சக மாணவிகள் ராகிங் செய்ததால், மனமுடைந்த மாணவி தூக்கிட்டு தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது.
ஒடிசா மாநிலம் புவனேஸ்வரில் உள்ள பிரபல கல்லூரியில் முதலாம் ஆண்டு படிக்கும் 19 வயது மாணவி, கல்லூரி விடுதியில் தூக்கிட்டு தற்கொலை செய்துகொண்டார். இதையடுத்து, தகவலின் பேரில் போலீசார் சம்பவ இடத்திற்கு சென்று மாணவியில் உடலை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். மாணவி தற்கொலை செய்து கொள்ளும் முன் கைப்பட எழுதிய கடிதம் ஒன்றையும் போலீசார் கைப்பற்றினர். அந்த கடிதத்தில், தன்னுடன் படிக்கும் சீனியர் மாணவிகள் 3 பேர் தன்னை ராகிங் செய்து, மனரீதியாக மிகவும் துன்புறுத்தினர். இதனால், தன்னால் படிப்பில் கவனம் செலுத்த முடியவில்லை என்று அவர் குறிப்பிட்டிருந்தார். ஆனால், அவர் யாருடைய பெயரையும் குறிப்பிடவில்லை.
இதையடுத்து, ராகிங் செய்த 3 மாணவிகளும் விடுதியில் தங்கியுள்ளவர்களா என விசாரித்து வருகின்றனர். இதுகுறித்து கல்லூரி முதல்வர் கூறுகையில், ”கல்லூரியில் நடந்த ராகிங் சம்பவம் குறித்து தனக்கு தெரியாது என்றும், மாணவி அப்படி எந்த புகாரும் தெரிவிக்கவில்லை என்றும் கூறினார். இதற்கிடையே, கட்டாக்கில் தங்கியுள்ள அவரது தாயார் புவனேஸ்வரில் உள்ள படகடா காவல் நிலையத்தில், முறையான விசாரணை நடத்தி தனது மகளின் மரணத்திற்கு காரணமான 3 பேரையும் கைது செய்ய வேண்டும் என்று புகார் அளித்தார். இந்த சம்பவம் தொடர்பாக போலீசார் வழக்குப்பதிவு செய்து விசாரித்து வருகின்றனர்.
