அலாஸ்காவின் மேற்குப் பகுதியில் உள்ள தொலைதூர ரேடார் தளம் அருகே நேற்று (வியாழக்கிழமை) சென்ற தனி விமானம் விபத்துக்குள்ளானதில் அதில் பயணித்த 8 பேரும் உயிரிழந்த சம்பவம் சோகத்தை ஏற்படுத்தியுள்ளது.
இதுதொடர்பாக தேசிய போக்குவரத்து பாதுகாப்பு வாரியத்தின் அலாஸ்கா பிராந்தியத் தலைவர் கிளின்ட் ஜான்சன் கூறுகையில், இந்த விமானத்தில் இரண்டு விமானிகள் மற்றும் ஆறு பயணிகள் என மொத்தம் 8 பேர் பயணம் செய்ததாக தெரிவித்தார். அவர்களின் தற்போதைய நிலை குறித்து உடனடி தகவல்கள் எதுவும் இல்லை என்றாலும், விமான விபத்தில் உயிர் தப்பியதற்கான எந்த அறிகுறியும் இல்லை என்று உள்ளூர் ஊடகச் செய்திகள் தெரிவிக்கின்றன.
ஆஞ்சேரேஜில் இருந்து புறப்பட்ட இந்த விமானம், கேப் நியூவென்ஹாம் பகுதியை நெருங்கும் போது பிற்பகலில் விபத்துக்குள்ளானதாக நம்பப்படுகிறது. எனினும், கிடைக்கப்பட்டுள்ள தகவல்கள் அனைத்தும் முதற்கட்டமானவை மட்டுமே என்று ஜான்சன் எச்சரித்துள்ளார்.
கேப் நியூவென்ஹாம் லாங் ரேஞ்ச் ரேடார் தளம் அருகே ‘விமான விபத்து’ நேரிட்டதாகத் தகவல் கிடைத்ததைத் தொடர்ந்து, அலாஸ்கா மீட்பு ஒருங்கிணைப்பு மையம் உடனடியாகத் தேடுதல் மற்றும் மீட்புப் பணியைத் தொடங்கியது. மேலும் தகவல்கள் கிடைக்கும் போது வெளியிடுவதாக அந்த முகமை தெரிவித்துள்ளது.
இதேபோல், அலாஸ்காவில் சமீபத்தில் விமான விபத்துகள் தொடர்ந்து அதிகரித்து வருகின்றன. கடந்த ஜூன் மாதம், அலாஸ்காவில் அமெரிக்கக் கடலோர காவல்படையின் MH-60 ஜெயஹாக் ஹெலிகாப்டர் விபத்துக்குள்ளானதில் அதில் பயணம் செய்த 4 பணியாளர்களும் காயமடைந்தனர். சிட்காவில் உள்ள ஹார்பர் மலை அருகே விபத்துக்குள்ளான இந்த ஹெலிகாப்டர் வழக்கமான பயிற்சிப் பறத்தலில் ஈடுபட்டிருந்தது குறிப்பிடத்தக்கது.
அமெரிக்காவில் இந்த மாதத்தில் தொடர்ந்து பல விமான விபத்துகள் பதிவாகியுள்ளன. டெக்சாஸின் லாரேடோவில் செவ்வாய்க்கிழமை இரவு வணிக ஜெட் விமானம் நெடுஞ்சாலையில் விபத்துக்குள்ளானதில் ஒருவர் உயிரிழந்தார். முன்னதாக, கலிபோர்னியாவில் ஜூன் 15 அன்று நடந்த B-52 விமான சோதனையின் போது ஏற்பட்ட விபத்தில் 8 பேரும், ஜூன் 14 அன்று மிசூரியில் ஸ்கைடைவிங் விமான விபத்தில் 12 பேரும் உயிரிழந்தது குறிப்பிடத்தக்கது.
