ஈரான் அணு ஆயுதம் தயாரிக்கும் முயற்சியில் ஈடுபட்டால் இஸ்ரேலின் பாதுகாப்புக்கு மிகப்பெரிய அச்சுறுத்தல் உருவாகும் என இஸ்ரேல் பிரதமர் பெஞ்சமின் நெதன்யாகு எச்சரிக்கை விடுத்துள்ளார். எழுத்தாளர் யுவால் ப்ளூம்பெர்க் வெளியிட்ட கருத்துகளை தனது எக்ஸ் தளத்தில் பகிர்ந்துள்ள அவர், ஈரானின் அணுசக்தி நடவடிக்கைகள் குறித்த கவலையை மீண்டும் முன்னிறுத்தியுள்ளார்.
ஈரான் அணு ஆயுதத்தைப் பெற்றுவிட்டால், மத்திய கிழக்கின் பாதுகாப்புச் சூழல் அடியோடு மாறிவிடும் என ப்ளூம்பெர்க் தனது பதிவில் குறிப்பிட்டுள்ளார். இஸ்ரேலுக்கு இது வெறும் அச்சுறுத்தல் மட்டுமல்ல; நாட்டின் எதிர்காலத்தையே பாதிக்கக்கூடிய ஆபத்து என்றும் அவர் வலியுறுத்தியுள்ளார்.
அமெரிக்க அதிபர் டொனால்ட் டிரம்பின் பதவிக்காலம் முடிவடைய இன்னும் இரண்டு ஆண்டுகள் இருப்பதாகக் குறிப்பிட்ட ப்ளூம்பெர்க், அந்தக் காலத்திற்குள் ஈரான் தொடர்பான நடவடிக்கையை இஸ்ரேல் முடிக்க வேண்டும் என வலியுறுத்தியுள்ளார். அதன் பின்னர் அமெரிக்காவில் யார் ஆட்சிக்கு வருவார்கள், அவர்கள் இஸ்ரேலுக்கு எத்தகைய ஆதரவை வழங்குவார்கள் என்பதை உறுதியாகக் கணிக்க முடியாது என்றும் அவர் சுட்டிக்காட்டியுள்ளார்.
இஸ்ரேலில் தேர்தல் நெருங்கும் சூழலில், உள்நாட்டுப் பிரச்சினைகள் மற்றும் அரசியல் மோதல்கள் நாட்டின் முக்கிய பாதுகாப்புச் சவாலிலிருந்து கவனத்தைத் திசைதிருப்புவதாக ப்ளூம்பெர்க் விமர்சித்துள்ளார். கத்தார் தொடர்பான விவகாரம், ஹரேடி யூதர்களின் நிலைப்பாடு, ராணுவப் பணிக்கான ஆட்சேர்ப்பு உள்ளிட்ட பிரச்சினைகள் குறித்து அரசியல் கட்சிகள் விவாதிப்பதைவிட, ஈரானின் அணு ஆயுத அச்சுறுத்தலுக்கு முன்னுரிமை அளிக்க வேண்டும் என்பதே அவரது வாதமாக உள்ளது.
நாட்டின் மையப்பகுதியில் இரண்டு அணு குண்டுகள் தாக்கினால், தற்போது நடைபெறும் அரசியல் விவாதங்களால் என்ன பயன் இருக்கும் என்ற கேள்வியையும் அவர் எழுப்பியுள்ளார். ஈரானின் அணு ஆயுதத் திட்டத்தைத் தடுப்பதற்கான வாய்ப்பை இஸ்ரேல் தவறவிட்டால், எதிர்காலத் தலைமுறையினர் அதற்காக நாட்டின் தலைவர்களை மன்னிக்க மாட்டார்கள் என்றும் அவர் எச்சரித்துள்ளார்.
மேலும், அமெரிக்க அதிபர் டிரம்புடன் நெருக்கமான தொடர்பைப் பேண முடியாத அல்லது அரசியல் அழுத்தங்களை எதிர்கொள்ள முடியாத தலைவரால் இந்தப் பணியை நிறைவேற்ற முடியாது என்பது ப்ளூம்பெர்க்கின் கருத்தாக உள்ளது. நெதன்யாகுவை விரும்பாத வாக்காளர்கள்கூட, ஈரான் தொடர்பான பாதுகாப்பு விவகாரத்தில் யாருக்கு ஆதரவளிப்பது என்பதைத் தீர்மானிக்கும் முன் நாட்டின் எதிர்காலத்தையும் குடும்பங்களின் பாதுகாப்பையும் கருத்தில் கொள்ள வேண்டும் என அவர் வலியுறுத்தியுள்ளார்.
Also Read: 154 ரன்களுக்கு 9 விக்கெட்டுகள் சரிவு.. அடுத்து நடந்தது என்ன? இங்கிலாந்துக்கு அதிர்ச்சி கொடுத்த பாகிஸ்தான்..
