BRICS நாடுகள் உலக மக்கள் தொகையில் சுமார் பாதியையும், உலகளாவிய மொத்த உள்நாட்டு உற்பத்தியில் (GDP) 40 சதவீதத்தையும், உலக வர்த்தகத்தில் 25 சதவீதத்தையும் பிரதிநிதித்துவப்படுத்துவதாக மத்திய வர்த்தக அமைச்சர் பியூஷ் கோயல் தெரிவித்துள்ளார்.
பிரிக்ஸ் வர்த்தக மன்றத்தில், பியூஷ் கோயல் மற்றும் எஸ். ஜெய்சங்கர் ஆகியோர் வர்த்தகத்தை அதிகரித்தல், சந்தைகளைத் திறந்துவிடுதல், விநியோகச் சங்கிலிகளை வலுப்படுத்துதல் மற்றும் உலகளாவிய பொருளாதார சவால்களை எதிர்கொள்ளுதல் ஆகியவற்றின் முக்கியத்துவத்தை வலியுறுத்தினர்.
அமெரிக்காவின் சுங்கவரி அச்சுறுத்தல்கள் மற்றும் மேற்கு ஆசியாவில் நிலவும் பதற்றங்களுக்கு மத்தியில், புது தில்லியில் நடைபெற்ற பிரிக்ஸ் வர்த்தக மன்றத்தில், உறுப்பு மற்றும் கூட்டாளர் நாடுகளுக்கு இடையிலான வர்த்தகத்தை மேலும் வலுப்படுத்த வேண்டியதன் அவசியத்தை இந்தியா வலியுறுத்தியது.
அப்போது பேசிய மத்திய வர்த்தக அமைச்சர் பியூஷ் கோயல், இந்த அமைப்பிற்கு இடையிலான வர்த்தகத்தில் இந்தியா முக்கிய பங்கு வகிப்பதுடன், பொறியியல் பொருட்கள் மற்றும் எலெக்ட்ரானிக்ஸ் துறையில் ஏற்றுமதியை அதிகரித்து வருகிறது. மேலும், “உலகின் மருந்தகம்” என்று அழைக்கப்படும் இந்தியா, BRICS நாடுகளுக்கு நம்பகமான முறையில் மருந்துகளை விநியோகம் செய்யும் ஆற்றல் கொண்டது என்றும் அவர் சுட்டிக்காட்டினார்.
உறுப்பு நாடுகளுக்கு இடையிலான வர்த்தகத்தை அதிகரிக்க வரிகளை மட்டுமே குறைப்பது தீர்வாகாது என்றும், பல்வேறு நாடுகளின் வர்த்தக விதிமுறைகள் மற்றும் நடைமுறைகளை எளிமையாக்குவதே அவசியம் என்றும் கோயல் வலியுறுத்தினார். வணிகர்கள் எளிதாகப் பொருட்களை அனுப்ப ஏதுவாக, துறைமுகங்கள் மற்றும் எல்லையோரச் சரக்கு அனுமதி நேரத்தைக் குறைக்க வேண்டும். கச்சாப் பொருட்கள் மற்றும் முக்கிய கனிமங்களின் சந்தை அணுகலை மேம்படுத்துவதுடன், பரஸ்பர இருதரப்பு வர்த்தகத்தை அதிகரித்து வலுவான விநியோகச் சங்கிலியை உருவாக்க வேண்டும் என்றும் அவர் கோரிக்கை விடுத்தார்.
வெளியுறவுத் துறை அமைச்சர் எஸ். ஜெய்சங்கர் தனது உரையில், BRICS அமைப்பு தொடங்கப்பட்டு 20 ஆண்டுகள் நிறைவடையும் இந்த வேளையில், அதன் உறுப்பினர்கள் மற்றும் ஒத்துழைப்பு முறைகள் கணிசமாக வளர்ச்சியடைந்துள்ளதாகக் குறிப்பிட்டார். இந்தியாவின் தலைமையின் கீழ் மீள்தன்மை, புதுமை, ஒத்துழைப்பு மற்றும் நிலைத்தன்மை ஆகியவற்றுக்குச் சிறப்பு முக்கியத்துவம் அளிக்கப்பட்டு வருகிறது.
புவிசார் அரசியல் பதற்றங்கள் மற்றும் காலநிலை மாற்றங்கள் உலகப் பொருளாதாரத்தைப் பாதித்து வரும் சூழலில், வேகமான டிஜிட்டல் மயமாக்கல் புதிய வளர்ச்சிப் பாதைகளை உருவாக்கி வருவதாக ஜெய்சங்கர் தெரிவித்தார். வணிக நடைமுறைகளை எளிதாக்குதல் மற்றும் வலுவான விநியோகச் சங்கிலியை உருவாக்குவதன் மூலமே தற்போதைய உலகளாவிய பொருளாதாரச் சவால்களை எதிர்கொள்ள முடியும் என்பதே இந்தியாவின் முதன்மைச் செய்தியாக அமைந்தது.
