ரூ.1,020 கோடி மதிப்பிலான டெண்டர் முறைகேடு வழக்கில் முக்கியமான திருப்பமாக, வெளிநாடு செல்ல முயன்ற கவி பிரசாத் சென்னை சர்வதேச விமான நிலையத்தில் கைது செய்யப்பட்டுள்ளார். கே.என். நேருவின் சகோதரர் ரவிச்சந்திரனின் உதவியாளரான கவி பிரசாத், இந்த வழக்கில் லஞ்ச ஒழிப்புத்துறை குற்றம்சாட்டியுள்ள 13 பேரில் ஒருவராக உள்ளார்.
நகராட்சி நிர்வாகம் மற்றும் குடிநீர் வழங்கல் துறையில் 2021 முதல் 2025-ம் ஆண்டு வரை நடைபெற்ற அரசு டெண்டர்களில் ரூ.1,020 கோடி அளவுக்கு முறைகேடு மற்றும் லஞ்சப் பரிவர்த்தனைகள் நடந்ததாக எழுந்த புகாரின் அடிப்படையில் லஞ்ச ஒழிப்புத்துறை விசாரணை நடத்தி வருகிறது. இந்த வழக்கில் முன்னாள் அமைச்சர் கே.என். நேரு, அவரது சகோதரர்கள் மணிவண்ணன், ரவிச்சந்திரன், கவி பிரசாத் உள்ளிட்ட 13 பேர் மீது வழக்குப்பதிவு செய்யப்பட்டுள்ளது.
இந்த வழக்கின் விசாரணை தீவிரமடைந்த நிலையில், கவி பிரசாத் வெளிநாடு செல்ல முயன்றார். லண்டன் செல்லும் விமானத்தில் பயணிக்க சென்னை விமான நிலையத்துக்கு வந்த அவருடைய பாஸ்போர்ட் மற்றும் பயண ஆவணங்களை குடியுரிமை அதிகாரிகள் சோதனை செய்தனர். அப்போது அவருக்கு எதிராக லுக் அவுட் நோட்டீஸ் இருப்பது தெரியவந்ததால், அவரது பயணம் தடுத்து நிறுத்தப்பட்டு வழக்கு விசாரணை அதிகாரிகளிடம் அவர் ஒப்படைக்கப்பட்டார்.
இதையடுத்து கவி பிரசாத்தை லஞ்ச ஒழிப்புத்துறை அதிகாரிகள் காவலில் எடுத்து விசாரணை நடத்தினர். டெண்டர் பணிகள் ஒதுக்கப்பட்ட விதம், சம்பந்தப்பட்ட ஒப்பந்ததாரர்களுடனான தொடர்பு, பணப் பரிவர்த்தனைகள் மற்றும் வழக்கில் இடம்பெற்றுள்ள மற்ற நபர்களுடனான தொடர்புகள் குறித்து அவரிடம் விசாரணை மேற்கொள்ளப்பட்டது.
இந்த வழக்கில் ஏற்கெனவே நடைபெற்ற சோதனைகளின்போது ஆவணங்கள் மற்றும் மின்னணு சாதனங்கள் கைப்பற்றப்பட்டுள்ளன. குறிப்பாக, கவி பிரசாத்தின் செல்போனில் இருந்த வாட்ஸ்அப் உரையாடல்கள் மற்றும் புகைப்படங்கள் விசாரணையில் முக்கியத்துவம் பெற்றுள்ளன. டெண்டர் முடிவுகள் இறுதி செய்யப்படுவதற்கு முன்பே குறிப்பிட்ட ஒப்பந்ததாரர்களுக்கு பணிகள் ஒதுக்கப்பட்டதாக விசாரணை ஆவணங்களில் குறிப்பிடப்பட்டுள்ளது.
மேலும், டெண்டர் மதிப்பில் 7.5 சதவீதம் முதல் 10 சதவீதம் வரை ‘கட்சி நிதி’ என்ற பெயரில் பணம் வசூலிக்கப்பட்டதாக லஞ்ச ஒழிப்புத்துறையின் விசாரணை ஆவணங்களில் பதிவு செய்யப்பட்டுள்ளது. அதிகாரிகள், முன்னாள் எம்.எல்.ஏ.க்கள், அரசு பொறியாளர்கள் உள்ளிட்டோருக்கு இடையிலான தொடர்புகள் மற்றும் பணம் தொடர்பான கணக்கீடுகள் குறித்த தகவல்களும் விசாரணையின் ஒரு பகுதியாக இடம்பெற்றுள்ளன.
இதற்கிடையில், விமான நிலையத்தில் கைது செய்யப்பட்ட கவி பிரசாத்திடம் நடத்தப்பட்ட விசாரணை, இந்த வழக்கில் இடம்பெற்றதாகக் கூறப்படும் பணப் பரிவர்த்தனைகள் மற்றும் டெண்டர் ஒதுக்கீடுகள் தொடர்பான கூடுதல் விவரங்களை கண்டறிவதில் முக்கியமானதாக மாறியுள்ளது. வழக்கில் ஏற்கெனவே சேகரிக்கப்பட்ட ஆவணங்கள் மற்றும் டிஜிட்டல் ஆதாரங்களுடன் அவரது வாக்குமூலத்தை ஒப்பிட்டு அதிகாரிகள் விசாரணையை முன்னெடுத்து வருகின்றனர்.
Also Read: தூக்கத்தில் இருந்த பயணிகள்.. திடீரென பற்றி எரிந்த பேருந்து; 9 பேர் உயிரிழப்பு!
