தமிழர்களின் பாரம்பரிய சிறப்புமிக்க முதன்மை பண்டிகைகளில் ஒன்றான ‘ஆடிப்பெருக்கு’ திருநாள் இன்று மாநிலம் முழுவதும் விமரிசையாக கொண்டாடப்படுகிறது.
இயற்கையின் கொடையையும், ஜீவநதிகளையும் போற்றி வணங்கும் ஆடிப்பெருக்கு, பருவமழை காலத்தில் ஆறுகளில் நீர்மட்டம் நிறைந்து வழிவதை கொண்டாடும் ஒரு முதன்மையான நன்னாளாகும். வரலாற்று ரீதியாக புதிய விவசாயப் பருவத்தின் தொடக்கமாக விளங்கும் இந்நாளில், நல்ல மழைப்பொழிவு, வளமான நிலம் மற்றும் நல்விளைச்சலுக்காக விவசாயிகள் காவிரித் தாய்க்கும் நீர் தேவதைகளுக்கும் சிறப்பு வழிபாடுகளை நடத்துகின்றனர். இயற்கையை ‘அம்மன்’ வடிவில் பெண்கள் வழிபடும் இத்திருவிழா, தமிழ்நாட்டின் வீடுகள், திருத்தலங்கள் மற்றும் ஆற்றங்கரைகளில் பக்திச் சிரத்தையுடன் அனுசரிக்கப்பட்டு வருகிறது.
ஆடிப்பெருக்கு நன்னாள் புதிய முயற்சிகளை தொடங்குவதற்கும் மங்கலப் பொருட்கள் வாங்குவதற்கும் மிக உகந்ததாக கருதப்படுகிறது. இந்நாளில் புதிய வணிகங்கள் தொடங்குவது, தங்கம் மற்றும் நகைகள் வாங்குவது, குழந்தைகளின் கல்விப் பயணத்தை தொடங்குவது என பல சுபகாரியங்கள் மேற்கொள்ளப்படுகின்றன. மேலும், பெண்கள் பல வகையான கலவை சாதங்களை தயாரித்து, காவிரி ஆற்றுக்கு அர்ப்பணித்து வழிபடுவதும், குடும்பத்துடன் உண்டு மகிழ்வதும் பரவலான வழக்கமாகும்.
முக்கியமாக, இந்து திருமணச் சடங்குகளில் ஒன்றான ‘தாலி பிரித்து கோர்க்கும்’ நிகழ்வுக்கு ஆடிப்பெருக்கு மிகவும் புனிதமான நாளாக பார்க்கப்படுகிறது. திருமணத்தின் போது கட்டப்படும் மஞ்சள் கயிற்றை மாற்றித் தங்க சங்கிலியில் கோர்க்கும் இச்சடங்கை புதுமணத் தம்பதிகள் ஆலயங்களிலோ அல்லது இல்லங்களிலோ மேற்கொள்கின்றனர்.
அதேபோல், திருமணமாகாத பெண்கள் திருமணமான பெண்களுடன் இணைந்து அரிசி, வெல்லம் கலந்த இனிப்பு, பனை ஓலை காதணிகள் மற்றும் கருப்பு மணிகளைப் படைத்து வழிபடுவதன் மூலம் நல்ல குணமுள்ள வாழ்க்கைத் துணை அமைவார் என்பது ஐதீகம். தவிர, திருமணமான பெண்கள் ஆடி மாதத்தில் பெற்றோர் வீட்டிற்குச் சென்று தங்குவதும், ஆடிப்பெருக்கின் போது மாப்பிள்ளைக்குப் புதிய ஆடைகள் வழங்கி விருந்தோம்புவதும், திருவிழா முடிந்த மறுநாள் புதுமணத் தம்பதிகள் கணவர் வீட்டிற்குத் திரும்புவதும் பாரம்பரிய வழக்கமாக இருந்து வருகிறது.
Read More : நிலச்சரிவால் மண்ணுக்குள் புதைந்த வீடு..!! 3 பேர் உயிரிழந்த சோகம்..!! கனமழையால் பேரதிர்ச்சி சம்பவம்..!!
