பாக்டீரியா தொற்றுகளைக் கட்டுப்படுத்த மருத்துவர்கள் பரிந்துரைக்கும் முக்கிய மருந்துகளாக ஆன்டிபயாட்டிக் மாத்திரைகள் உள்ளன. ஆனால், தொற்றை ஏற்படுத்தும் பாக்டீரியாக்களை அழிப்பதோடு மட்டுமல்லாமல், குடலில் செரிமானத்திற்கு உதவும் நன்மை செய்யும் பாக்டீரியாக்களையும் இந்த மருந்துகள் பாதிக்கக்கூடும். இதனால் குடலில் உள்ள நுண்ணுயிரிகளின் இயல்பான சமநிலை மாறி, சிலருக்குச் செரிமானப் பிரச்சினைகள் ஏற்படலாம்.
ஆன்டிபயாட்டிக் மருந்துகளை எடுத்துக்கொள்ளும் காலத்திலும், சிகிச்சை முடிந்த பிறகும் சிலருக்கு வயிற்றுப்போக்கு, வயிறு உப்புசம், அதிக வாயுத் தொல்லை, வயிற்றுவலி போன்ற அறிகுறிகள் தென்படலாம். இந்தப் பாதிப்புகள் அனைவருக்கும் ஏற்படுவதில்லை என்றாலும், அறிகுறிகள் நீடித்தால் அலட்சியப்படுத்தக் கூடாது.
ஆன்டிபயாட்டிக் மருந்துகளை எடுத்துக்கொள்ளும்போது ஏற்படும் பொதுவான பக்கவிளைவுகளில் வயிற்றுப்போக்கு முக்கியமானது. குடலில் உள்ள பாக்டீரியாக்களின் அமைப்பில் மாற்றம் ஏற்படுவதால், செரிமானச் செயல்பாடும் பாதிக்கப்படலாம். சிலருக்கு லேசான வயிற்றுப்போக்கு ஏற்பட்டு தானாகவே சரியாகலாம். ஆனால், அடிக்கடி நீர்போன்று மலம் வெளியேறுவது அல்லது வயிற்றுப்போக்கு கடுமையாக இருப்பது கவனிக்க வேண்டிய அறிகுறியாகும்.
குறிப்பாக, ஆன்டிபயாட்டிக் பயன்பாட்டுக்குப் பிறகு Clostridioides difficile (C. difficile) என்ற பாக்டீரியாவால் தொற்று ஏற்படும் அபாயமும் உள்ளது. இந்தத் தொற்று பெருங்குடலில் கடுமையான அழற்சியை ஏற்படுத்தக்கூடும். வயிற்றுப்போக்குடன் காய்ச்சல், மலத்தில் ரத்தம் அல்லது கடுமையான வயிற்றுவலி இருந்தால் உடனடியாக மருத்துவரை அணுக வேண்டும்.
குடலில் உள்ள நன்மை செய்யும் பாக்டீரியாக்கள் உணவைச் செரிக்க உதவுவதுடன், குடலின் ஆரோக்கியத்தையும் பாதுகாக்கின்றன. ஆன்டிபயாட்டிக் மருந்துகள் இந்த பாக்டீரியாக்களின் எண்ணிக்கையையும் செயல்பாட்டையும் மாற்றும்போது, குடலில் உணவு சிதைவடையும் விதத்திலும் மாற்றங்கள் ஏற்படலாம். இதன் காரணமாக வயிறு உப்புசம், அதிக வாயு வெளியேறுதல், வயிறு நிறைந்திருப்பது போன்ற உணர்வு உள்ளிட்ட பிரச்சினைகள் தோன்றலாம். இவை சிலருக்குத் தற்காலிகமாக இருந்தாலும், நீண்ட காலம் நீடித்தால் மருத்துவப் பரிசோதனை அவசியம்.
மேலும், வழக்கமான மலம் கழிக்கும் பழக்கத்திலும் மாற்றம் ஏற்படலாம். வயிற்றுப்போக்கு மட்டுமின்றி, சிலருக்கு மலச்சிக்கல் அல்லது மலம் கழிக்கும் நேரத்தில் மாற்றங்கள் தென்படலாம். இதற்கு மருந்தின் வகை, எடுத்துக்கொள்ளும் கால அளவு மற்றும் ஒவ்வொருவரின் குடல் ஆரோக்கியம் உள்ளிட்ட காரணிகள் தாக்கத்தை ஏற்படுத்தும். மருந்து எடுத்துக்கொள்வதை நிறுத்திய பிறகும் இந்த மாற்றங்கள் தொடர்ந்தால், அவற்றை மருந்தின் பக்கவிளைவு மட்டுமே என்று கருதாமல் மருத்துவரின் ஆலோசனையைப் பெற வேண்டும்.
