தமிழகத்தில் நேரடி நெல் கொள்முதல் நிலையங்களில் கொள்முதல் செய்யப்பட்ட பல லட்சம் நெல் மூட்டைகள் மழையில் நனைந்து சேதமடைவதை தடுக்க தவறிய தவெக அரசுக்கு அதிமுக பொதுச்செயலாளர் எடப்பாடி பழனிசாமி கடும் கண்டனம் தெரிவித்துள்ளார்.
இதுதொடர்பாக அவர் விடுத்துள்ள அறிக்கையில், அனுபவமற்ற விளையாட்டுப் பிள்ளைகளால் வழிநடத்தப்படும் தவெக தலைமையிலான கூட்டணி ஆட்சியில், விவசாயிகள் எதிர்கொள்ளும் இன்னல்கள் சொல்லி மாளாத அளவுக்கு அதிகரித்துள்ளதாக விமர்சித்துள்ளார். டெல்டா உள்ளிட்ட பல்வேறு மாவட்டங்களில் விவசாயிகள் அரும்பாடுபட்டு விளைவித்த நெல்லை குறித்த காலத்தில் அரசு முறையாகக் கொள்முதல் செய்வதில்லை என்ற குற்றச்சாட்டை முன்வைத்த அவர், அரைகுறையாகக் கொள்முதல் செய்த நெல்மணிகளையும் போதிய சேமிப்புக் கிடங்கு வசதிகள் இன்றி திறந்தவெளியில் விட்டு மழையில் வீணடித்துள்ளதாக சாடியுள்ளார்.
குறிப்பாக, கடலூர் மாவட்டத்தில் உள்ள 120 நேரடி நெல் கொள்முதல் நிலையங்களில் இடப்பற்றாக்குறை காரணமாக திறந்தவெளியில் அடுக்கி வைக்கப்பட்டிருந்த சுமார் 5 லட்சம் நெல் மூட்டைகள், தார்ப்பாய் கூட இல்லாமல் கடந்த இரு தினங்களாகப் பெய்த கனமழையில் நனைந்து நாசமாகியுள்ளதைச் சுட்டிக்காட்டியுள்ளார். இத்தகைய அலட்சியத்தால் நனைந்து சேதமடைந்த நெல்மணிகள் பின்னாளில் புழுத்துப் போன அரிசியாக மாறி ரேஷன் கடைகளுக்கு அனுப்பப்படும் அபாயம் உருவாகியுள்ளதாகவும் அவர் எச்சரித்துள்ளார்.
ஆட்சியாளர்களின் மெத்தனப் போக்கால் விவசாயிகள் ஒருபுறமும், ரேஷன் அரிசியை நம்பியிருக்கும் ஏழை எளிய மக்கள் மறுபுறமும் சொல்லொணாத் துயரத்திற்கு ஆளாகி வருவதாகக் குறிப்பிட்ட அவர், சொல் புத்தியும் சுய புத்தியும் இன்றிச் செயல்படும் தவெக அரசைக் கண்டிப்பதாகத் தெரிவித்துள்ளார். மேலும், அரசு சேமிப்புக் கிடங்குகளில் உள்ள நெல் மூட்டைகளைப் பாதுகாக்க உடனடியாக போர்க்கால அடிப்படையில் துரித நடவடிக்கைகளை எடுக்க வேண்டும் எனவும் எடப்பாடி பழனிசாமி வலியுறுத்தியுள்ளார்.
