2026 பாரா ஆசிய விளையாட்டுப் போட்டிகளில் இந்திய வீரர்கள் தொடர்ந்து வரலாற்றுச் சாதனைகளைப் படைத்து வருகின்றனர். ஆண்களுக்கான 400 மீட்டர் ஓட்டப்பந்தயத்தில் இந்திய வீராங்கனை சந்தீப் சிங் மான் புதிய உலக சாதனையுடன் தங்கப் பதக்கத்தைக் கைப்பற்றினார்.
நகோயா சிட்டி மிசுஹோ பார்க் தடகள மைதானத்தில் நடைபெற்ற T44, T42 மற்றும் T64 பிரிவுகளுக்கான 400 மீட்டர் இறுதிப் போட்டியில், சந்தீப் சிங் 52.28 வினாடிகளில் இலக்கை எட்டி உலக சாதனை படைத்து தங்கம் வென்றார். போட்டியின் தொடக்கம் முதலே முன்னிலை வகித்த அவர், சவுதி அரேபியாவின் அல்சானா நூரின் சவாலை முறியடித்து முதலிடம் பிடித்தார். இவரது இந்த தங்கம் பாரா ஆசிய போட்டிகளில் இந்தியா 100 பதக்கங்களைக் கடக்க உதவியது. இதே போட்டியில் லேன் 5-ல் ஓடிய இந்தியாவின் அஜய் குமார் 53.61 வினாடிகளில் வந்து வெண்கலப் பதக்கம் வென்றார்.
ஈட்டி எறிதலில் இருமுறை உலக சாதனை படைத்த ஹானே!
ஆண்களுக்கான F37/38 ஈட்டி எறிதல் போட்டியில் களமிறங்கிய இந்தியாவின் ஹானே, தனது 5வது முயற்சியில் 59.72 மீட்டர் தூரம் எறிந்து முதன்முதலில் உலக சாதனையை முறியடித்தார். தொடர்ந்து தனது 6வது முயற்சியில் 60.49 மீட்டர் தூரம் எறிந்து, தன் சொந்த சாதனையை தானே முறியடித்து வரலாற்று சிறப்புமிக்க தங்கப் பதக்கத்தை கைப்பற்றினார்.
இதற்கு முன் 2008-ல் சீனாவின் சியா டாங் படைத்த 57.81 மீட்டர் எறிதலே உலக சாதனையாக இருந்தது. F37 பிரிவில் போட்டியிடும் ஹானே, கடந்த ஹாங்சோ ஆசிய விளையாட்டுப் போட்டியிலும் தங்கம் வென்றிருந்தார் என்பது குறிப்பிடத்தக்கது. இவரது இந்த வெற்றியால் இந்தியாவின் தங்கப் பதக்க எண்ணிக்கை 26 ஆக உயர்ந்தது.
பேட்மிண்டனில் நிதேஷ் குமார், நவீன் சிவகுமார் தங்கம் வென்று சாதனை!
பேட்மிண்டன் ஆண்களுக்கான ஒற்றையர் பிரிவில் இந்தியாவுக்கு மேலும் இரண்டு தங்கப் பதக்கங்கள் கிடைத்துள்ளன. SL3 பிரிவின் இறுதிப்போட்டியில், பாரா ஒலிம்பிக்கில் தங்கம் வென்ற இந்திய வீரர்களான நிதேஷ் குமார் மற்றும் பிரமோத் பகத் மோதினர். இதில் 21-18, 21-16 என்ற நேர் செட்களில் பிரமோத் பகத்தை வீழ்த்தி நிதேஷ் குமார் தங்கம் வென்றார்.
கடந்த முறை கைநழுவிய தங்கப் பதக்கத்தை இந்த முறை வென்றது குறித்து நிதேஷ் குமார் மகிழ்ச்சி தெரிவித்தார். அதே சமயம், தொடர்ந்து 3வது முறை தங்கம் வெல்லும் வாய்ப்பை இழந்து வெள்ளியுடன் திருப்தி அடைந்த பிரமோத் பகத் ஏமாற்றம் தெரிவித்தார்.
மற்றொரு பேட்மிண்டன் இறுதிப்போட்டியில் (SL4 பிரிவு), தமிழக வீரர் நவீன் சிவகுமார் இந்தோனேசியாவின் ஃப்ரெடி செதியாவனை 21-9, 21-17 என்ற கணக்கில் வெறும் 36 நிமிடங்களில் வீழ்த்தி அதிரடி வெற்றி பெற்று தங்கம் தட்டினார். இது பாரா ஆசிய விளையாட்டுப் போட்டியில் இந்தியா வென்ற 24வது தங்கப் பதக்கமாகும்.
இதேபோல், 2026 பாரா ஆசிய விளையாட்டுப் போட்டியில் இந்தியத் துப்பாக்கிச் சுடுதல் வீராங்கனை மோனா அகர்வால் இரண்டு தங்கப் பதக்கங்களை வென்று புதிய வரலாறு படைத்துள்ளார். பெண்களுக்கான 10 மீட்டர் ஏர் ரைஃபிள் ஸ்டாண்டிங் SH1 பிரிவில் சக இந்திய வீராங்கனை அவனி லேகராவை வீழ்த்தி முதல் தங்கப் பதக்கத்தைக் கைப்பற்றினார். இதன் மூலம் இப்போட்டியில் இந்தியாவின் முதல் இரண்டு இடங்களையும் இந்திய வீராங்கனைகளே பிடித்தனர். அதனைத் தொடர்ந்து, பெண்களுக்கான 50 மீட்டர் ரைஃபிள் 3 பொசிஷன்ஸ் SH1 பிரிவிலும் தனது நிதானமான ஆட்டத்தை வெளிப்படுத்தி இரண்டாவது தங்கப் பதக்கத்தைத் தட்டினார்.
ஜோத்பூரைப் பூர்வீகமாகக் கொண்ட மோனா அகர்வால், சர்வதேச அளவில் இந்தியாவின் வளர்ந்து வரும் முன்னணி வீராங்கனையாக உருவெடுத்துள்ளார். 2024 பாரீஸ் பாராலிம்பிக் போட்டியில் பெண்களுக்கான 10 மீட்டர் ஏர் ரைஃபிள் ஸ்டாண்டிங் SH1 பிரிவில் வெண்கலப் பதக்கம் வென்றதன் மூலம் இவரது சர்வதேச பயணம் உலக அளவில் கவனம் பெற்றது.
தொடர்ந்து, தென் கொரியாவின் சாங்வோன் நகரில் நடைபெற்ற 2026 WSPS உலக சாம்பியன்ஷிப் போட்டியில் ஒரு தங்கம் மற்றும் ஒரு வெள்ளிப் பதக்கம் வென்றதோடு, 2028 லாஸ் ஏஞ்சலஸ் பாராலிம்பிக் போட்டிக்கான இந்திய அணி இடத்தையும் உறுதியாக்கித் தந்திருந்தார். மேலும், WSPS உலகக் கோப்பைத் தொடர்களில் 2 தங்கம், 2 வெள்ளி மற்றும் 1 வெண்கலப் பதக்கங்களையும் இவர் வென்றுள்ளார்.
இன்றைய தற்போதைய நிலவரத்தின்படி, 27 தங்கம், 33 வெள்ளி, 43 வெண்கலம் என 103 பதக்கங்களுடன் இந்தியா 4வது இடத்தில் உள்ளது.
