தமிழக சட்டமன்றத்தில் முதலமைச்சர் விஜய் முன்னிலையில் நடைபெற்ற உரையின்போது, உதயநிதி ஸ்டாலின் “சனாதனம் ஒழிக்கப்பட வேண்டும்” என்ற சர்ச்சைக்குரிய நிலைப்பாட்டை மீண்டும் வலியுறுத்தினார். சனாதன தர்மம் குறித்த விவாதம் மீண்டும் அரசியல் மற்றும் சமூக வட்டாரங்களில் தீவிரமடைந்துள்ளது. அது சமூக வலைதளங்களில் வேகமாக பரவி, பல்வேறு தரப்பினரிடையே கடும் எதிர்வினைகளை ஏற்படுத்தியது.
அரசியல் கட்சிகள், பொதுமக்கள் மற்றும் சமூக வலைதள பயனர்கள் என பலரும் இந்த கருத்து குறித்து தங்களது கருத்துகளை வெளிப்படுத்தினர். சனாதன தர்மம் குறித்து உதயநிதி கூறிய கருத்துக்களுக்கு பதிலளிக்கும் விதமாக, முன்னாள் இந்திய கிரிக்கெட் வீரர் லக்ஷ்மன் சிவராமகிருஷ்ணன் சமூக ஊடகங்களில் பதிலடி கொடுத்துள்ளார்.
இந்த சர்ச்சை குறித்து சிவராமகிருஷ்ணன் X தளத்தில் பதிவிட்டதாவது: “பழைய மோட்டாரில் சில பாகங்களை மாற்றி, புதிய வண்ணம் பூசி இளம் பிள்ளைகளை அதிகாரப் பதவியில் அமர வைத்தது. ஆனால், சனாதன தர்மத்தை ஒழிக்கும் செயல் ஒரு துணை முதல்வரின் வெளியேற்றத்திற்குக் காரணமாக அமைந்தது. தயவுசெய்து அதே தவறை நீங்களும் செய்யாதீர்கள், விரைவில் நீங்களும் ஒழிக்கப்படுவீர்கள். நாங்கள் இந்துக்கள் சனாதன தர்மமே மேலானது என்று நம்புகிறோம்.
முன்னாள் லெக்-ஸ்பின்னர் பின்னர் மற்றொரு பதிவைப் பகிர்ந்து, அமைதியையும் சகிப்புத்தன்மையையும் வலியுறுத்தியதோடு, வரம்புகளை மீறிச் செல்ல வேண்டாம் என்றும் எச்சரித்தார். “பொதுவாக, நாம் அமைதியாகவும், உயர் மட்ட சகிப்புத்தன்மையுடனும் இருக்கக் கற்றுக்கொடுக்கப்படுகிறோம். இது ஒரு குறிப்பிட்ட எல்லை வரை நீளும் மீள் தன்மை கொண்டது, ஆனால் அதிகமாக நீட்டினால், அது உடைந்து குழப்பம் ஏற்படலாம். நாம் அனைவரும் அவரவர் நம்பிக்கைகளுடன் அமைதியாக இணைந்து வாழ முடியும்” என்று அவர் எழுதியிருந்தார்.
சனாதன தர்மத்தைப் பின்பற்றுபவர்களிடையே ஒற்றுமைக்கு அழைப்பு விடுத்தார். “எனக்கு ஏற்கனவே இந்துக்களைக் கேலி செய்யும் பதில்கள் வரத் தொடங்கிவிட்டன. நாம் அனைவரும் ஒன்றுபட்டு நின்று, நமது தர்மம் சிதைவின்றி நிலைத்திருப்பதை உறுதி செய்வோம். ஒரு மூங்கில் தண்டை உடைப்பது எளிது, ஆனால் ஒன்றாகச் சேர்ந்த ஒரு பெரிய கொத்தை உடைப்பது கடினம். ஜெய் ஸ்ரீ ராம். பாரத மாதா ஜி ஜெய். கடவுள் நம் பக்கம் இருக்கிறார்,” என்று அவர் பதிவிட்டார்.
இந்த பதிவுகள் இணையத்தில் விரைவாக பரவியதைத் தொடர்ந்து, ஆதரவும் எதிர்ப்பும் என இரு தரப்பிலும் கடும் விவாதங்கள் உருவாகியுள்ளன. இதன் மூலம் சனாதன தர்மம் குறித்த சர்ச்சை மீண்டும் சமூக வலைதளங்களில் பெரிய பேசுபொருளாக மாறியுள்ளது.
Read more: Flash : ஒரே நாளில் ரூ.10,000 உயர்வு.. ஷாக் கொடுத்த வெள்ளி..! அப்ப தங்கம் விலை..?
