இந்திய ரூபாயின் மதிப்பில் ஏற்படும் அதிகப்படியான ஏற்ற இறக்கங்களைக் கட்டுப்படுத்தவும், அதன் ஸ்திரத்தன்மையை உறுதி செய்யவும் இந்திய ரிசர்வ் வங்கி தனது தொடர் நடவடிக்கைகளை மேற்கொள்ளும் என்று மத்திய நிதிமைச்சர் நிர்மலா சீதாராமன் தெரிவித்துள்ளார்.
புளூம்பெர்க் நியூ எகனாமி ஃபோரம் 2026 நிகழ்வில் செவ்வாய்க்கிழமை உரையாற்றிய நிதிமைச்சர், கடந்த ஆண்டில் இந்திய ரூபாயின் மதிப்பில் குறிப்பிடத்தக்க வீழ்ச்சி ஏற்பட்டதை ஒப்புக்கொண்டார். இருப்பினும், இந்த மதிப்புச் சரிவுக்கு உலகளாவிய பொருளாதார சவால்களே முதன்மை காரணம் என்றும், இந்தியாவின் வலுவான மேக்ரோ எகனாமிக் அடித்தளம் மற்றும் நிதி ஒழுங்குமுறை ஆகியவை முதலீட்டாளர்களுக்கு போதுமான நம்பிக்கையை அளிக்கும் என்றும் அவர் கூறினார்.
மேலும், நாட்டில் வளர்ந்து வரும் நடுத்தர வர்க்கத்தினரின் எண்ணிக்கையும், அவர்களின் அதிகரிக்கும் வாங்கும் திறனும், உள்நாட்டுப் பயன்பாடு மற்றும் ஏற்றுமதித் தேவைகளுக்காக உற்பத்தியைப் பெருக்க நிறுவனங்களுக்குப் பெரும் ஊக்கமளிப்பதாக அவர் சுட்டிக்காட்டினார்.
அடுத்து வரவிருக்கும் வரவுசெலவுத் திட்ட ஆலோசனைகளின் போது, நீண்டகால மூலதன ஆதாய வரி நீக்கம் மற்றும் பங்குச் சந்தை தொடர்பான பங்குகளின் வரிவிதிப்பு குறித்து உள்நாட்டு மற்றும் வெளிநாட்டு முதலீட்டாளர்களின் கருத்துக்களைக் கேட்க அரசு ஆர்வமாக உள்ளதாகக் குறிப்பிட்டார். அத்துடன், 2019-ஆம் ஆண்டின் இறுதியில் தொடங்கப்பட்ட தேசிய உள்கட்டமைப்புத் திட்டம் 4.5 டிரில்லியன் டாலரைத் தாண்டியுள்ளதாகவும், NaBFID மற்றும் NIIF ஆகிய நிதி நிறுவனங்கள் உள்கட்டமைப்பு வளர்ச்சிக்குத் தேவையான நிதியைத் திரட்டுவதில் முக்கியப் பங்காற்றி வருவதாகவும் தெரிவித்தார்.
