பீகார் மாநிலம் ஜமுய் சதர் அரசு மருத்துவமனையில், தாய் மற்றும் பச்சிளம் குழந்தை உயிரிழந்த சம்பவம் பெரும் பரபரப்பை ஏற்படுத்தியுள்ளது. மருத்துவமனையில் தேவையான நேரத்தில் சிகிச்சை கிடைக்காததே இந்த துயரத்திற்கு காரணம் என உறவினர்கள் குற்றம் சாட்டியுள்ளனர்.
பிரசவத்துக்காக மருத்துவமனையில் அனுமதிக்கப்பட்ட பெண்ணுக்கு குழந்தை பிறந்த நிலையில், அடுத்த சில மணி நேரங்களில் இருவரின் உடல்நிலையும் கவலைக்கிடமாக மாறியுள்ளது. குழந்தை பிறந்து சுமார் 6 மணி நேரத்துக்குள் தாயும் குழந்தையும் உயிரிழந்தனர்.
பிரசவத்தின்போது மருத்துவமனையில் பெண் மருத்துவர் பணியில் இல்லை என்றும், அவசரமான சூழ்நிலையில் உரிய மருத்துவ கண்காணிப்பு கிடைக்கவில்லை என்றும் குடும்பத்தினர் புகார் தெரிவித்துள்ளனர். மருத்துவக் குழுவின் கவனக்குறைவே உயிரிழப்புக்கு காரணம் என அவர்கள் நேரடியாக குற்றம்சாட்டினர்.
இதையடுத்து உறவினர்கள் மருத்துவமனை நிர்வாகத்துக்கு எதிராக போராட்டத்தில் ஈடுபட்டனர். உயிரிழந்த தாய் மற்றும் குழந்தையின் உடல்களை மருத்துவமனை வளாகத்திலேயே வைத்து, இரவு முழுவதும் தங்கள் எதிர்ப்பை பதிவு செய்தனர். இதனால் மருத்துவமனை பகுதியில் பதற்றமான சூழல் நிலவியது.
சம்பவம் தொடர்பாக மருத்துவமனை நிர்வாகம் விசாரணையை தொடங்கியுள்ளது. பணியில் இருந்த மருத்துவர்கள் மற்றும் ஊழியர்களின் செயல்பாடுகள் ஆய்வுக்கு உட்படுத்தப்பட்டுள்ளன. விசாரணையில் தவறு உறுதி செய்யப்பட்டால் சம்பந்தப்பட்டவர்கள் மீது நடவடிக்கை எடுக்கப்படும் என நிர்வாகம் தெரிவித்துள்ளது.
தாய் மற்றும் குழந்தை அடுத்தடுத்து உயிரிழந்த சம்பவம் ஜமுய் பகுதியில் அதிர்ச்சியை ஏற்படுத்தியுள்ள நிலையில், மருத்துவமனையில் அந்த நேரத்தில் நடந்தது என்ன என்பது குறித்த விசாரணை முக்கியத்துவம் பெற்றுள்ளது.
Also Read: உங்களுக்கு புற்றுநோய் வருமா? 8 ஆண்டுகளுக்கு முன்பே தெரிந்து கொள்ளலாம்? எப்படி தெரியுமா?
