நாட்டில் டிஜிட்டல் பரிவர்த்தனைகள் அதிகரித்து வருவதால், இணையவழி மோசடிகளும் (cyber frauds) அதிகரித்து வருகின்றன. இதைத் தடுக்க, இந்திய ரிசர்வ் வங்கி (RBI) ஆன்லைன் பரிவர்த்தனைகளுக்கான புதிய விதிமுறையை அமல்படுத்தத் தயாராகி வருகிறது. நீங்கள் ஆன்லைன் மூலம் ரூ. 10,000-க்கு மேல் பணம் அனுப்ப விரும்பினால், ஒரு மணி நேர கால அவகாசம் (cooling-off period) விதிக்கப்படும். அதாவது, ரூ. 10,000-க்கு மேல் அனுப்பும்போது, அந்தப் பணம் ஒரு மணி நேரத்திற்குப் பிறகே பெறுநரின் கணக்கில் வரவு வைக்கப்படும்.
அந்த இடைப்பட்ட நேரத்தில் நீங்கள் விரும்பினால் பரிவர்த்தனையை ரத்து செய்து கொள்ளலாம். மோசடி செய்பவர்கள் மக்களை ஏமாற்றி, ‘புஷ் பேமெண்ட்’ (push payment) மோசடி மூலம் உடனடியாகப் பணத்தை மாற்றும் சம்பவங்களைத் தடுப்பதற்காகவே ரிசர்வ் வங்கி இந்த புதிய விதியைக் கொண்டு வந்துள்ளது. இது விரைவில் அறிமுகப்படுத்தப்பட வாய்ப்புள்ளது. வங்கிகளும் இந்தக் கொள்கைக்கு ஒப்புதல் அளித்துள்ளன. அனுப்பப்படும் பணம் சரியான இடத்தைச் சென்றடைகிறதா என்பதைச் சிந்தித்து உறுதிப்படுத்திக்கொள்ள வாடிக்கையாளர்களுக்கு இந்த ஒரு மணி நேர கால அவகாசம் பயனுள்ளதாக இருக்கும் என்று வங்கிகள் கூறுகின்றன.
இருப்பினும், வங்கிகள் இந்தக் கால அவகாச முறையைச் செயல்படுத்தத் தயாராக இருந்தாலும், சில தொழில்நுட்பச் சிக்கல்கள் உள்ளன. இந்த விதியை குறிப்பிட்ட சில பரிவர்த்தனைகளுக்கு மட்டுமே மட்டுப்படுத்த வேண்டும் என்று கருத்து தெரிவிக்கப்பட்டுள்ளது. உதாரணமாக, ரூ. 10,000-க்கு மேல் மதிப்புள்ள மொபைல் போனை வாங்கும்போது, கடையில் பணம் செலுத்துவதற்கு ஒரு மணி நேரம் காத்திருக்க வேண்டிய நிலை ஏற்படும். இது போன்ற சில பரிவர்த்தனைகளுக்கு இத்தகைய விதியை அமல்படுத்துவது சரியல்ல என்று வங்கிகள் கூறுகின்றன.
இதனுடன் சேர்த்து, டிஜிட்டல் பரிவர்த்தனைகளுக்காக மற்றொரு புதிய விதியையும் ரிசர்வ் வங்கி முன்மொழிந்துள்ளது. முதியவர்கள் டிஜிட்டல் பரிவர்த்தனைகளை மேற்கொள்ளும்போது, நம்பகமான ஒருவரின் ஒப்புதல் தேவைப்படும் வகையிலான புதிய விதிகள் இதில் அடங்கும். இந்த விதி 70 வயதுக்கு மேற்பட்ட முதியவர்களுக்குப் பொருந்தும்.
70 வயதுக்கு மேற்பட்ட முதியவர்கள் மற்றும் மாற்றுத்திறனாளிகள் மேற்கொள்ளும் டிஜிட்டல் பரிவர்த்தனைகளுக்கு, ‘நம்பகமான நபர்’ ஒருவரின் ஒப்புதலைக் கட்டாயமாக்க ரிசர்வ் வங்கி முடிவு செய்துள்ளது. இந்த விதியின்படி, முதியவர்கள் ஆன்லைனில் பணம் செலுத்த விரும்பினால், தாங்கள் தேர்ந்தெடுத்த நம்பகமான நபரிடமிருந்து கூடுதல் ஒப்புதலைப் பெற வேண்டும்.
அந்த நம்பகமான நபர் மாற்றப்பட்டால், 24 மணி நேர கால அவகாசம் விதிக்கப்படும். முதியவர்களுக்கு டிஜிட்டல் பரிவர்த்தனைகள் குறித்த விழிப்புணர்வு குறைவாகவே உள்ளது. இதனால், இணையவழி மோசடிகள் குறித்த புரிதல் இல்லாமலேயே பணத்தை மாற்றும் சூழல் ஏற்படுகிறது. இதைத் தவிர்க்கவே, மற்றொரு நபரின் ஒப்புதல் கட்டாயமாக்கப்படவுள்ளது.
Read More : 2005-ஆம் ஆண்டுக்கு முன் அச்சிடப்பட்ட ரூ.10, ரூ.20, ரூ.50, ரூ.100 நோட்டுகள் செல்லாதா..? RBI என்ன கூறியது..?
