ஒரு சிவப்பு நிற சூட்கேஸ்… அதற்குள் இருந்த மனித உடல் பாகங்கள்… இந்த ஒரு தடயம் சென்னை முதல் ஆக்ரா வரை போலீஸாரை அழைத்துச் சென்றது. சூட்கேஸை ரெயிலில் வைத்துச் சென்றவர்கள் யார் என்பதை கண்டுபிடிக்க தொடங்கிய விசாரணை, கூடுவாஞ்சேரியில் உள்ள ஒரு வீட்டை சோதனையிடும் நிலைக்கு கொண்டு சென்றது. அங்கு கிடைத்த மற்றொரு அதிர்ச்சி தடயம், இந்த வழக்கில் கொலை செய்யப்பட்டவரின் அடையாளத்தை வெளிச்சத்துக்கு கொண்டு வந்தது.
கடந்த 5-ம் தேதி சென்னை சென்ட்ரலில் இருந்து தமிழ்நாடு எக்ஸ்பிரஸ் ரெயில் ஆக்ரா சென்றடைந்தது. ரெயிலின் கடைசி பெட்டியில் உரிமை கோரப்படாத சிவப்பு நிற சூட்கேஸ் ஒன்று கிடந்தது. சந்தேகத்தின் பேரில் போலீஸார் அதைத் திறந்து பார்த்தபோது, தலை இல்லாத மனித எலும்புக்கூடு மற்றும் உடலின் சில பாகங்கள் இருந்தன.
இதையடுத்து சூட்கேஸில் இருந்த உடல் பாகங்கள் தடயவியல் ஆய்வுக்கு அனுப்பப்பட்டன. அதேசமயம், இந்த உடல் பாகங்கள் எங்கிருந்து வந்தன என்பதைக் கண்டுபிடிக்க ஆக்ரா போலீஸார் ரெயில் நிலையங்களின் கண்காணிப்பு கேமரா பதிவுகளை ஆய்வு செய்யத் தொடங்கினர்.
சென்னை சென்ட்ரல் ரெயில் நிலையத்தில் கிடைத்த CCTV காட்சிகள்தான் விசாரணையில் முக்கிய திருப்பத்தை ஏற்படுத்தின. ஒரு ஆணும் பெண்ணும் சிவப்பு நிற சூட்கேஸுடன் வந்து, ஆக்ரா செல்லும் ரெயிலின் கடைசி பெட்டியில் அதை வைத்துவிட்டு அங்கிருந்து சென்றது பதிவாகியிருந்தது.
அவர்கள் ரெயிலில் சூட்கேஸை வைத்த பிறகு எங்கு சென்றார்கள் என்பதை அறிய, வழித்தடத்தில் உள்ள ரெயில் நிலையங்களின் CCTV பதிவுகளும் ஆய்வு செய்யப்பட்டன. அதில் இருவரும் கூடுவாஞ்சேரி ரெயில் நிலையத்தில் இறங்கியிருப்பது தெரியவந்தது.
இதன் பின்னர் கூடுவாஞ்சேரி போலீஸார் அந்த இருவரின் அடுத்தடுத்த நடமாட்டத்தை தேடினர். அப்போது அவர்கள் கூடுவாஞ்சேரி மசூதி தெருவில் உள்ள ஒரு வீட்டுக்குச் சென்றது கண்டுபிடிக்கப்பட்டது. அந்த வீடு பூட்டப்பட்டிருந்த நிலையில், போலீஸார் கதவை உடைத்து உள்ளே சென்று சோதனை மேற்கொண்டனர்.
வீட்டுக்குள் சென்ற போலீஸாருக்கு கடுமையான துர்நாற்றம் வீசியது. அங்கு சிவப்பு நிற துணியால் மூடப்பட்டிருந்த பெரிய பாத்திரம் ஒன்று இருந்தது. அதைத் திறந்து பார்த்தபோது, மனித உடலின் சதைப்பகுதிகள் துண்டுகளாக வெட்டப்பட்ட நிலையில் கண்டெடுக்கப்பட்டன. அவற்றில் மைதா மாவு கலக்கப்பட்டிருந்தது. இந்த உடல் பாகங்களையும் போலீஸார் கைப்பற்றி தடயவியல் பரிசோதனைக்கு அனுப்பினர்.
