சிறிய விஷயங்களுக்குக் கூட குழந்தைகள் கோபப்படுவது, அழுவது அல்லது அடம்பிடிப்பது பல பெற்றோர்களுக்கு கவலையை ஏற்படுத்துகிறது. ஆனால், இதை வெறும் “அடம்பிடிக்கும் குணம்” என்று கருதிவிட்டு அலட்சியப்படுத்தக் கூடாது என்று குழந்தைகள் நல மருத்துவர்கள் மற்றும் உளவியல் நிபுணர்கள் எச்சரிக்கின்றனர்.
நிபுணர்கள் கூறுவதன்படி, குழந்தைகளின் கோபத்திற்கு பல்வேறு காரணங்கள் இருக்கலாம். அதில் முக்கியமான ஒன்று, பெற்றோர் குழந்தைகளுடன் போதுமான நேரம் செலவிடாதது. வேலைப்பளு, மொபைல் போன் பயன்பாடு மற்றும் பிற பொறுப்புகளால் குழந்தைகளின் உணர்வுகளை கவனிக்காமல் இருப்பது, அவர்களிடம் விரக்தி மற்றும் கோபத்தை உருவாக்கும் என்று அவர்கள் தெரிவிக்கின்றனர்.
அதேபோல், குழந்தைகளை மற்றவர்களுடன் அடிக்கடி ஒப்பிடுவது, அதிகமாக திட்டுவது, அவர்கள் பேசும் கருத்துகளுக்கு மதிப்பளிக்காமல் இருப்பது மற்றும் சிறிய தவறுகளுக்குக் கூட கடுமையாக தண்டிப்பது போன்ற செயல்களும் குழந்தைகளின் மனநிலையை பாதிக்கக்கூடும்.
மற்றொரு முக்கிய காரணமாக போதிய தூக்கமின்மை, அதிக நேரம் மொபைல் மற்றும் டேப்லெட் பயன்படுத்துவது, சீரற்ற உணவுப் பழக்கம் மற்றும் உடல் சோர்வு ஆகியவையும் குழந்தைகளின் எரிச்சல் மற்றும் கோபத்தை அதிகரிக்கலாம் என நிபுணர்கள் கூறுகின்றனர்.
குழந்தை கோபப்படும் நேரத்தில் பெற்றோர்களும் கோபமாக பதிலளிப்பதைத் தவிர்க்க வேண்டும். அதற்குப் பதிலாக, அவர்கள் ஏன் கோபப்படுகிறார்கள் என்பதை அமைதியாகக் கேட்டு புரிந்துகொள்ள முயற்சிப்பது நல்ல பலனை தரும். குழந்தைகளை பாராட்டுவது, அவர்களுடன் தினமும் சிறிது நேரம் விளையாடுவது, அவர்களின் கருத்துகளுக்கு முக்கியத்துவம் கொடுப்பது போன்ற பழக்கங்கள் அவர்களின் உணர்ச்சி வளர்ச்சிக்கு உதவும் என்று மருத்துவர்கள் அறிவுறுத்துகின்றனர்.
குழந்தையின் கோபம் தொடர்ந்து அதிகரிப்பது, பள்ளி வாழ்க்கை அல்லது அன்றாட நடவடிக்கைகளை பாதிப்பது போன்ற நிலை ஏற்பட்டால், குழந்தைகள் நல மருத்துவர் அல்லது குழந்தை உளவியல் நிபுணரை அணுகி ஆலோசனை பெறுவது நல்லது என்றும் மருத்துவர்கள் பரிந்துரைக்கின்றனர்.
Also Read: தக்காளி தான் சிறுநீரகக் கல்லுக்கு காரணமா? மருத்துவர்கள் சொல்லும் முக்கிய தகவல்!
