ஒவ்வொரு பெற்றோருக்கும் தங்கள் குழந்தை தன்னம்பிக்கையுடனும், பொறுப்புடனும், அன்புடனும் வளர வேண்டும் என்பதே விருப்பமாக இருக்கும். ஆனால் குழந்தைகளை வளர்ப்பது எளிதான காரியம் அல்ல. பெற்றோர்கள் இயல்பாக கடைப்பிடிக்கும் சில பழக்கங்கள், குழந்தைகளின் நடத்தை மற்றும் சிந்தனையில் எதிர்பார்த்ததைவிட அதிக தாக்கத்தை ஏற்படுத்தக்கூடும்.
குழந்தை சமீப காலமாக பிடிவாதமாக நடந்து கொள்வது, பெற்றோரிடம் பேசுவதைத் தவிர்ப்பது அல்லது தனியாக முடிவெடுக்கத் தயங்குவது போன்ற மாற்றங்கள் தெரிந்தால், குழந்தையின் நடத்தையை மட்டும் கவனிப்பதைவிட வீட்டில் பின்பற்றப்படும் ஒழுக்க முறைகள் மற்றும் பெற்றோர்-குழந்தை இடையேயான உரையாடல் எப்படி இருக்கிறது என்பதையும் கவனிக்க வேண்டியது அவசியம்.
குழந்தையின் முன்பு பெற்றோர் இருவரும் ஒரு விஷயத்தில் மாறுபட்ட முடிவுகளை எடுப்பது குழப்பத்தை ஏற்படுத்தலாம். உதாரணமாக, தாய் ஏதேனும் ஒரு விஷயத்துக்கு அனுமதி மறுத்ததும், தந்தை உடனடியாக அதற்கு சம்மதித்தால், குழந்தை தனக்கு சாதகமான பதிலை யார் வழங்குவார்கள் என்பதைப் பார்த்து அவர்களை அணுகும் பழக்கத்தை வளர்த்துக்கொள்ளலாம். கூட்டுக்குடும்பங்களில் தாத்தா, பாட்டி உள்ளிட்ட மற்ற குடும்ப உறுப்பினர்களும் குழந்தை வளர்ப்பில் தலையிடும்போது இந்த நிலை மேலும் சிக்கலாகலாம். பெற்றோர் எல்லா விஷயங்களிலும் ஒரே கருத்தில் இருக்க வேண்டிய அவசியமில்லை. ஆனால் குழந்தை தொடர்பான முக்கியமான விதிகள் மற்றும் எல்லைகளை இருவரும் தனியாக விவாதித்து, குழந்தையிடம் ஒரே மாதிரியான அணுகுமுறையை கடைப்பிடிப்பது தெளிவான வழிகாட்டுதலை வழங்கும்.
குழந்தையை பாதுகாப்பாக வைத்திருக்க வேண்டும் என்ற எண்ணத்தில் பெற்றோர்கள் அதிகப்படியான கட்டுப்பாட்டை விதிப்பதும் மற்றொரு பிரச்சினையாக இருக்கலாம். காயம் ஏற்படும், தோல்வியடையும் அல்லது தவறு செய்துவிடும் என்ற அச்சத்தில் குழந்தைகள் புதிய விஷயங்களை முயற்சி செய்வதையே சில பெற்றோர்கள் தடுக்கின்றனர். இதனால் காலப்போக்கில் குழந்தைகள் சொந்தமாக முடிவெடுக்கவும், பிரச்சினைகளை சமாளிக்கவும் தயங்கும் நிலை உருவாகலாம். வயதுக்கு ஏற்ற சுதந்திரத்தை வழங்குவதன் மூலம், பெற்றோரின் வழிகாட்டுதலுடன் குழந்தைகள் அனுபவத்தின் மூலம் பல விஷயங்களை கற்றுக்கொள்ள முடியும்.
