இந்திய சினிமாவின் மிக உயரிய அங்கீகாரமாக கருதப்படும் தேசிய திரைப்பட விருதுகளின் 72-வது விழா, குஜராத் மாநிலம் கெவாடியா (ஏக்தா நகர்) பகுதியில் நடைபெற்று வருகிறது. குடியரசுத் தலைவர் திரௌபதி முர்மு வெற்றியாளர்களுக்கு விருதுகளை வழங்கி கௌரவிக்கிறார். டெல்லிக்கு வெளியே தேசிய திரைப்பட விருது வழங்கும் விழா நடைபெறுவது வரலாற்றிலேயே இதுவே முதல் முறையாகும். 72-வது ஆண்டை எட்டியுள்ள இந்த தேசிய திரைப்பட விருதுகளின் பின்னணி, நோக்கம் மற்றும் கடந்து வந்த பாதையை இங்கு விரிவாகப் பார்ப்போம்.
தேசிய திரைப்பட விருதுகள் எப்போது தொடங்கப்பட்டன?
தேசிய திரைப்பட விருதுகள் 1954-ஆம் ஆண்டு நிறுவப்பட்டு, 1953-ஆம் ஆண்டில் வெளியான திரைப்படங்களுக்கு முதன்முதலாக வழங்கப்பட்டன. அக்காலத்தில் டாக்டர் ராஜேந்திர பிரசாத் இந்தியாவின் குடியரசுத் தலைவராகவும், பி.வி.கேஸ்கர் தகவல் மற்றும் ஒளிபரப்புத் துறை அமைச்சராகவும் பதவி வகித்தனர்.
தொடக்கத்தில் இந்த விருதுகள் ‘தேசிய திரைப்பட விருதுகள்’ என்று அழைக்கப்படவில்லை. மாறாக, ‘திரைப்படங்களுக்கான மாநில விருதுகள்’ (State Awards for Films) என்ற பெயரிலேயே அறிமுகப்படுத்தப்பட்டன.
இந்திய அரசு 1949-ல் அமைத்த ‘திரைப்பட விசாரணைக்குழு’வின் (Film Inquiry Committee) பரிந்துரைகளின் அடிப்படையிலேயே, இந்திய சினிமாவுக்கு அரசு ரீதியிலான கௌரவங்களை வழங்கும் இந்தத் திட்டம் உருவானது.
விருதுகள் அறிமுகப்படுத்தப்பட்டதன் நோக்கம் என்ன?
சிறந்த கதையமைப்பு, கலைநயம் மற்றும் தொழில்நுட்பத் திறனுடன் உருவாக்கப்படும் திரைப்படங்களை ஊக்குவிப்பதே இதன் முக்கிய நோக்கமாகும். அத்துடன், இந்திய கலாச்சாரம் மற்றும் சமுதாயத்தைப் பிரதிபலிக்கும் படங்களை அங்கீகரிக்கவும் அரசு விரும்பியது.
இந்தியாவில் பல்வேறு மொழிகளில் திரைப்படங்கள் தயாரிக்கப்படுவதால், நாட்டின் பன்முகத்தன்மை, பாரம்பரியம் மற்றும் வாழ்க்கை முறையைப் பிரதிபலிக்கும் படைப்புகளுக்கு முன்னுரிமை அளிக்கப்பட்டது. எனவே, தொடக்கம் முதலே இந்த விருதுகள் இந்தி சினிமாவுக்கு மட்டும் வரையறுக்கப்படாமல் தமிழ், தெலுங்கு, மலையாளம், கன்னடம், மராத்தி, பெங்காலி, அஸ்ஸாமி என அனைத்து இந்திய மொழிப் படங்களுக்கும் வழங்கப்பட்டு வருகின்றன.
முதல் விருது விழா எங்கு நடைபெற்றது? பெற்றவர்கள் யார்?
முதல் விருது வழங்கும் விழா 1954 அக்டோபர் 10 அன்று டெல்லியில் உள்ள விஞ்ஞான பவனில் நடைபெற்றது.
