காலையில் அவசரமாக காலை உணவை தயாரிக்க வேண்டிய சூழல் வந்துவிட்டதா? ஆனால் வீட்டில் இட்லி மாவு இல்லையா? கவலைப்பட வேண்டாம். உங்கள் வீட்டில் அவல் இருந்தாலே போதும். அதைக் கொண்டு மிக எளிதாக, மென்மையான மற்றும் சுவையான அவல் இட்லியை செய்து அசத்தலாம். இதற்கு காரசாரமான தக்காளி சட்னி சேர்த்துச் சாப்பிட்டால் சுவை இன்னும் அட்டகாசமாக இருக்கும்.
மேலும், அவல் குறைந்த கிளைசீமிக் இன்டெக்ஸ் (Low Glycemic Index) கொண்ட உணவாக இருப்பதால், ரத்த சர்க்கரை அளவு வேகமாக உயர்வதைத் தடுக்க உதவக்கூடும். எனவே, சர்க்கரை நோயாளிகள் மருத்துவர் அல்லது ஊட்டச்சத்து நிபுணரின் ஆலோசனையின்படி, அளவோடு காலை உணவாக இதை எடுத்துக் கொள்ளலாம். இந்த அவல் இட்லி மற்றும் தக்காளி சட்னியை வீட்டிலேயே எப்படி செய்வது என்று பார்க்கலாம்.
தேவையான பொருட்கள்:
அவல் இட்லிக்கு:
அவல் – 1 கப்
லேசாக புளித்த தயிர் – 1 கப்
தண்ணீர் – தேவையான அளவு
எண்ணெய் – 1 டேபிள் ஸ்பூன்
கடுகு – 1 டீஸ்பூன்
உளுத்தம் பருப்பு – 1 டீஸ்பூன்
கடலைப் பருப்பு – 2 டீஸ்பூன்
முந்திரி – 5
பெருங்காயத் தூள் – ¼ டீஸ்பூன்
பச்சை மிளகாய் – 1
கறிவேப்பிலை – சிறிதளவு
துருவிய கேரட் – 1
நறுக்கிய கொத்தமல்லி – சிறிதளவு
ரவை – 1 கப்
உப்பு – தேவையான அளவு
தக்காளி சட்னிக்கு:
தக்காளி – 4
மிளகாய்த்தூள் – 2 டீஸ்பூன்
காஷ்மீரி மிளகாய்த்தூள் – 2 டீஸ்பூன்
புளி – சிறிய துண்டு
உப்பு – தேவையான அளவு
தாளிக்க:
தேங்காய் எண்ணெய் – 2 டீஸ்பூன்
கடுகு – 1 டீஸ்பூன்
உளுத்தம் பருப்பு – 1 டீஸ்பூன்
கறிவேப்பிலை – சிறிதளவு
வெல்லம் – 2 டீஸ்பூன்
செய்முறை:
முதலில் அவலை இரண்டு முறை தண்ணீரில் நன்கு கழுவி, அதனுடன் லேசாக புளித்த தயிர் மற்றும் சிறிதளவு தண்ணீர் சேர்த்து கலந்து, 10 முதல் 15 நிமிடங்கள் வரை ஊற வைக்கவும். பின்னர் ஊறிய அவலை மிக்சியில் போட்டு மிருதுவான மாவாக அரைத்து ஒரு பாத்திரத்தில் மாற்றி வைத்துக் கொள்ளுங்கள்.
அடுத்து ஒரு வாணலியை அடுப்பில் வைத்து எண்ணெய் ஊற்றி சூடானதும் கடுகு, உளுத்தம் பருப்பு, கடலைப் பருப்பு மற்றும் முந்திரியை சேர்த்து பொன்னிறமாக வறுக்கவும். பின்னர் பெருங்காயத் தூள், பொடியாக நறுக்கிய பச்சை மிளகாய் மற்றும் கறிவேப்பிலையை சேர்த்து மணம் வரும் வரை வதக்குங்கள். அதன் பின் துருவிய கேரட் மற்றும் கொத்தமல்லியை சேர்த்து லேசாக வதக்கி, ரவையை சேர்த்து மிதமான தீயில் 4 முதல் 5 நிமிடங்கள் நன்றாக வறுத்துக் கொள்ளுங்கள்.
வறுத்த இந்த கலவையை அரைத்த அவல் மாவுடன் சேர்த்து நன்றாக கலந்து கொள்ளவும். மாவு மிகவும் கெட்டியாக இருந்தால் தேவையான அளவு தண்ணீர் சேர்த்து இட்லி மாவு பதத்திற்கு கொண்டு வந்து, 10 நிமிடங்கள் மூடி வைத்து ஓய்வெடுக்க விடுங்கள். பின்னர் உப்பு சேர்த்து மீண்டும் ஒரு முறை நன்றாக கலந்து விடவும்.
இப்போது இட்லி தட்டில் சிறிதளவு எண்ணெய் தடவி, மாவை ஊற்றி ஆவியில் சுமார் 10 நிமிடங்கள் வேக வைத்தால் மென்மையான அவல் இட்லி தயாராகிவிடும். தக்காளி சட்னி செய்வதற்கு, தக்காளியை நறுக்கி மிக்சியில் போட்டு, அதனுடன் மிளகாய்த்தூள், காஷ்மீரி மிளகாய்த்தூள், புளி மற்றும் உப்பு சேர்த்து நன்றாக அரைத்துக் கொள்ளுங்கள்.
பிறகு ஒரு வாணலியில் தேங்காய் எண்ணெய் ஊற்றி கடுகு, உளுத்தம் பருப்பு மற்றும் கறிவேப்பிலையை தாளிக்கவும். அதில் அரைத்த தக்காளி கலவையை சேர்த்து மிதமான தீயில் பச்சை வாசனை நீங்கும் வரை சமைக்கவும். இறுதியாக வெல்லத்தை சேர்த்து மேலும் 5 நிமிடங்கள் கொதிக்க வைத்து இறக்கினால் சுவையான தக்காளி சட்னி தயார்.
சூடாக இருக்கும் அவல் இட்லியுடன் இந்த காரசாரமான தக்காளி சட்னியை சேர்த்துப் பரிமாறினால், சுவையும் ஆரோக்கியமும் நிறைந்த காலை உணவை குடும்பத்தினர் அனைவரும் விரும்பி சாப்பிடுவார்கள். குறைந்த நேரத்தில், குறைந்த பொருட்களைக் கொண்டு எளிதாக செய்யக்கூடிய இந்த அவல் இட்லி, பரபரப்பான காலைகளில் உங்கள் வீட்டின் பிடித்த டிபனாக மாறும்.
