பழனி அருள்மிகு தண்டாயுதபாணி சுவாமி திருக்கோவிலில் பக்தர்கள் செல்போன் கொண்டு செல்ல விதிக்கப்பட்ட முழுமையான தடை தொடர்ந்து அமலில் உள்ளதா அல்லது புதிய தளர்வுகள் இங்கும் பொருந்துமா என்பது குறித்து பக்தர்கள் மத்தியில் குழப்பம் ஏற்பட்டுள்ளது.
திருக்கோவிலின் புனிதம், பாதுகாப்பு மற்றும் கருவறை ரகசியங்களை காக்கும் பொருட்டு, கடந்த 2023-ஆம் ஆண்டு அக்டோபர் மாதம் முதல் பழனி மலைக்கோவிலுக்குள் பக்தர்கள் செல்போன் கொண்டு செல்ல கோவில் நிர்வாகம் முற்றிலுமாக தடை விதித்தது. இதனைத் தொடர்ந்து, அடிவாரம், கிரிவீதி, படிப்பாதை, ரோப்கார் மற்றும் மின்இழுவை ரயில் நிலையங்கள் உள்ளிட்ட முக்கிய இடங்களில் கட்டணமில்லா பாதுகாப்பு மையங்கள் அமைக்கப்பட்டு, பக்தர்கள் தங்கள் செல்போன்களை ஒப்படைத்துவிட்டு சாமி தரிசனம் செய்து வந்தனர். பின்னர் கடந்த செப்டம்பர் மாதம் தமிழகம் முழுவதும் பழனி, திருச்செந்தூர் உள்ளிட்ட 52 முக்கிய கோவில்களில் செல்போன் பயன்பாட்டுக்கு கட்டுப்பாடுகள் விரிவுபடுத்தப்பட்டன.
இந்நிலையில், தமிழக இந்து சமய அறநிலையத்துறை சமீபத்தில் முக்கிய தளர்வு அறிவிப்பு ஒன்றை வெளியிட்டது. அதன்படி, கோவில்களுக்குள் செல்போன் கொண்டு செல்லலாம் என்றும், ஆனால் வளாகத்திற்குள் செல்போன்களை ‘சுவிட்ச் ஆப்’ செய்து வைத்திருக்க வேண்டும் எனவும், எக்காரணம் கொண்டும் வீடியோ மற்றும் புகைப்படங்கள் எடுக்கக் கூடாது எனவும் நிபந்தனையுடன் அனுமதி வழங்கப்பட்டது. இந்த அறிவிப்பு பொதுமக்களிடையே பெரும் வரவேற்பை பெற்றது.
ஆனால், பழனி முருகன் கோவிலில் பழைய முழுத்தடையே தொடர்ந்து நீடிப்பதாக கோவில் வளாக ஒலிபெருக்கிகள் வாயிலாக அறிவிக்கப்பட்டு வருகிறது. மேலும், ரோப்கார் மற்றும் மின்இழுவை ரயில் நுழைவு வாயில்களில் பக்தர்கள் கொண்டு வரும் செல்போன்கள் தீவிர சோதனைக்கு பின்னரே பறிமுதல் செய்யப்பட்டு லாக்கர்களில் வைக்கப்படுகின்றன.
மாநில அளவிலான புதிய தளர்வின்படி பழனியில் செல்போன் கொண்டு செல்ல அனுமதியுண்டா அல்லது பழனிக்கு மட்டும் பழைய தடையே நீடிக்கிறதா என தெரியாமல் வெளியூர் பக்தர்கள் திணறி வருகின்றனர். எனவே, வீண் வாக்குவாதங்களை தவிர்க்கவும், பக்தர்களின் குழப்பத்தைப் போக்கவும் பழனி கோவில் நிர்வாகம் இதுகுறித்து உடனடி அதிகாரப்பூர்வ விளக்கத்தை அளிக்க வேண்டும் என்ற கோரிக்கை வலுத்துள்ளது.
Read More : குடும்ப அட்டைதாரர்களுக்கு குட் நியூஸ்! ஞாயிற்றுக்கிழமையும் ரேஷன் கடைகள் இயங்கும்! உணவுத்துறை அறிவிப்பு!
