மாதவிடாய் வருவதற்கு சில நாட்களுக்கு முன்பு பெண்களின் உடலிலும் மனநிலையிலும் பல்வேறு மாற்றங்கள் ஏற்படுவது இயல்பானது. வயிறு உப்புசம், மார்பகங்களில் வலி அல்லது இறுக்கம், தலைவலி, சோர்வு, தூக்கத்தில் மாற்றம், மனநிலை மாறுபாடு போன்றவை பல பெண்களுக்கு அந்தக் காலகட்டத்தில் ஏற்படலாம். இந்த அறிகுறிகளை பொதுவாக ‘Premenstrual Syndrome’ எனப்படும் PMS உடன் தொடர்புபடுத்துகின்றனர்.
ஆனால், மாதவிடாய்க்கு முன்பு ஏற்படும் ஒவ்வொரு மாற்றத்தையும் PMS என்று எடுத்துக்கொள்வது சரியானதல்ல. குறிப்பாக, அறிகுறிகள் மிகவும் தீவிரமாக இருந்தாலோ, அன்றாட வாழ்க்கையை பாதித்தாலோ அல்லது மாதவிடாய் முடிந்த பிறகும் தொடர்ந்து இருந்தாலோ அதற்கு வேறு காரணங்கள் இருக்கலாம். இதனால் சில அறிகுறிகளை பெண்கள் அலட்சியம் செய்யாமல் கவனிப்பது அவசியம்.
மருத்துவ நிபுணர் டாக்டர் சோனு கோகார், MBBS, Health and Wellness Expert, பெண்கள் கவனிக்க வேண்டிய சில எச்சரிக்கை அறிகுறிகளை விளக்கியுள்ளார்.
பொதுவாக PMS அறிகுறிகள் மாதவிடாய் தொடங்குவதற்கு ஒரு வாரம் அல்லது இரண்டு வாரங்களுக்கு முன்பாக தோன்றலாம். மாதவிடாய் தொடங்கிய பிறகு அவை படிப்படியாக குறையும். வயிறு உப்புசம், லேசான வயிற்று வலி, தலைவலி, மார்பகங்களில் வலி அல்லது உணர்திறன் அதிகரித்தல், உடல் சோர்வு, தூக்கத்தில் மாற்றம் மற்றும் மனநிலை மாறுபாடு ஆகியவை இதில் அடங்கும்.
சில பெண்களுக்கு அந்த நேரத்தில் இனிப்பு அல்லது உப்பு அதிகம் உள்ள உணவுகளை சாப்பிட வேண்டும் என்ற ஆசையும் அதிகரிக்கலாம். இந்த அறிகுறிகள் ஒவ்வொரு மாதமும் குறிப்பிட்ட காலகட்டத்தில் தோன்றி, மாதவிடாய் தொடங்கிய பிறகு குறைந்துவிட்டால், அவை PMS-ன் வழக்கமான அறிகுறிகளாக இருக்கலாம்.
ஆனால், மனநிலையில் ஏற்படும் மாற்றங்கள் கட்டுப்படுத்த முடியாத அளவுக்கு தீவிரமாக இருந்தால் அதை சாதாரண PMS என்று நினைத்து பொறுத்துக்கொள்ளக்கூடாது. குறிப்பாக கோபம், பதற்றம், கவலை அல்லது மனச்சோர்வு போன்ற உணர்வுகள் ஒவ்வொரு மாதமும் மாதவிடாய்க்கு முன்பு தீவிரமாகி, வேலை, படிப்பு, குடும்ப உறவு அல்லது அன்றாட செயல்பாடுகளை பாதித்தால் மருத்துவரிடம் ஆலோசனை பெறுவது அவசியம்.
மாதவிடாய் காலத்தில் அல்லது அதற்கு முன்பு ஏற்படும் இடுப்பு மற்றும் கீழ் வயிற்று வலிக்கும் கவனம் தேவை. லேசான வலி சிலருக்கு இயல்பாக இருக்கலாம். ஆனால் வலி மிகவும் தீவிரமாக இருந்தாலோ, தொடர்ந்து நீடித்தாலோ, வழக்கமான செயல்பாடுகளை செய்ய முடியாத அளவுக்கு இருந்தாலோ அதை சாதாரண மாதவிடாய் வலி என்று அலட்சியம் செய்யக்கூடாது. Endometriosis, fibroids உள்ளிட்ட சில உடல்நலப் பிரச்சினைகளுடன் இதற்கு தொடர்பு இருக்கலாம்.
அதேபோல், மாதவிடாய்க்கு முன்பு மார்பகங்களில் ஏற்படும் உணர்திறன் அல்லது லேசான வலி சில பெண்களுக்கு இயல்பானது. ஆனால் மார்பகத்தில் புதிதாக கட்டி அல்லது தடிப்பு போன்ற மாற்றம் தோன்றி, மாதவிடாய் முடிந்த பிறகும் அது மறையாமல் இருந்தால் மருத்துவரிடம் பரிசோதனை செய்துகொள்ள வேண்டும்.
மாதவிடாய் தொடர்பான அறிகுறிகளில் கவனிக்க வேண்டியது அவற்றின் தீவிரமும், தொடர்ந்து வரும் முறையும் தான். ஒவ்வொரு மாதமும் ஒரே காலகட்டத்தில் அறிகுறிகள் தோன்றி, மாதவிடாய் தொடங்கியதும் குறைகிறதா என்பதை பெண்கள் கவனித்துக்கொள்ளலாம். அறிகுறிகள் எப்போது தொடங்குகின்றன, எவ்வளவு நாட்கள் நீடிக்கின்றன, அன்றாட வாழ்க்கையில் எந்த அளவுக்கு தாக்கத்தை ஏற்படுத்துகின்றன என்பதையும் பதிவு செய்து வைத்தால் மருத்துவரிடம் ஆலோசனை பெறும்போது உதவியாக இருக்கும்.
அதிக ரத்தப்போக்கு, தாங்க முடியாத மாதவிடாய் வலி, தொடர்ந்து நீடிக்கும் இடுப்பு வலி, தலைச்சுற்றல் போன்ற அறிகுறிகளும் மருத்துவ ஆலோசனை தேவைப்படும் நிலைகளாக இருக்கலாம். குறிப்பாக முன்பு இல்லாத புதிய அறிகுறி திடீரென தோன்றினால் அதை சுயமாக PMS என்று முடிவு செய்யாமல் மருத்துவரை அணுகுவது நல்லது.
பெண்களின் மாதவிடாய் சுழற்சியில் சில உடல் மற்றும் மன மாற்றங்கள் இயல்பானவை என்றாலும், வாழ்க்கைத் தரத்தை பாதிக்கும் அளவுக்கு அவை தீவிரமாகும்போது அதற்கு மருத்துவ கவனம் தேவைப்படுகிறது. PMS குறித்து தெரிந்துகொள்வதுடன், அதற்கு அப்பாற்பட்ட எச்சரிக்கை அறிகுறிகளையும் புரிந்துகொள்வது பெண்களின் உடல்நலத்தை பாதுகாக்க உதவும்.
Also Read: லயோலா கல்லூரிக்கு ரூ.1 கோடி நிதியுதவி.. நூற்றாண்டு விழாவில் 4 புதிய வகுப்பறைகளுக்கு ஏற்பாடு!
