பிஎஸ்எஃப் வீரர்களின் தீவிர கண்காணிப்பால், மேற்கு வங்கத்தில் இந்திய எல்லைக்குள் நுழைய முயன்றதாகக் கூறப்படும் 50-க்கும் மேற்பட்ட வங்கதேசத்தினர் பிடிபட்டுள்ளனர். நள்ளிரவில் லோஹாகஞ்ச் பகுதியில் நடந்த இந்த சம்பவம், எல்லையோரத்தில் பரபரப்பை ஏற்படுத்தியுள்ளது.
தட்சிண் தினாஜ்பூர் மாவட்டத்தில் உள்ள லோஹாகஞ்ச் கிராமம் அருகே இந்த சம்பவம் நடந்துள்ளது. இரவு நேரத்தை பயன்படுத்தி ஒரு பெரிய குழு எல்லைப் பகுதியை நோக்கி வந்ததை பாதுகாப்புப் பணியில் இருந்த பிஎஸ்எஃப் வீரர்கள் கவனித்துள்ளனர். உடனடியாக அந்தப் பகுதியைச் சுற்றிவளைத்த வீரர்கள், குழுவினரின் நகர்வைத் தடுத்து நிறுத்தினர்.
இந்த நடவடிக்கையின்போது உள்ளூர் மக்களும் பாதுகாப்புப் படையினருக்கு உதவியுள்ளனர். கிராம மக்களிடம் இருந்து கிடைத்த தகவல்களின் அடிப்படையிலும் கண்காணிப்பு மேற்கொள்ளப்பட்ட நிலையில், 50-க்கும் மேற்பட்டோர் பிடிபட்டனர்.
பிடிபட்டவர்களிடம் தொடர்ந்து விசாரணை நடைபெற்று வருகிறது. அவர்கள் எந்த நோக்கத்திற்காக எல்லையை கடக்க முயன்றனர் என்பது குறித்தும் அதிகாரிகள் விசாரித்து வருகின்றனர். சம்பவத்தைத் தொடர்ந்து அப்பகுதியில் பாதுகாப்பு ஏற்பாடுகள் மற்றும் கண்காணிப்பு பணிகள் அதிகரிக்கப்பட்டுள்ளன.
Also Read: 3 தேசிய விருதுகள்.. பத்மஸ்ரீ கௌரவம்.. ‘காலா’ பட நடிகர் திடீர் மரணம்!
