ஜெனீவாவில் கொடிய ஹன்டா வைரஸ் பரவல் தொடர்பாக உலக சுகாதார அமைப்பு (WHO) அதிரடி எச்சரிக்கை வெளியிட்டுள்ளது. பாதிக்கப்பட்ட சொகுசுக் கப்பலில் இருந்த அனைத்து பயணிகளும் “அதிக ஆபத்துள்ள தொடர்பாளர்கள்” என வகைப்படுத்தப்பட்டுள்ளதாகவும், அவர்கள் 42 நாட்கள் தீவிர கண்காணிப்பில் வைக்கப்பட வேண்டும் என்றும் WHO அறிவித்துள்ளது.
உலக சுகாதார அமைப்பின் தொற்றுநோய் மற்றும் பெருந்தொற்று தயார்நிலை இயக்குநர் மரியா வான் கெர்கோவ், சமூக ஊடக நிகழ்வில் பேசும்போது, கப்பலில் இருந்த அனைத்து பயணிகள் மற்றும் பணியாளர்களும் உயர்ந்த ஆபத்து குழுவாக கருதப்படுவதாக தெரிவித்தார். மேலும், அவர்கள் கப்பலை விட்டு வெளியேறிய பின் 42 நாட்கள் வரை தொடர்ந்து மருத்துவ கண்காணிப்பில் இருக்க வேண்டும் என பரிந்துரைக்கப்பட்டுள்ளதாகவும் அவர் கூறினார்.
இதேவேளை, கேனரி தீவுகள் அருகே நங்கூரமிடும் என எதிர்பார்க்கப்படும் எம்.வி. ஹோண்டியஸ் என்ற சொகுசுக் கப்பலில் இருந்து பயணிகளை வெளியேற்றுவது தொடர்பாக ஸ்பெயின் அரசு முக்கிய முடிவை எடுத்துள்ளது. கப்பலுக்கு பாதுகாப்பான துறைமுகம் வழங்குவது தங்களின் தார்மீக மற்றும் சட்டப்பூர்வ கடமை என ஸ்பெயின் பிரதமர் பெட்ரோ சான்செஸ் தெரிவித்துள்ளார்.
மாட்ரிட்டில் WHO தலைவர் டெட்ரோஸ் அதானோம் கெப்ரேயசஸை சந்தித்த பிறகு பேசிய அவர், சர்வதேச சட்டங்களின்படி மனிதாபிமான அடிப்படையில் இந்த நடவடிக்கை அவசியம் என வலியுறுத்தினார். அதேபோல், WHO தலைவர் டெட்ரோஸ், கப்பலில் உள்ளவர்களின் பாதுகாப்பு மற்றும் மருத்துவ தேவைகளை உறுதி செய்ய அருகிலுள்ள பொருத்தமான துறைமுகம் அவசியம் என தெரிவித்துள்ளார்.
சுமார் 150 பயணிகள், 23 நாடுகளைச் சேர்ந்தவர்கள், பல வாரங்களாக கடலில் சிக்கிய நிலையில் உள்ளதாகவும், அவர்கள் அனைவரும் மனஅழுத்தத்திலும் கவலையிலும் இருப்பதாகவும் தகவல்கள் தெரிவிக்கின்றன. அவர்களை பாதுகாப்பாக வெளியேற்றும் பணியில் சுகாதார குழுக்கள் மற்றும் துறைமுக அதிகாரிகள் இணைந்து செயல்படுவதாக கூறப்படுகிறது.
இந்த நடவடிக்கையை நேரில் கண்காணிக்க டெனெரிஃபே தீவுக்கு செல்வதாகவும், அங்கு பணியாற்றும் சுகாதார ஊழியர்களுக்கு ஆதரவு வழங்குவதாகவும் WHO தலைவர் டெட்ரோஸ் தெரிவித்துள்ளார். WHO முழுமையாக இந்த செயல்முறையில் இணைந்து செயல்படும் எனவும் அவர் உறுதியளித்துள்ளார்.
Read more: முதல்வராக பதவியேற்ற கையோடு சட்ட ஒழுங்கு குறித்து விஜய் – டிஜிபி முக்கிய ஆலோசனை..!
