விநாயகர் சதுர்த்தி பண்டிகை என்றாலே விநாயகருக்கு பிடித்தமான கொழுக்கட்டை நினைவுக்கு வருவது வழக்கம். வீடுகளில் பல்வேறு சுவைகளில் கொழுக்கட்டை தயாரித்து விநாயகருக்குப் படையலிட்டு, பின்னர் குடும்பத்தினர் மற்றும் உறவினர்களுடன் பகிர்ந்து கொள்வது இந்த பண்டிகையின் முக்கிய அம்சங்களில் ஒன்றாக உள்ளது. இந்த ஆண்டு வழக்கமான கொழுக்கட்டைகளைத் தாண்டி, தங்க முலாம் பூசப்பட்ட கொழுக்கட்டை ஒன்று சமூக வலைத்தளங்களில் கவனம் பெற்றுள்ளது.
விநாயகர் சதுர்த்தியை முன்னிட்டு மகாராஷ்டிரா மாநிலம் நாசிக்கில் உள்ள ‘சாகர் ஸ்வீட்ஸ்’ என்ற இனிப்புக் கடை வித்தியாசமான முயற்சியை மேற்கொண்டுள்ளது. அங்கு தங்க முலாம் பூசப்பட்ட ‘கோல்டன் மோதக்’ என்ற கொழுக்கட்டை விற்பனைக்கு வந்துள்ளது. ஒரு கிலோ இந்த சிறப்பு கொழுக்கட்டையின் விலை ரூ.27,000 என நிர்ணயிக்கப்பட்டுள்ளது.
வழக்கமாக விநாயகர் சதுர்த்தி காலத்தில் இனிப்புக் கடைகளில் பலவிதமான கொழுக்கட்டைகள் விற்பனைக்கு வரும். ஆனால், தங்க முலாம் பூசப்பட்ட கொழுக்கட்டை என்பதால் இந்த இனிப்பு பலரது கவனத்தையும் ஈர்த்துள்ளது. இதுதொடர்பான காட்சிகள் சமூக வலைத்தளங்களில் வேகமாகப் பரவி வருகின்றன.
இந்த தங்கக் கொழுக்கட்டையை சாகர் ஸ்வீட்ஸ் நிறுவனம் கடந்த 2021-ம் ஆண்டு முதல் விநாயகர் சதுர்த்தியை முன்னிட்டு தயாரித்து வருகிறது. அறிமுகப்படுத்தப்பட்ட முதல் ஆண்டில் ஒரு கிலோ ரூ.12,000-க்கு விற்பனை செய்யப்பட்ட இந்த கொழுக்கட்டையின் விலை தற்போது ரூ.27,000 ஆக உயர்ந்துள்ளது. இதற்கு முக்கிய காரணமாக தங்கத்தின் விலை உயர்வை கடை நிர்வாகம் குறிப்பிட்டுள்ளது.
தங்க முலாம் பூசப்பட்ட இந்த கொழுக்கட்டை பார்ப்பதற்கு ஆடம்பரமாக இருந்தாலும், அதன் ஊட்டச்சத்து குறித்து கேள்விகளும் எழுந்துள்ளன. உணவில் பயன்படுத்தக்கூடிய தங்க முலாம் பொதுவாக உட்கொள்வதற்கு ஆபத்தானதாக கருதப்படவில்லை என்றாலும், அதிலிருந்து உடலுக்கு குறிப்பிடத்தக்க வைட்டமின்கள் அல்லது ஊட்டச்சத்துகள் கிடைப்பதில்லை என்பதையும் கவனத்தில் கொள்ள வேண்டும்.
விநாயகர் சதுர்த்தியில் கொழுக்கட்டைக்கு இருக்கும் முக்கியத்துவத்தை வித்தியாசமான வடிவில் வெளிப்படுத்தும் இந்த ‘கோல்டன் மோதக்’, தற்போது பண்டிகை கால இனிப்பு வகைகளில் பேசுபொருளாக மாறியுள்ளது.
Also Read: வானிலை எச்சரிக்கை: 20 மாநிலங்களில் புயல் அபாயம்.. கனமழையுடன் 60 கி.மீ. வேகத்தில் காற்று வீச வாய்ப்பு!
