சூர்யா – த்ரிஷா கிருஷ்ணன் நடித்த “கருப்பு” திரைப்படம் உலகம் முழுவதும் இன்று வெளியாகி ரசிகர்களிடையே மிகப்பெரிய வரவேற்பைப் பெற்றுள்ளது. முதலில் மே 14ஆம் தேதி வெளியாக இருந்த இப்படம், கடைசி நேர நிதி மற்றும் தொழில்நுட்ப சிக்கல்கள் காரணமாக ஒரு நாள் தாமதமாக மே 15ஆம் தேதி காலை முதல் காட்சிகளுடன் திரையரங்குகளில் வெளியானது.
திரைப்படத்தின் முதல் நாள் முதல் காட்சி ரசிகர்களிடையே பெரும் உற்சாகத்தை ஏற்படுத்தியுள்ளது. குறிப்பாக இடைவேளை காட்சி திரையிடப்பட்டபோது திரையரங்குகள் முழுவதும் ரசிகர்களின் ஆரவாரம் ஒலித்ததாக கூறப்படுகிறது. சமூக வலைதளங்களில் ரசிகர்கள் தங்களது கருத்துகளை பகிர்ந்து வருகிறார்கள்.
பல ரசிகர்கள் படத்தின் ஆக்ஷன் காட்சிகளை “KGF” படத்துடன் ஒப்பிட்டு பாராட்டி வருகின்றனர். குறிப்பாக மெட்ரோ ரயில் சண்டைக் காட்சி மற்றும் “வேரப்பா” பாடல் இடம்பெறும் சண்டைக் காட்சிகள் ரசிகர்களிடையே அதிக வரவேற்பைப் பெற்றுள்ளன. “மாஸ், எநர்ஜி, பவர் எல்லாம் சேர்ந்து கலக்கியிருக்கிறது” என ரசிகர்கள் கருத்து தெரிவித்து வருகின்றனர்.
இந்த ஆண்டின் மிகப்பெரிய திரையரங்கு கொண்டாட்ட படங்களில் ஒன்றாக “கருப்பு” மாறும் என ரசிகர்கள் சமூக வலைதளங்களில் கூறி வருகின்றனர். மேலும், நடிகராக இருந்து அரசியல்வாதியாக மாறி தற்போது தமிழக முதலமைச்சராக உள்ள ஜோசப் விஜய்க்கு படத்தில் “Special Thanks” அட்டை இடம்பெற்றிருப்பதும் ரசிகர்களின் கவனத்தை ஈர்த்துள்ளது. இதனால் விஜய் ரசிகர்களும் சமூக வலைதளங்களில் படத்தை ஆதரித்து பதிவுகள் வெளியிட்டு வருகின்றனர்.
கருப்பு வெளியீடு தாமதத்திற்கு என்ன காரணம்?
இதற்கிடையில், படத்தின் வெளியீடு ஏன் தாமதமானது என்பது குறித்த தகவல்களும் வெளியாகியுள்ளன. தயாரிப்பாளர் எஸ்.ஆர். பிரபு தலைமையிலான ட்ரீம் வாரியர் பிக்சர்ஸ் நிறுவனத்துடன் தொடர்புடைய நிதிச் சிக்கல்கள் காரணமாக இந்த தாமதம் ஏற்பட்டதாக கூறப்படுகிறது. சுமார் 50 கோடி ரூபாய்க்கும் அதிகமான நிலுவைத் தொகை தொடர்பான பிரச்சினைகள் வெளியீட்டுக்கு முன்பு உருவாகியிருந்ததாக திரையுலக வட்டாரங்கள் தெரிவிக்கின்றன.
மேலும், முந்தைய திரைப்படங்களின் நஷ்டம் தொடர்பாக சில விநியோகஸ்தர்கள், திரையரங்கு உரிமையாளர்கள் மற்றும் நிதியளிப்பவர்கள் நிலுவைத் தொகையை கேட்டதாகவும் தகவல்கள் வெளியாகியுள்ளன. இதனுடன், சென்னை அருகே உள்ள ஈவிபி ஸ்டுடியோஸ் தொடர்பான கட்டண பிரச்சினைகளும் வெளியீட்டில் பாதிப்பை ஏற்படுத்தியதாக கூறப்படுகிறது. இருப்பினும் அனைத்து சிக்கல்களையும் கடந்து “கருப்பு” திரைப்படம் வெளியாகியுள்ள நிலையில், ரசிகர்களின் முதல் நாள் வரவேற்பு படக்குழுவிற்கு மிகப்பெரிய நிம்மதியை அளித்துள்ளது.
Read more: உங்களுக்கு அதிகமாக வியர்க்கிறதா? உடலில் இந்த ஊட்டச்சத்து குறைபாடு இருக்கலாம்! கவனமாக இருங்க..!
