந்திருந்தது.
இதையடுத்து, வானவாடி பகுதியில் உள்ள தனது வங்கிக் கிளைக்குச் சென்று விசாரித்தபோது, பணம் மற்றொரு வங்கிக் கணக்கிற்கு மாற்றப்பட்டது தெரியவந்தது. இதுகுறித்து அவர் அக்டோபர் 10ஆம் தேதி போலீசாரிடம் புகார் அளித்ததுடன், தேசிய சைபர் குற்றப் புகார் இணையதளத்திலும் புகார் பதிவு செய்தார்.
இதன் அடிப்படையில், புனேவின் கொண்ட்வா காவல் நிலைய போலீசார் அக்டோபர் 23ஆம் தேதி தகவல் தொழில்நுட்பச் சட்டம் மற்றும் பாரதிய நியாய சன்ஹிதா ஆகியவற்றின் கீழ் வழக்குப் பதிவு செய்தனர். மோசடியில் ஈடுபட்ட அடையாளம் தெரியாத நபர்களைக் கண்டறியும் விசாரணை நடைபெற்று வருகிறது.
ஓய்வூதியதாரர்கள் உயிருடன் இருப்பதையும், தொடர்ந்து ஓய்வூதியம் பெறத் தகுதியுடையவர்களாக இருப்பதையும் உறுதிப்படுத்த வாழ்நாள் சான்றிதழ் அவசியமாகிறது. இந்த நடைமுறையைப் பயன்படுத்தி, வங்கி அதிகாரிகள் எனக் கூறி மோசடி நபர்கள் ஓய்வூதியதாரர்களைக் குறிவைக்கலாம் என சைபர் குற்றப்பிரிவு போலீசார் எச்சரிக்கின்றனர். எனவே, வங்கி விவரங்கள் மற்றும் ஓடிபி எண்களைத் தொலைபேசி அழைப்புகள் அல்லது வாட்ஸ்அப் மூலம் யாரிடமும் பகிரக்கூடாது என அறிவுறுத்தப்பட்டுள்ளது.
Also Read: திமுகவில் வெடிக்கும் அதிருப்தி.. களத்தில் இறங்காத உதயநிதி; ஸ்டாலினிடம் புகார் தெரிவித்த மூத்த நிர்வாகிகள்?
