வளிமண்டல கீழடுக்கு சுழற்சி மற்றும் வெப்பச்சலனம் காரணமாக, தமிழகத்தின் மேற்கு தொடர்ச்சி மலையை ஒட்டிய மாவட்டங்கள் மற்றும் தென் மாவட்டங்களில் அடுத்த சில நாட்களுக்கு மிதமான மழை நீடிக்கும் என சென்னை மண்டல வானிலை ஆய்வு மையம் கணித்துள்ளது. குறிப்பாக, இன்று பலத்த காற்று மற்றும் இடி மின்னலுடன் கூடிய மழைக்கு வாய்ப்புள்ளதாக தெரிவிக்கப்பட்டுள்ளது.
அதன்படி இன்று (அக். 2), மேற்கு தொடர்ச்சி மலையோர மாவட்டங்கள் மற்றும் தென் தமிழகத்தின் ஓரிரு இடங்களில் மணிக்கு 40 முதல் 50 கிலோமீட்டர் வேகத்தில் பலத்த காற்று மற்றும் இடி மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது. இதேபோல், வட தமிழகத்தின் ஒருசில பகுதிகளிலும், புதுச்சேரி மற்றும் காரைக்கால் பிராந்தியங்களிலும் இடி மின்னலுடன் கூடிய லேசான மழை பெய்யக்கூடும்.
தொடர்ந்து வரும் அக். 3 மற்றும் 4 ஆகிய தேதிகளில், தென் மாவட்டங்கள் மற்றும் மேற்குத் தொடர்ச்சி மலைப் பகுதிகளில் ஓரிரு இடங்களில் லேசானது முதல் மிதமான மழையும், ஏனைய தமிழக மாவட்டங்கள், புதுவை மற்றும் காரைக்கால் பகுதிகளில் லேசான மழையும் பெய்யக்கூடும். அதனைத் தொடர்ந்து, அக். 5 மற்றும் 6 ஆகிய நாட்களில் மேற்குத் தொடர்ச்சி மலைப் பகுதிகள் மற்றும் உள் தமிழக மாவட்டங்களில் மிதமான மழையும், அக். 7 அன்று மாநிலத்தின் பெரும்பாலான இடங்களில் பரவலாக லேசானது முதல் மிதமான மழையும் பதிவாக வாய்ப்புள்ளது.
வெப்பநிலையை பொறுத்தவரை, இன்று முதல் வரும் 5ம் தேதி வரை தமிழகம், புதுச்சேரி மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டியே நீடிக்கும் என்பதால், பெரிய அளவில் வெப்ப அலை வீசுவதற்கோ அல்லது வெயில் அதிகரிப்பதற்கோ வாய்ப்பில்லை என வானிலை ஆய்வு மையம் தெளிவுபடுத்தியுள்ளது.
Read More : MLA பதவியை ராஜினாமா செய்த இசக்கி சுப்பையா..!! 2ம் இடம் பிடித்தவர் வெற்றியா? இடியை இறக்கிய ஐகோர்ட்..!!
