ஒரு காலத்தில் காதலை மென்மையாகவும், உணர்வுபூர்வமாகவும் சொல்லிய தமிழ் திரைப்படங்கள் ரசிகர்களின் மனதில் நீங்காத இடத்தைப் பிடித்திருந்தன. ஆனால் சமீப காலங்களில் வெளியாகும் பல படங்களில் காதலின் உணர்வை விட கவர்ச்சிக்கே அதிக முக்கியத்துவம் கொடுக்கப்படுவதாக விமர்சனங்கள் எழுந்து வருகின்றன. இந்த நிலையில், தமிழ் சினிமாவில் மீண்டும் அழகான காதல் கதைகள் வர வேண்டும் என்ற தனது விருப்பத்தை நடிகை ஜோதிகா வெளிப்படுத்தியுள்ளார்.
நடிகர் சூர்யாவும், நடிகை ஜோதிகாவும் தமிழ் சினிமாவின் மிகவும் பிரபலமான நட்சத்திர ஜோடிகளில் ஒருவராக உள்ளனர். பல வெற்றி திரைப்படங்களில் இணைந்து நடித்த இவர்கள், திரையிலும் நிஜ வாழ்க்கையிலும் ரசிகர்களின் மனதை வென்றுள்ளனர். திருமணத்திற்குப் பிறகு சில ஆண்டுகள் சினிமாவில் இருந்து விலகியிருந்த ஜோதிகா, பின்னர் கதாநாயகிக்கு முக்கியத்துவம் அளிக்கும் படங்கள் மூலம் வெற்றிகரமாக மீண்டும் திரையுலகில் கால்பதித்தார்.
மறுபுறம், சூர்யா தொடர்ந்து வித்தியாசமான கதைக்களங்களை தேர்வு செய்து, முன்னணி நடிகர்களில் ஒருவராக தனது இடத்தை தக்க வைத்துள்ளார். இதனால், இந்த ஜோடி மீண்டும் திரையில் இணைய வேண்டும் என்பது ரசிகர்களின் நீண்டநாள் விருப்பமாக இருந்து வருகிறது. இந்த நிலையில், சமீபத்தில் நடைபெற்ற ஒரு நிகழ்ச்சியில் நடிகை ஜோதிகா கலந்து கொண்டார். அப்போது தொகுப்பாளர் மா.கா.பா. ஆனந்த், “நீங்களும் சூர்யாவும் மீண்டும் எப்போது இணைந்து நடிக்கப் போகிறீர்கள்?” என்று கேள்வி எழுப்பினார்.
அதற்கு பதிலளித்த ஜோதிகா, தாங்களிருவரும் இணைந்து நடிக்க ஒரு நல்ல காதல் கதைக்காக காத்திருப்பதாக கூறினார். ஆனால் இதுவரை தங்களை முழுமையாக ஈர்க்கும் வகையில் யாரும் ஒரு கதையை கொண்டு வரவில்லை என்றும் தெரிவித்தார். மேலும், உணர்வுபூர்வமான காதல் கதைகள் தமிழ் சினிமாவில் வெளியாகி நீண்ட காலமாகிவிட்டதாக அவர் குறிப்பிட்டார். தற்போது வெளியாகும் பல படங்களில் காதலின் அழகை விட கவர்ச்சிக்கே அதிக முக்கியத்துவம் கொடுக்கப்படுவதாக தனது கருத்தை பகிர்ந்தார்.
இதனால், காதலை மென்மையாகவும் உணர்வுப்பூர்வமாகவும் சொல்லும் ஒரு திரைப்படத்தில் சூர்யாவுடன் மீண்டும் இணைந்து நடிக்க ஆவலாக இருப்பதாக ஜோதிகா தெரிவித்தார். மேலும், அப்படத்தை ஒரு பெண் இயக்குநர் இயக்கினால் அந்த உணர்வுகளை இன்னும் சிறப்பாக வெளிப்படுத்த முடியும் என்று தாங்களிருவரும் நம்புவதாகவும் அவர் கூறினார்.
ஜோதிகாவின் இந்த கருத்து தற்போது சமூக வலைதளங்களில் கவனம் பெற்று வருகிறது. சூர்யா – ஜோதிகா கூட்டணியை மீண்டும் வெள்ளித்திரையில் பார்க்க ரசிகர்கள் ஆர்வமாக காத்திருக்கின்றனர்.
Also Read: “சாப்பாடு கொஞ்சம் லேட் ஆகும்…” மனைவியின் ஒரு பதில்; ஆத்திரத்தில் கணவன் செய்த கொடூர செயல்!