அதேபோல், குழந்தை செய்யும் ஒவ்வொரு செயலுக்கும் பரிசு வழங்குவதை வழக்கமாக்குவதும் கவனிக்க வேண்டிய ஒன்றாகும். பணம், பொம்மை அல்லது வேறு ஏதேனும் பரிசு கிடைக்கும் என்ற எதிர்பார்ப்பில் மட்டுமே அன்றாட பொறுப்புகளை குழந்தைகள் செய்யத் தொடங்கினால், ஒவ்வொரு செயலுக்கும் ஏதாவது கிடைக்க வேண்டும் என்ற எண்ணம் உருவாகலாம். அதற்கு பதிலாக, குழந்தையின் முயற்சியை பாராட்டுவது, பொறுப்பை உணர்த்துவது மற்றும் அவர்களின் செயலுக்கு உரிய அங்கீகாரம் வழங்குவது நல்ல பழக்கங்களை வளர்க்க உதவும். சில வேலைகள் பரிசுக்காக அல்ல; பொறுப்பான மனிதராக இருப்பதன் ஒரு பகுதியாக செய்ய வேண்டியவை என்பதை குழந்தைகள் புரிந்துகொள்ள வேண்டும்.
குழந்தைகள் தங்களது கருத்துகளைப் பகிர்வதற்கு போதுமான வாய்ப்பு வழங்கப்படுவதும் முக்கியம். அவர்கள் பேசும்போது இடையில் குறுக்கிடுவது, சொல்வதை அலட்சியப்படுத்துவது அல்லது தங்களது தரப்பை விளக்குவதற்குள் உடனடியாக கண்டிப்பது போன்ற பழக்கங்கள் இருந்தால், நாளடைவில் குழந்தைகள் தங்கள் பிரச்சினைகளை பெற்றோரிடம் பகிர்ந்து கொள்வதையே தவிர்க்கலாம்.
குழந்தையின் நடத்தை தவறாக இருந்தாலும், முதலில் என்ன நடந்தது என்பதை அவர்களிடம் கேட்டு தெரிந்துகொள்வது நம்பிக்கையை வளர்க்கும். தவறை சுட்டிக்காட்டுவதற்கு முன்பு குழந்தையின் விளக்கத்தைக் கேட்பது, பெற்றோர் தங்களை புரிந்துகொள்ள முயற்சி செய்கிறார்கள் என்ற நம்பிக்கையை அவர்களுக்கு ஏற்படுத்தும்.
குழந்தையின் நடத்தையை கட்டுப்படுத்த பயம் அல்லது குற்ற உணர்வை அதிகமாக பயன்படுத்துவதும் நீண்ட காலத்தில் சரியான அணுகுமுறையாக இருக்காது. மிரட்டல், அவமானப்படுத்துதல் அல்லது அதிகப்படியான குற்ற உணர்வை ஏற்படுத்துவது குழந்தையை அந்த நேரத்தில் கீழ்ப்படியச் செய்யலாம். ஆனால் ஒரு செயல் ஏன் தவறானது என்பதை அது கற்றுக்கொடுப்பதில்லை.
எனவே, பயமுறுத்தும் அல்லது அவமானப்படுத்தும் வார்த்தைகளுக்குப் பதிலாக, ஒரு செயலுக்கு ஏற்படும் விளைவுகளை தெளிவாக விளக்கி, வயதுக்கு ஏற்ற நியாயமான எல்லைகளை பெற்றோர் அமைக்கலாம். தண்டனையைப் பற்றிய பயத்தால் குழந்தை நடந்து கொள்வதைவிட, என்ன எதிர்பார்க்கப்படுகிறது என்பதை புரிந்துகொண்டு செயல்படுவது நல்ல பழக்கங்களை உருவாக்க உதவும்.
ஒவ்வொரு குழந்தையும் தனித்துவமானவர்கள் என்பதால், எல்லா குழந்தைகளுக்கும் ஒரே மாதிரியான பெற்றோர் அணுகுமுறை பொருந்தாது. குழந்தையின் வயது, குணம் மற்றும் தேவைகளுக்கு ஏற்ப பெற்றோர் தங்களது அணுகுமுறையை மாற்றிக்கொள்ள வேண்டியிருக்கும். சரியான பெற்றோராக இருக்க வேண்டும் என்பதைக் காட்டிலும், தெளிவான எல்லைகள், திறந்த உரையாடல், வயதுக்கு ஏற்ற சுதந்திரம் மற்றும் உணர்வுப்பூர்வமான ஆதரவை வழங்குவது குழந்தையின் தன்னம்பிக்கையான வளர்ச்சிக்கு முக்கியமான அடித்தளமாக அமையும்.
Also Read: உடற்பயிற்சி செய்கிறீர்களா? இளைஞர்களை தாக்கும் நுரையீரல் புற்றுநோய்!. கவனிக்க வேண்டிய அறிகுறிகள்!
