தமிழ்நாட்டில் அரசு விரைவுப் போக்குவரத்துக் கழக (SETC) பேருந்துகளைத் தவிர்த்து, பிற அனைத்து அரசுப் போக்குவரத்துக் கழகப் பேருந்துகளிலும் மகளிருக்கான கட்டணமில்லா பயணத் திட்டத்தை முழுமையாக விரிவாக்கம் செய்ய தமிழ்நாடு அரசு தீவிர ஆலோசனைகளை மேற்கொண்டு வருகிறது.
தற்போதைய நிலவரப்படி, சென்னையில் சாதாரண மற்றும் டீலக்ஸ் (சொகுசு) கட்டணப் பேருந்துகள் என மொத்தம் 3,633 பேருந்துகளிலும், வெளி மாவட்டங்களில் இயக்கப்படும் நகர மற்றும் சாதாரண கட்டணப் பேருந்துகள் உட்பட 9,000-க்கும் மேற்பட்ட பேருந்துகளிலும் பெண்கள் கட்டணமின்றிப் பயணம் செய்வதற்கான வழிமுறைகளை வகுத்து, அதற்கான அதிகாரப்பூர்வ வழிகாட்டு நெறிமுறைகளை அரசு மிக விரைவில் வெளியிட உள்ளது.
இதனைத் தொடர்ந்து அடுத்தகட்டமாக, நீண்ட தூர விரைவுப் பேருந்துகள் (SETC) நீங்கலாக, விழுப்புரம், கும்பகோணம், சேலம், மதுரை, திருநெல்வேலி மற்றும் கோயம்புத்தூர் ஆகிய மண்டல போக்குவரத்துக் கழகங்களின் கீழ் இயக்கப்படும் அனைத்து அரசுப் பேருந்துகளிலும் இத்திட்டத்தை விரிவுபடுத்த அரசு திட்டமிட்டுள்ளது. இதற்காக, ஒவ்வொரு போக்குவரத்துக் கழக வாரியாகத் தேவைப்படும் நிதிச்சுமை மற்றும் பேருந்துகளின் எண்ணிக்கை குறித்த விரிவான புள்ளிவிவர அறிக்கைகள் தற்போது தயாரிக்கப்பட்டு வருகின்றன.
அனைத்துப் போக்குவரத்துக் கழகங்களிடம் இருந்தும் பெறப்படும் இந்த ஆய்வறிக்கை விரைவில் அரசிடம் சமர்ப்பிக்கப்பட உள்ளதாகவும், அதனை முழுமையாகப் பரிசீலித்த பின் தமிழக அரசு இந்த மெகா விரிவாக்கத் திட்டம் குறித்த அதிகாரப்பூர்வ அறிவிப்பை வெளியிடும் என்றும் துறைசார் உயர் அதிகாரிகள் தெரிவித்துள்ளனர்.
