பங்குச் சந்தை அபாயம் இல்லாமல் பாதுகாப்பான முதலீட்டைத் தேடும் மக்களிடையே தற்போது தபால் அலுவலக கால வைப்பு (TD) திட்டம் மீண்டும் கவனம் பெற்று வருகிறது. மத்திய அரசின் ஆதரவுடன் செயல்படும் இந்த சேமிப்பு திட்டம், நிலையான வருமானத்தையும் பாதுகாப்பான முதலீட்டையும் ஒரே நேரத்தில் வழங்குவதால் நடுத்தர குடும்பங்களின் முக்கிய தேர்வாக மாறியுள்ளது.
இந்த கால வைப்பு திட்டத்தில், முதலீட்டாளர்கள் தங்களின் பணத்தை 1 ஆண்டு முதல் 5 ஆண்டுகள் வரை நிரந்தர காலத்திற்கு முதலீடு செய்யலாம். அரசாங்க உத்தரவாதம் இருப்பதால் முதலீட்டு தொகைக்கு முழு பாதுகாப்பு கிடைக்கிறது. இதனால் சந்தை ஏற்றத் தாழ்வுகளால் பாதிக்கப்படாத சேமிப்பு திட்டமாக இது பார்க்கப்படுகிறது.
தற்போதைய வட்டி விகிதங்களின்படி, ஓராண்டு கால வைப்பிற்கு 6.9 சதவீதமும், 2 மற்றும் 3 ஆண்டுகளுக்கான வைப்பிற்கு 7 சதவீதமும், 5 ஆண்டுகளுக்கான வைப்பிற்கு அதிகபட்சமாக 7.5 சதவீத வட்டியும் வழங்கப்படுகிறது. இதனால் நீண்டகால முதலீட்டாளர்கள் 5 ஆண்டு திட்டத்தையே அதிகமாக தேர்வு செய்கிறார்கள்.
இந்த திட்டத்தில் ஒருவர் ரூ.2 லட்சம் முதலீடு செய்து 5 ஆண்டுகள் தொடர்ந்தால், முதிர்வு காலத்தில் சுமார் ரூ.2,89,990 வரை பெற முடியும். அதாவது, முதலீட்டு தொகையைத் தவிர சுமார் ரூ.89,990 வரை வட்டி வருமானமாக கிடைக்கும். எந்தவித அபாயமும் இல்லாமல் ரூ.90 ஆயிரம் வரை கூடுதல் வருமானம் கிடைப்பது இந்த திட்டத்தின் முக்கிய அம்சமாக பார்க்கப்படுகிறது.
இந்த திட்டத்தில் குறைந்தபட்சமாக ரூ.1,000 முதலீடு செய்தே கணக்கைத் தொடங்கலாம். அதிகபட்ச முதலீட்டிற்கு எந்த வரம்பும் இல்லை. தனிநபர் கணக்கு, கூட்டுக் கணக்கு மற்றும் 10 வயதுக்கு மேற்பட்ட குழந்தைகளின் பெயரிலும் கணக்கைத் திறக்கலாம். மேலும், 5 ஆண்டு கால வைப்பு திட்டத்தில் முதலீடு செய்பவர்கள் வருமான வரிச் சட்டத்தின் 80C பிரிவின் கீழ் வரி விலக்கு பலனையும் பெறலாம். இதன் மூலம் சேமிப்புடன் வரிச் சலுகையும் கிடைக்கிறது.
ஆனால், கணக்கைத் தொடங்கிய முதல் 6 மாதங்களுக்குள் பணத்தை எடுக்க முடியாது. முதிர்வுத் தேதிக்கு முன்பு பணத்தை திரும்பப் பெற்றால், வட்டியில் 1 சதவீதம் வரை பிடித்தம் செய்யப்படலாம். எனவே, நீண்டகால முதலீடாக தொடர்ந்து வைத்திருப்பவர்களுக்கு முழு வட்டி பலனும் கிடைக்கும் என நிதி ஆலோசகர்கள் தெரிவிக்கின்றனர்.
Read more: “அமைச்சர் பதவிக்காக தவெகவுக்கு ஆதரவு கொடுக்கல..!” மெளனம் கலைத்த எஸ்.பி.வேலுமணி..