ஆன்டிபயாட்டிக் மருந்துகள் காரணமாக குடலில் ஏற்படும் மாற்றங்கள் வயிற்றுப் பிடிப்பு, வலி மற்றும் அசௌகரியத்தையும் ஏற்படுத்தலாம். லேசான பாதிப்புகள் சில நேரங்களில் மருந்தின் பக்கவிளைவாக இருக்கலாம். ஆனால், வயிற்றுவலி அதிகரிப்பது, காய்ச்சல், தொடர்ந்து வாந்தி அல்லது கடுமையான வயிற்றுப்போக்கு போன்ற அறிகுறிகள் இருந்தால் உடனடியாக மருத்துவ உதவியை நாட வேண்டும்.
சிகிச்சைக்கான மருந்துகளை முழுமையாக எடுத்துக்கொண்ட பிறகும் குடலில் உள்ள நுண்ணுயிரிகளின் சமநிலை உடனடியாகச் சீராகிவிடும் என்று கூற முடியாது. ஒவ்வொருவருக்கும் குடல் நுண்ணுயிரிகள் மீண்டும் இயல்பு நிலைக்குத் திரும்புவதற்கான காலம் மாறுபடும். எனவே, மருந்து எடுத்துக்கொள்வதை நிறுத்திய பிறகும் வயிற்றுப்போக்கு, வயிறு உப்புசம் உள்ளிட்ட பிரச்சினைகள் நீடித்தால், அதற்கான காரணத்தைக் கண்டறிய மருத்துவ ஆலோசனை பெறுவது அவசியம்.
குடல் ஆரோக்கியத்தைப் பாதுகாக்க ஆன்டிபயாட்டிக் மருந்துகளை மருத்துவர் பரிந்துரைத்த அளவிலும் காலத்திலும் எடுத்துக்கொள்ள வேண்டும். வயிற்றுப்போக்கு ஏற்பட்டால் உடலில் நீர்ச்சத்து குறையாமல் போதுமான திரவங்களை அருந்துவது முக்கியம். காய்கறிகள், பழங்கள், முழுத் தானியங்கள் மற்றும் புரதச்சத்து நிறைந்த உணவுகளை உடலுக்கு ஏற்ற வகையில் உணவில் சேர்த்துக்கொள்ளலாம். தயிர் போன்ற புளிக்கவைக்கப்பட்ட உணவுகளை உட்கொள்ள முடிந்தவர்கள் அவற்றையும் உணவில் சேர்க்கலாம். இருப்பினும், இவை மருத்துவச் சிகிச்சைக்கு மாற்றாகாது.
குடலில் நன்மை செய்யும் பாக்டீரியாக்களை ஆதரிக்க புரோபயாட்டிக் மருந்துகள் சிலருக்குப் பயனளிக்கலாம். ஆனால், அவற்றின் பயன் தயாரிப்புக்கு ஏற்பவும், தனிநபரின் உடல்நிலைக்கு ஏற்பவும் மாறுபடும். எனவே, புரோபயாட்டிக் எடுத்துக்கொள்வதற்கு முன்பு மருத்துவர் அல்லது மருந்தாளரிடம் ஆலோசனை பெறுவது நல்லது. மருத்துவரின் ஆலோசனையின்றி ஆன்டிபயாட்டிக் மருந்தின் அளவைக் குறைப்பதோ, சிகிச்சையைப் பாதியில் நிறுத்துவதோ கூடாது.
முக்கியமாக, ஆன்டிபயாட்டிக் மருந்துகள் பாக்டீரியாவால் ஏற்படும் தொற்றுகளுக்காகப் பயன்படுத்தப்படுகின்றன. சாதாரண சளி, காய்ச்சல் உள்ளிட்ட வைரஸ் தொற்றுகளுக்கு இவை பொதுவாகப் பயனளிக்காது. எனவே, தேவையின்றி ஆன்டிபயாட்டிக் மருந்துகளை எடுத்துக்கொள்வதைத் தவிர்க்க வேண்டும்.
மருந்துகளை எடுத்துக்கொண்ட பிறகு கடுமையான அல்லது நீடித்த வயிற்றுப்போக்கு, மலத்தில் ரத்தம், காய்ச்சலுடன் வயிற்றுவலி, உடலில் நீர்ச்சத்து குறைவதற்கான அறிகுறிகள் அல்லது உடல்நிலை மோசமடைதல் ஏற்பட்டால் உடனடியாக மருத்துவ உதவியை நாட வேண்டும்.
ஆன்டிபயாட்டிக் மருந்துகள் பல பாக்டீரியா தொற்றுகளைக் கட்டுப்படுத்துவதில் முக்கியப் பங்கு வகித்தாலும், குடலில் உள்ள நன்மை செய்யும் பாக்டீரியாக்களின் சமநிலையையும் பாதிக்கக்கூடும். இதனால் ஏற்படும் செரிமானப் பிரச்சினைகளை அலட்சியப்படுத்தாமல், மருந்துகளை முறையாகப் பயன்படுத்துவதும், போதுமான நீர்ச்சத்தைப் பராமரிப்பதும், அறிகுறிகள் நீடித்தால் மருத்துவரை அணுகுவதும் குடல் ஆரோக்கியத்தைப் பாதுகாக்க உதவும்.
Also Read: பெட்ரோலுக்கு மாற்றாக எத்தனால்.. வாகன விதிகளில் மத்திய அரசு அதிரடி திருத்தம்!
