பொதுவாக ஒவ்வொருவருக்கும் தங்களுக்கு பிடித்தமான சில உணவுகள் இருக்கும். வயது எவ்வளவு ஆனாலும், சில உணவுகள் மீது இருக்கும் விருப்பம் மட்டும் மாறுவதில்லை. குறிப்பாக, பெரியவர்களாக இருந்தாலும் சில உணவுகளை குழந்தைகளைப் போலவே விரும்பி சாப்பிடுபவர்களும் இருக்கிறார்கள். ஆனால், சில உணவுகளை சாப்பிடுவதற்கு முன்பே பலர் தயக்கம் காட்டுகின்றனர். காரணம், இதை சாப்பிட்டால் இந்த நோய் வரும், அதை சாப்பிட்டால் உடலுக்கு கேடு ஏற்படும் என்று பல ஆண்டுகளாக சொல்லப்பட்டு வரும் கருத்துகள்தான். பல ஆண்டுகளாக நிலவி வரும் சில உணவுப் பழக்கங்கள் மற்றும் இணையத்தில் பரவும் முழுமையற்ற தகவல்களின் காரணமாக, சில உணவுகளை உடலுக்கு தீங்கு விளைவிப்பவை என்று நினைத்து பலரும் தவிர்த்து வருகின்றனர்.
ஆனால், உண்மையில் அந்த உணவுகளை சரியான அளவில் மற்றும் சரியான முறையில் எடுத்துக்கொண்டால், அவை உடலுக்கு பல்வேறு நன்மைகளை வழங்கக்கூடும் என சமீபத்திய ஆய்வுகள் தெரிவிக்கின்றன. நாம் ஆரோக்கியமற்றது என்று நினைத்து ஒதுக்கி வைத்துள்ள சில உணவுகளின் உண்மையான பயன்கள் குறித்து தெரிந்துகொள்வது அவசியம். அந்த வகையில், பொதுவாக தவறாக புரிந்துகொள்ளப்படும் சில உணவுகள் மற்றும் அவற்றின் உண்மையான தன்மைகள் குறித்து நாம் இந்த பதிவில் பார்க்கலாம்.
உருளைக்கிழங்கு என்றாலே உடல் எடை அதிகரிக்கும் என்ற எண்ணம் பலரிடம் உள்ளது. ஆனால் எண்ணெயில் பொரித்து சாப்பிடும் வகைகள்தான் உடலுக்கு பாதிப்பை ஏற்படுத்தும். சாதாரணமாக வேகவைத்த அல்லது குறைந்த எண்ணெயில் சமைக்கப்பட்ட உருளைக்கிழங்கில் பொட்டாசியம், வைட்டமின் சி, நார்ச்சத்து போன்ற சத்துக்கள் கிடைக்கின்றன. மேலும், இதில் உள்ள சில மாவுச்சத்து வகைகள் குடல் ஆரோக்கியத்திற்கும் உதவக்கூடும்.
முட்டையை தவிர்ப்பதற்கு முக்கிய காரணமாக பலரும் கொலஸ்ட்ராலை கூறுகின்றனர். ஆனால் முட்டை என்பது உடலுக்கு தேவையான முழுமையான புரத ஆதாரங்களில் ஒன்றாகும். இதில் மூளை செயல்பாட்டிற்கு தேவையான கோலின், வைட்டமின் பி12, செலினியம் மற்றும் கண்களின் ஆரோக்கியத்திற்கு உதவும் சத்துக்கள் உள்ளன. உடலின் தேவைக்கு ஏற்ப அளவாக எடுத்துக்கொள்வது பயனுள்ளதாக இருக்கும்.
பாப்கார்ன் என்றாலே தியேட்டரில் கிடைக்கும் வெண்ணெய், உப்பு அதிகம் உள்ள உணவுதான் பலரின் நினைவுக்கு வரும். ஆனால் இயற்கையான சோளத்தில் இருந்து தயாரிக்கப்படும் சாதாரண பாப்கார்ன் ஒரு முழு தானிய உணவாகும். அதிக எண்ணெய் மற்றும் சுவையூட்டிகள் இல்லாமல் தயாரித்தால், உடல் எடையை குறைக்க நினைப்போருக்கு சிறந்த உணவாகும்.
கொழுப்பு உள்ளது என்பதற்காக வேர்க்கடலை வெண்ணெயை (peanut butter) பலர் தவிர்க்கின்றனர். ஆனால் இதில் உள்ள கொழுப்பு வகைகள் உடலுக்கு தேவையான நல்ல கொழுப்புகளாகும். புரதம், வைட்டமின் ஈ, மக்னீசியம் போன்ற சத்துக்களும் இதில் உள்ளன. சர்க்கரை மற்றும் செயற்கை பொருட்கள் சேர்க்கப்படாத இயற்கையான வேர்க்கடலை வெண்ணெயை தேர்வு செய்வது முக்கியம்.
காபி உடலுக்கு தீங்கு என்று சிலர் நினைத்தாலும், அளவாக எடுத்துக்கொள்ளும் காபியில் ஆன்டிஆக்ஸிடன்ட்கள் உள்ளன. அதிக சர்க்கரை, கிரீம் மற்றும் அதிக கலோரி சேர்க்கைகள் தான் பிரச்சனையாக மாறுகின்றன. எனவே, காபியை விட அதை தயாரிக்கும் முறை முக்கியமானது. சாக்லேட் என்றாலே அதிக சர்க்கரை கொண்ட உணவு என்ற எண்ணம் உள்ளது. ஆனால் , 70 சதவீதம் அல்லது அதற்கு மேற்பட்ட கோகோ கொண்ட டார்க் சாக்லேட்டில் உடலுக்கு பயனளிக்கும் ஆன்டிஆக்ஸிடன்ட்கள் மற்றும் தாதுக்கள் உள்ளன. அவை ரத்த ஓட்டத்தை சீராக்கி, அழற்சியை குறைத்து இதய ஆரோக்கியத்தை மேம்படுத்த உதவுகிறது.
தயிர் கொழுப்பு அதிகம் உள்ள உணவு என்று நினைத்து சிலர் தவிர்க்கிறார்கள். ஆனால் இதில் கால்சியம், புரதம் மற்றும் குடலில் உள்ள நல்ல பாக்டீரியாக்களை அதிகரிக்க உதவும் சத்துக்கள் உள்ளன. சர்க்கரை சேர்க்கப்பட்ட தயிரை விட இயற்கையான தயிரை எடுத்துக்கொள்வது சிறந்தது.
கொழுப்பு அதிகம் இருப்பதால் அவகாடோவை சிலர் தவறாக புரிந்துகொள்கிறார்கள். ஆனால் இதில் உள்ள நல்ல கொழுப்புகள் இதய ஆரோக்கியத்திற்கு உதவக்கூடியவை. மேலும் நார்ச்சத்து, பொட்டாசியம் மற்றும் பல வைட்டமின்களும் இதில் காணப்படுகின்றன. ஒரு உணவை முழுமையாக நல்லது அல்லது கெட்டது என்று பிரிப்பதைவிட, அதை எந்த அளவில் மற்றும் எந்த முறையில் சாப்பிடுகிறோம் என்பதே முக்கியம். இயற்கையான உணவுகளை சரியான அளவில் எடுத்துக்கொண்டால், அவை உடலுக்கு தேவையான பல ஊட்டச்சத்துக்களை வழங்கக்கூடும்.
