இந்தியாவில் கோடிக்கணக்கான பயனர்களை கொண்டுள்ள மெட்டா நிறுவனத்தின் வாட்ஸ்அப் செயலி, தனது பயனர்களின் வசதிக்காக புதிய அம்சங்களை அவ்வப்போது சோதித்து அறிமுகப்படுத்தி வருகிறது. அந்த வகையில், வாட்ஸ்அப் சேட்களில் மெசேஜ்களை நாம் விரும்பும் நேரத்தில் செல்லும்படி நேரம் குறித்து வைக்கும் (Schedule Messages) புதிய வசதியைச் சோதித்து வருவதாகத் தகவல்கள் வெளியாகியுள்ளன.
இந்த வசதியின் மூலம் உரைச் செய்திகள் (Text messages) மட்டுமின்றி புகைப்படங்கள், வீடியோக்கள், லிங்க்குகள் மற்றும் ஆவணங்கள் போன்ற மீடியாக்களையும் ஷெடியூல் செய்ய முடியும்.
என்னென்ன சிறப்பம்சங்கள்?
இன்டர்நெட் இல்லாவிட்டாலும் மெசேஜ் செல்லும்: ‘WABetaInfo’ தகவல்படி, நீங்கள் ஒரு மெசேஜை ஷெடியூல் செய்துவிட்டால், அந்த குறிப்பிட்ட நேரத்தில் உங்களது ஸ்மார்ட்போன் இன்டர்நெட் இணைப்பில் (Offline) இல்லாவிட்டாலும் மெசேஜ் தானாகச் சென்றுவிடும்.
குரூப் சேட்களுக்கும் பொருந்தும்: தனிநபர் சேட்கள் மட்டுமின்றி, குரூப் சேட்களிலும் (Group chats) இந்த ஷெடியூல் வசதியைப் பயன்படுத்த முடியும்.
பயன்படுத்தும் முறை: நீங்கள் அனுப்ப விரும்பும் மெசேஜை டைப் செய்து, ‘Send’ பட்டனை அழுத்திப் பிடிப்பதன் (Tap & Hold) மூலம் தோன்றும் விருப்பங்களில் தேவையான தேதி மற்றும் நேரத்தைத் தேர்வு செய்து கொள்ளலாம். புகைப்படங்கள் மற்றும் வீடியோக்களுக்கும் கேலரி ஆப்ஷனில் இதே முறையைப் பயன்படுத்தலாம்.
நினைவூட்டல்கள் மற்றும் வாழ்த்துகளுக்குப் பயன்படும்: பிறந்தநாள் வாழ்த்துகள், கூட்டங்களுக்கான அழைப்புகள் (Meeting invites) மற்றும் நிகழ்வு லிங்க்குகளை முன்கூட்டியே திட்டமிட்டு அனுப்ப இது மிகவும் உதவியாக இருக்கும்.
தனிப் பிரிவு (Dedicated Tab): சேட் பகுதிக்குள் ஷெடியூல் செய்யப்பட்ட மெசேஜ்களைப் பார்க்கவும், திருத்தவும் அல்லது நீக்கவும் “Scheduled messages” என்ற தனிப் பிரிவு வழங்கப்படும் என எதிர்பார்க்கப்படுகிறது.
ரகசியத்தன்மை: நீங்கள் ஷெடியூல் செய்த மெசேஜை அது செல்வதற்கு முன்பாக நீக்கினால் (Delete), அதைப்பற்றிய எந்த அறிவிப்பும் (Notification) பெறுநருக்குச் செல்லாது.
தற்போது ஆண்ட்ராய்டு பீட்டா (Android Beta 2.26.40.7) பதிப்பைப் பயன்படுத்தும் சில பயனர்களுக்கு இந்த அம்சம் சோதனை முறையில் வழங்கப்பட்டு வருகிறது. வரும் வாரங்களில் இது அனைத்து பயனர்களின் பயன்பாட்டிற்கும் படிப்படியாகக் கொண்டுவரப்படும் என எதிர்பார்க்கப்படுகிறது.
