சென்னை திரும்பும் தென்மாவட்ட பயணிகளுக்கு கூடுதல் வசதியாக நாகர்கோவிலில் இருந்து தாம்பரத்திற்கு ஒருவழி சிறப்பு ரயிலை தெற்கு ரயில்வே இயக்குகிறது. செப்டம்பர் 14-ம் தேதி இரவு புறப்படும் இந்த ரயில், மறுநாள் காலை சென்னை தாம்பரத்தை வந்தடையும்.
விநாயகர் சதுர்த்தி மற்றும் தொடர் விடுமுறை காரணமாக சென்னையில் இருந்து ஏராளமானோர் தங்கள் சொந்த ஊர்களுக்கு சென்றிருந்தனர். தற்போது விடுமுறை முடிவுக்கு வருவதால், நாகர்கோவில், நெல்லை, தூத்துக்குடி, திருச்செந்தூர், மதுரை, திண்டுக்கல் உள்ளிட்ட தென்மாவட்டங்களில் இருந்து சென்னை திரும்பும் பயணிகளின் எண்ணிக்கை அதிகரித்துள்ளது.
ஏற்கனவே பல ரயில்கள் மற்றும் பேருந்துகளில் முன்பதிவு டிக்கெட்டுகள் முழுமையாக விற்றுவிட்ட நிலையில், சென்னை திரும்புவதற்கு கூடுதல் போக்குவரத்து வசதி தேவைப்பட்டது. இதையடுத்து தெற்கு ரயில்வே சிறப்பு ரயிலை இயக்க முடிவு செய்துள்ளது.
வண்டி எண் 06050 கொண்ட இந்த சூப்பர் பாஸ்ட் சிறப்பு ரயில் செப்டம்பர் 14-ம் தேதி இரவு 11 மணிக்கு நாகர்கோவில் சந்திப்பு ரயில் நிலையத்தில் இருந்து புறப்படும். மறுநாள் காலை 10.45 மணிக்கு சென்னை தாம்பரம் ரயில் நிலையத்தை சென்றடையும்.
நாகர்கோவிலில் இருந்து புறப்படும் ரயில் வள்ளியூர் வழியாக நெல்லையை அடையும். நெல்லையில் நள்ளிரவு 12.15 மணிக்கு வந்து, 5 நிமிட இடைவெளிக்குப் பிறகு 12.20 மணிக்கு புறப்படும். அங்கிருந்து கோவில்பட்டி, சாத்தூர், விருதுநகர், அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை வழியாக திருச்சியை சென்றடையும்.
திருச்சி ரயில் நிலையத்தை அதிகாலை 5.40 மணிக்கு அடையும் ரயில், 5.45 மணிக்கு அங்கிருந்து புறப்படும். பின்னர் ஸ்ரீரங்கம், அரியலூர், விருத்தாசலம், விழுப்புரம், செங்கல்பட்டு வழியாக பயணித்து காலை 10.45 மணிக்கு தாம்பரத்தை அடையும்.
இந்த சிறப்பு ரயிலில் மொத்தம் 20 பெட்டிகள் இடம்பெறும். இதில் 15 ஸ்லீப்பர் பெட்டிகள், 3 சேர் கார் பெட்டிகள் மற்றும் 2 லக்கேஜ் மற்றும் பிரேக் வேன் பெட்டிகள் உள்ளன.
சிறப்பு ரயிலுக்கான முன்பதிவு செப்டம்பர் 14-ம் தேதி காலை 8 மணிக்கு தொடங்குகிறது. விடுமுறை முடிந்து சென்னை திரும்பும் பயணிகள் இந்த கூடுதல் ரயில் சேவையை பயன்படுத்திக்கொள்ளலாம்.
தொடர் விடுமுறையையொட்டி தென்மாவட்டங்களுக்கு சென்ற பயணிகள் ஒரே நேரத்தில் சென்னை திரும்புவதால், ரயில் மற்றும் பேருந்துகளில் கூட்டம் அதிகரித்துள்ளது. ஏற்கனவே முன்பதிவு டிக்கெட்டுகள் பெருமளவில் நிறைவடைந்துள்ள நிலையில், இந்த சிறப்பு ரயில் பயணிகளுக்கு கூடுதல் போக்குவரத்து வாய்ப்பை வழங்குகிறது.
Also Read: செல்போன் மூலம் ஏற்பட்ட பழக்கம்… பணத் தகராறில் பரோட்டா மாஸ்டர் செய்த காரியம்! சாக்கு மூட்டையில் காத்திருந்த பேரதிர்ச்சி!!
