டெல்லியில் இருந்து சென்னைக்கு வந்துகொண்டிருந்த இண்டிகோ விமானத்தில் ஏற்பட்ட தீ விபத்து பரபரப்பை ஏற்படுத்தியுள்ளது. பயணியின் பவர் பேங்கில் ஏற்பட்ட கோளாறு காரணமாக, விமானத்தின் மேல்புறப் பயணப் பைகள் வைக்கும் பகுதியில் புகை மற்றும் தீப்பற்றியதை அடுத்து, விமானம் ஹைதராபாத்துக்குத் திருப்பிவிடப்பட்டது. இந்தச் சம்பவத்தில் பயணிகள் மற்றும் விமானப் பணியாளர்கள் அனைவரும் பாதுகாப்பாக உள்ளனர்.
அக்டோபர் 11-ம் தேதி, இண்டிகோ நிறுவனத்தின் 6E 6115 விமானம் டெல்லியில் இருந்து சென்னைக்கு இயக்கப்பட்டது. பிற்பகல் 1.10 மணிக்குப் புறப்படத் திட்டமிடப்பட்டிருந்த விமானம், 1.30 மணிக்குப் புறப்பட்டது. சென்னை விமான நிலையத்தை மாலை 4 மணிக்கு வந்தடைய வேண்டிய நிலையில், விமானத்துக்குள் ஏற்பட்ட திடீர் தீப்பற்றல் காரணமாகப் பயணம் திசைமாறியது.
விமானத்தின் மேல்புறப் பகுதியில் புகை வெளியேறியதைக் கவனித்த பயணிகள் பதற்றமடைந்தனர். அப்போது, சில பயணிகள் தங்களது பைகளைக் கொண்டு தீயை அணைக்க முயற்சி செய்தனர். இந்தக் காட்சிகளைப் பயணி ஒருவர் தனது மொபைல் போனில் பதிவு செய்துள்ளார். தற்போது அந்த வீடியோ வெளியாகி கவனம் பெற்றுள்ளது.
இதற்கிடையே, விமானப் பணியாளர்கள் தீயணைப்புக் கருவிகளைப் பயன்படுத்தி தீயைக் கட்டுக்குள் கொண்டு வந்தனர். முன்னெச்சரிக்கை நடவடிக்கையாக விமானம் ஹைதராபாத்தில் உள்ள ராஜீவ் காந்தி சர்வதேச விமான நிலையத்தில் பாதுகாப்பாகத் தரையிறக்கப்பட்டது.
இதுகுறித்து இண்டிகோ நிறுவனம் வெளியிட்ட அறிக்கையில், பயணி ஒருவரின் தனிப்பட்ட மின்னணு சாதனத்திலிருந்து புகை வெளியேறியதையடுத்து, விமானம் ஹைதராபாத்துக்குத் திருப்பிவிடப்பட்டதாகத் தெரிவித்தது. விமானப் பணியாளர்கள் உடனடியாகச் செயல்பட்டு நிலைமையைக் கட்டுக்குள் கொண்டுவந்ததாகவும், பயணிகள் மற்றும் ஊழியர்கள் அனைவரும் பாதுகாப்பாக இருப்பதாகவும் குறிப்பிட்டது.
சென்னைக்குச் செல்ல வேண்டிய பயணிகள் தங்கள் பயணத்தைத் தொடர மாற்று விமானம் ஏற்பாடு செய்யப்பட்டது. ஏற்பட்ட சிரமத்துக்கு வருத்தம் தெரிவித்த இண்டிகோ நிறுவனம், பயணிகளுக்கு உணவு மற்றும் குளிர்பானங்கள் வழங்குவதுடன், தொடர்ந்து தகவல்களையும் அளித்து வருவதாகக் குறிப்பிட்டது.
Also Read: மாநில அளவிலான சிலம்பாட்டப் போட்டி.. 21 தங்கப் பதக்கங்களை அள்ளிய சென்னை பெண்கள் அணி!
