உத்திரபிரதேச மாநிலத்தில் பெற்ற தாயே தன் பிள்ளையை தலையில் வெட்டி கொன்ற சம்பவம் பரபரப்பு ஏற்படுத்தி இருக்கிறது. உத்திரபிரதேசம் மாநிலம் காசிப்பூர் மாவட்டத்தில் உள்ள பீஜாரா கிராமத்தைச் சார்ந்தவர் அஜித் யாதவ் இவரது மனைவி நீது. இந்த தம்பதிக்கு பாரி என்ற மகளும் ஹேப்பி மற்றும் ஹர்திக் என்ற மகன்களும் இருந்தனர். அஜித் யாதவ் ஜம்முவில் ராணுவ வீரராக பணியாற்றி வருகிறார். இவர் தன்னுடைய பணிக்காக ஜம்முவுக்கு சென்றுள்ளார். இந்நிலையில் குழந்தைகளுடன் நீது மட்டும் அவருடைய கிராமத்தில் வசித்து வந்துள்ளார். கடந்த வெள்ளிக்கிழமை இரவு நீது வீட்டிலிருந்த கத்தியை எடுத்து தனது குழந்தைகளின் தலையை வெட்டி இருக்கிறார். இதில் தலை துண்டான நிலையில் இரண்டு மகன்களும் உயிரிழந்துள்ளனர். மகள் பாரி மட்டும் உயிர் பிழைத்துள்ளார். இந்த சம்பவம் அப்பகுதிகளில் பெரும் பரபரப்பையும் பதற்றத்தையும் ஏற்படுத்தி இருக்கிறது.
இச்சம்பவம் குறித்து வந்த தகவலைத் தொடர்ந்து காவல்துறையினர் சம்பவ இடத்திற்கு சென்று இறந்த குழந்தைகளின் உடலை கைப்பற்றி பிரேத பரிசோதனைக்காக அனுப்பி வைத்தனர். காயம் அடைந்த குழந்தையை மருத்துவமனையில் சேர்த்தனர். அங்கு குழந்தைக்கு தீவிர சிகிச்சை அளிக்கப்பட்டு வருகிறது. எதனால் தாயே குழந்தையை வெட்டி கொலை செய்தார் என்ன காரணம்? என்ற ரீதியில் காவல்துறை விசாரணையை மேற்கொண்டு வருகிறது. காவல்துறைக்கு கிடைத்த முதல் கட்ட தகவல்களின்படி அந்தப் பெண் மனநிலை சரியில்லாதவர் என்றும் அதன் காரணமாக தன்னுடைய குழந்தைகளையே கொலை செய்திருக்கிறார் என்றும் தெரிய வந்திருக்கிறது. இந்த சம்பவம் தொடர்பாக மேலும் தீவிரமாக விசாரணை செய்து வருவதாக மாவட்ட எஸ்பி தெரிவித்துள்ளார்.