சிறந்த திரைப்படம்: ‘ஷியாம்ச்சி ஆய்’ (Shyamchi Aai) என்ற மராத்தி திரைப்படம் சிறந்த திரைப்படத்திற்கான முதல் ‘தங்கப் பதக்கத்தை’ (Gold Medal) வென்றது.
சிறந்த ஆவணப்படம்: ‘மகாபலிபுரம்’ (Mahabalipuram) ஆவணப்படம் சிறந்த ஆவணப்பட விருதை வென்றது.
சான்றிதழ்கள்: இந்தி திரைப்படமான ‘தோ பிகா ஜமீன்’ (Do Bigha Zamin) மற்றும் பெங்காலி திரைப்படமான ‘பகவான் ஸ்ரீ கிருஷ்ண சைதன்யா’ ஆகியவை இந்திய அளவிலான தகுதிச் சான்றிதழ்களைப் பெற்றன. ‘கேலா கர்’ திரைப்படம் சிறந்த சிறுவர் திரைப்படத்திற்கான சான்றிதழைப் பெற்றது.
நடிப்புக்கான விருதுகள் எப்போது அறிமுகப்படுத்தப்பட்டன?
1954-ல் தொடங்கப்பட்டபோது நடிகர்களுக்கான தனிப்பட்ட விருதுகள் வழங்கப்படவில்லை. கலைஞர்கள் மற்றும் தொழில்நுட்பக் கலைஞர்களுக்கான தனி விருதுகள் 1967-ஆம் ஆண்டில்தான் அறிமுகப்படுத்தப்பட்டு, 1968-ல் முதன்முறையாக வழங்கப்பட்டன.
சிறந்த நடிகர்: பெங்காலி நடிகர் உத்தம் குமார் ‘அந்தோணி ஃபிரிங்கி’ மற்றும் ‘சிரியாகானா’ ஆகிய படங்களில் நடித்ததற்காக முதல் சிறந்த நடிகருக்கான விருதைப் பெற்றார். (அப்போது இவ்விருது ‘பாரத் விருது’ என அழைக்கப்பட்டது).
சிறந்த நடிகை: ‘ராத் அவுர் தின்’ படத்தில் நடித்ததற்காக நடிகை நர்கிஸ் தத் முதல் சிறந்த நடிகைக்கான விருதைப் பெற்றார். (அப்போது இவ்விருது ‘ஊர்வாசி விருது’ என அழைக்கப்பட்டது).
தேசிய திரைப்பட விருதுகளின் வளர்ச்சி:
தாதாசாஹேப் பால்கே விருது (1969): இந்திய சினிமாவுக்கு ஆற்றிய வாழ்நாள் பங்களிப்பைப் பாராட்டும் வகையில் 1969-ல் தாதாசாஹேப் பால்கே விருது அறிமுகம் செய்யப்பட்டது. இதன் முதல் விருதை நடிகை தேவிகா ராணி பெற்றார்.
நிர்வாக மாற்றம் (1973 & 2022): 1973 முதல் இந்த விருதுகளைத் திரைப்பட விழாக்கள் இயக்ககம் (DFF) நிர்வகித்து வந்தது. பின்னர், 2022-ஆம் ஆண்டு மறுசீரமைப்பின் பகுதியாக இது தேசிய திரைப்பட வளர்ச்சிக் கழகத்துடன் (NFDC) இணைக்கப்பட்டது.
இன்று ஒளிப்பதிவு, படத்தொகுப்பு, இசை, பின்னணிப் பாடல், திரைக்கதை, ஆடை வடிவமைப்பு, ஒப்பனை, ஒலிப்பதிவு, நடனம், சண்டைப்பயிற்சி மற்றும் காட்சி விளைவுகள் (VFX) என திரைப்படத்தின் அனைத்துத் துறைகளையும் அங்கீகரிக்கும் ஒரு பிரம்மாண்ட தேசிய தளமாக இது உருவெடுத்துள்ளது.
