தெலங்கானாவில் 20 வயது கல்லூரி மாணவியின் மரணம் தொடர்பான விசாரணை அதிர்ச்சிகரமான திருப்பத்தை சந்தித்துள்ளது. ஆரம்பத்தில் தற்கொலை என பதிவு செய்யப்பட்ட இந்த வழக்கில், சிசிடிவி காட்சிகள், செல்போன் தகவல்கள் உள்ளிட்ட ஆதாரங்களை ஆய்வு செய்த போலீசார், இது திட்டமிட்டு நடத்தப்பட்ட கொலை என சந்தேகித்து விசாரணையை தீவிரப்படுத்தினர்.
கோதாவரிகனியில் உள்ள நஸ்பூர் பாலிடெக்னிக் கல்லூரியில் ஒப்பந்த விரிவுரையாளராக பணியாற்றி வந்த நவீன் மீது போலீசாரின் சந்தேகம் திரும்பியது. மாணவி ராணியுடன் அவருக்கு நெருங்கிய தொடர்பு இருந்ததாகவும், ராணி மற்றொரு நபருடன் பழகியதை நவீன் விரும்பவில்லை என்றும் விசாரணையில் தெரியவந்ததாக போலீசார் தெரிவித்துள்ளனர்.
ராணியின் செல்போனை கண்காணிப்பதற்காக ரகசிய செயலியை நவீன் பயன்படுத்தியதாகவும் விசாரணையில் தகவல் கிடைத்துள்ளது. இதன் மூலம் அவர் மாணவியின் தனிப்பட்ட தொடர்புகளை கண்காணித்து வந்ததாக போலீசார் சந்தேகித்தனர்.
இந்த நிலையில், சம்பவத்துக்கு சில நாட்களுக்கு முன்பு நவீன் தனது நண்பரிடம் இருந்து நச்சுப் பொருளை பெற்றதாக போலீசார் கண்டறிந்தனர். பின்னர் ராணியை நகரப் பகுதிக்கு வரவழைத்து காரில் அழைத்துச் சென்றதாகவும், அங்கு அவரை வலுக்கட்டாயமாக நச்சுப் பொருளை குடிக்கச் செய்ததாகவும் விசாரணையில் தெரியவந்துள்ளது.
மேலும், வழக்கின் போக்கை திசைதிருப்பும் நோக்கில் மற்றொரு நபர் மீது சந்தேகம் ஏற்படும் வகையில் ராணியிடம் தற்கொலைக் கடிதம் எழுத வைத்ததாகவும் போலீசார் தெரிவித்துள்ளனர். அதன் பின்னர் நவீன் அங்கிருந்து சென்றதாக விசாரணை முடிவுகள் சுட்டிக்காட்டுகின்றன.
ஆரம்பத்தில் தற்கொலை வழக்காக விசாரிக்கப்பட்ட இந்தச் சம்பவத்தில், சிசிடிவி காட்சிகள் முக்கிய திருப்பத்தை ஏற்படுத்தின. ராணி காரில் ஏறிய காட்சிகள், அவரது செல்போன் சிக்னல், அழைப்புப் பதிவுகள் உள்ளிட்ட தகவல்களை போலீசார் ஒப்பிட்டு ஆய்வு செய்தனர். இந்த ஆதாரங்கள் கிடைத்த பிறகு நவீனின் நடவடிக்கைகள் குறித்து போலீசாருக்கு சந்தேகம் வலுத்தது.
இதையடுத்து நவீனை போலீசார் கைது செய்து விசாரணை நடத்தி வருகின்றனர். மாணவியின் மரணத்துக்கான முழுமையான பின்னணி, சம்பவத்தில் வேறு யாருக்காவது தொடர்பு உள்ளதா என்பது உள்ளிட்ட கோணங்களிலும் விசாரணை தொடர்ந்து வருகிறது.
Also Read: 14 நாட்களாக தொடரும் சிகிச்சை.. கொளத்தூர் தவெக எம்எல்ஏ வி.எஸ். பாபு உடல்நிலை குறித்து பரவும் தகவல்களால் குழப்பம்..