ஆக்ராவில் கிடைத்த உடல் பாகங்களும், கூடுவாஞ்சேரி வீட்டில் கண்டெடுக்கப்பட்ட சதைப்பகுதிகளும் ஒரே நபருடையதா என்ற கேள்விக்கு தடயவியல் பரிசோதனை மூலம் விடை கிடைத்தது. இரண்டும் ஒரே நபருடையவை என்பது உறுதி செய்யப்பட்டது.
தொடர்ந்து நடைபெற்ற விசாரணையில் உயிரிழந்தவர் ஒடிசா மாநிலத்தைச் சேர்ந்த 38 வயதான ஹயாத் நிஷா என்பது அடையாளம் காணப்பட்டது. தாம்பரம் அருகே உள்ள தனியார் ஏற்றுமதி நிறுவனத்தில் பணியாற்றி வந்த அவர், 19 வயது மகனை கொண்டிருந்தார். அவரது மகனும் தாம்பரம் பகுதியில் ஏ.சி. மெக்கானிக்காக வேலை செய்து வந்துள்ளார்.
ஹயாத் நிஷாவின் தனிப்பட்ட வாழ்க்கை தொடர்பான தகவல்களையும் போலீஸார் விசாரித்தனர். இதன் மூலம், அவர் தங்கியிருந்த வீட்டில் கடந்த இரண்டு மாதங்களாக அசாம் மாநிலத்தைச் சேர்ந்த மணிக்உத்தீன் லஸ்கர், 22, மற்றும் ஒடிசாவைச் சேர்ந்த பகவதி மாஜி ஆகியோர் தங்கியிருந்தது போலீஸாரின் கவனத்திற்கு வந்தது.
இருவரையும் தொடர்புபடுத்தும் தகவல்கள் கிடைத்ததைத் தொடர்ந்து, அவர்கள் மீது போலீஸாரின் சந்தேகம் வலுத்தது. கொலைக்குப் பிறகு இருவரும் தமிழ்நாட்டில் இருந்து தப்பிச் சென்றிருக்கலாம் என்ற கோணத்தில் தனிப்படை போலீஸார் அவர்களைத் தேடும் பணியில் ஈடுபட்டனர்.
நாட்கள் கடந்த நிலையில், அவர்கள் மணிப்பூர் மாநிலம் ஜிரிபாம் மாவட்டத்தின் காசிம்பூர் பகுதியில் இருப்பது போலீஸாருக்கு தெரியவந்தது. இதையடுத்து மணிப்பூர் போலீஸாரின் உதவியுடன் அங்கு சென்ற தனிப்படை, மணிக்உத்தீன் லஸ்கர் மற்றும் பகவதி மாஜி ஆகிய இருவரையும் கைது செய்தது.
கைது செய்யப்பட்ட இருவரையும் தமிழகத்திற்கு அழைத்து வருவதற்கான நடவடிக்கைகள் நடைபெற்று வருகின்றன. அவர்களிடம் விசாரணை நடத்திய பிறகே ஹயாத் நிஷா கொலைக்கான காரணம், சம்பவம் நடந்த விதம், உடல் பாகங்களை ரெயில் மூலம் ஆக்ராவுக்கு எடுத்துச் சென்றதன் பின்னணி உள்ளிட்ட பல கேள்விகளுக்கு முழுமையான பதில் கிடைக்கும்.
சென்னையில் ஒரு ரெயில் பெட்டியில் வைக்கப்பட்ட சூட்கேஸில் தொடங்கிய இந்த வழக்கு, CCTV காட்சிகள், கூடுவாஞ்சேரி வீடு, தடயவியல் பரிசோதனை என அடுத்தடுத்த கட்டங்களை கடந்து, தற்போது மணிப்பூரில் இரண்டு பேர் கைது செய்யப்படும் அளவுக்கு சென்றுள்ளது.
Also Read: “ரஜினி சொன்ன அந்த வார்த்தை என்னை பாதிச்சிருச்சு!” மனம் திறந்த ஆர். சுந்தர்ராஜன்!
