தீபாவளிக்கு சொந்த ஊருக்கு சென்ற குடும்பத்தினரின் 2 1/2 வயது குழந்தை உயிரிழந்துள்ளது பெரும் துக்கத்தில் ஆழ்த்தியுள்ளது.
கரூர் வெங்கமேடு பகுதியைச் சேர்ந்த சுதாகர், சென்னையில் ஐடி துறையில் வேலை செய்து வருகிறார். தீபாவளியை முன்னிட்டு சுதாகர் மற்றும் அவரது மனைவி கீர்த்தனா , 2 1/2 வயது பெண் குழந்தை சுஷ்மிதாவுடன் தீபாவளி கொண்டாட சொந்த ஊருக்கு காரில் சென்றிருக்கிறார்.
சென்னையிலிருந்து கரூர் சென்ற குடும்பத்தினரின் கார் கரூர் தேசிய நெடுஞ்சாலையில் நிலை தடுமாறி பள்ளத்தில் கவிழ்ந்துள்ளது. இவர் சென்னையில் இருந்து இரவில் புறப்பட்டு கரூர் -திருச்சி தேசிய நெடுஞ்சாலையான வனவாசி டோல் பிளாசா அருகே சென்று கொண்டிருந்த போது, சாலை மேடு பள்ளமாக பழுதடைந்து இருந்த நிலையில் கார் திடீரென்று கட்டுப்பாட்டை இழந்து 15 அடி உயர பள்ளத்தில் இருந்து உருண்டு கவிழ்ந்து இருக்கிறது.
சுதாகர் சீட் பெல்ட் போட்டு இருந்த காரணத்தால் அவருக்கு எந்தவிதமான அடியும் இல்லை. ஆனால் குழந்தையும் மனைவியும் சீட் பெல்ட் போடாமல் இருந்ததால் மனைவிக்கு பலத்த காயம் ஏற்பட்டிருக்கிறது. குழந்தை தூக்கி எறியப்பட்டு சம்பவ இடத்திலேயே உயிரிழந்திருக்கிறது.
உயிரிழந்து கிடந்த குழந்தையை மடியில் தூக்கி வைத்துக் கொண்டு தந்தை கதறி அழுதது சம்பவம், அவ்வழியாக சென்ற பொது மக்களை சோகத்தில் ஆழ்த்தியது. மகிழ்ச்சியாக தீபாவளியைக் குடும்பத்துடன் கொண்டாட சென்ற இத்தம்பதியற்கு நடந்த விபத்து அப்பகுதியில் பெரும் சோகத்தை ஏற்படுத்தியுள்ளது.
