மகாராஷ்டிராவில் பரபரப்பான சாலையில் ஸ்கூட்டர் மீது காரை மோதி, கீழே தள்ளி இளைஞர் ஒருவரை படுகொலை செய்த பயங்கர சம்பவம் அரங்கேறியுள்ளது. இக்கொலை தொடர்பான சிசிடிவி காட்சிகள் வெளியாகி பெரும் அதிர்ச்சியை ஏற்படுத்தியுள்ளன.
மகாராஷ்டிரா மாநிலம் சிட்கோ பகுதியில் உள்ள N-7 பகுதி பஜ்ரங் சௌக் அருகே இச்சம்பவம் நடந்துள்ளது. ஜிம்மிற்குச் சென்றுவிட்டு தனது ஸ்கூட்டரில் திரும்பிக் கொண்டிருந்த தேவேஷ் என்ற பண்டி தீட்சித் என்பவர்தான் இந்தத் தாக்குதலில் கொல்லப்பட்டுள்ளார்.
பவன் பராஷர் என்பவரது கார், தீட்சித்தின் ஸ்கூட்டர் மீது பின்தொடர்ந்து வந்து மோதியுள்ளது. இதனால் தூக்கி வீசப்பட்ட தீட்சித்தை, பவன் பராஷர் விடாமல் விரட்டிச் சென்று ஹாக்கி ஸ்டிக் மற்றும் இரும்பு கம்பியால் தலை மற்றும் முகத்தில் தாக்கியுள்ளார். இதில் பலத்த காயமடைந்த தீட்சித் சம்பவ இடத்திலேயே பரிதாபமாக உயிரிழந்தார்.
கொலை செய்த பின்னர், பவன் பராஷர் நேராக சிட்கோ காவல் நிலையத்திற்குச் சென்று சரணடைந்தார். இதனையடுத்து காவல்துறையினர் அவர் பயன்படுத்திய காரையும், தாக்குதலுக்குப் பயன்படுத்தப்பட்ட இரும்புத் கம்பியையும் பறிமுதல் செய்தனர். கைதான பவன் பராஷர் நீதிமன்றத்தில் ஆஜர்படுத்தப்பட உள்ளார். காவல்துறை விசாரணையைத் தொடர்ந்து வழக்கில் அடுத்த கட்ட நடவடிக்கைகள் மேற்கொள்ளப்படும்.
முன்விரோதம் காரணமா?
கொலைக்கான உண்மையான நோக்கம் என்ன என்பது குறித்து காவல்துறை தரப்பில் அதிகாரப்பூர்வமாக இன்னும் முழுமையாக தெரிவிக்கப்படவில்லை. இருப்பினும், கொல்லப்பட்ட தீட்சித் ஒரு உணவகம் நடத்தி வந்ததோடு, நிலம் தொடர்பான வணிகம் உள்ளிட்ட தொழில்களிலும் ஈடுபட்டு வந்துள்ளார்.
ஆரம்ப கட்டத் தகவல்களின்படி, தீட்சித்திற்கும் பராஷருக்கும் இடையே நீண்ட காலமாகத் தகராறு இருந்து வந்துள்ளதாகத் தெரிகிறது. பகை அல்லது வியாபாரப் போட்டி காரணமாக இந்தத் கொலை நடந்திருக்கலாம் என்று சந்தேகிக்கப்பட்டாலும், அதற்கான உறுதியான காரணங்கள் இன்னும் முழுமையாக வெளிவரவில்லை. காவல்துறை தொடர்ந்து தீவிர விசாரணை நடத்தி வருகிறது.
