வீட்டில் தினமும் சமையலுக்குப் பயன்படுத்தும் பிரஷர் குக்கரை சுத்தமாக கழுவினாலும், அதன் மூடியில் இருக்கும் ரப்பர் கேஸ்கட்டை (Gasket) பலர் கவனிக்காமல் விட்டுவிடுவதாக ஆரோக்கிய வல்லுநர்கள் சுட்டிக்காட்டுகின்றனர். இந்த சிறிய ரப்பர் வளையத்தை சரியாக பராமரிக்கத் தவறினால், அதுவே பல்வேறு உடல்நல கோளாறுகளுக்கு வழிவகுக்கும் என்றும் எச்சரிக்கின்றனர்.
பொதுவாக குக்கரை பயன்படுத்திய பிறகு, இந்த ரப்பர் வளையத்தின் அடியில் எண்ணெய் பிசுக்கு, சிறிய அளவிலான உணவுத் துகள்கள் மற்றும் ஈரப்பதம் ஆகியவை மிக எளிதாக தங்கிவிடுகின்றன. இதனை தினமும் தனியாக கழற்றிச் சுத்தம் செய்யாத பட்சத்தில், அங்கு பாக்டீரியாக்கள் மற்றும் பூஞ்சை காளான்கள் வேகமாகப் பெருகத் தொடங்கி துர்நாற்றத்தை உருவாக்குகின்றன.
சமையலின் போது உருவாகும் அதிகப்படியான வெப்பத்தில் சில கிருமிகள் அழிந்துவிட்டாலும், கேஸ்கட்டில் படிந்துள்ள அசுத்தங்கள் உணவில் கலக்கும் போது வாந்தி, வயிற்றுப்போக்கு போன்ற உணவு நச்சுத்தன்மை (Food Poisoning) ஏற்படும் அபாயம் அதிகரிக்கிறது.
இத்தகைய பாதிப்புகளை தவிர்க்க, ஒவ்வொரு முறை சமைத்த பிறகும் ரப்பர் கேஸ்கட்டை தனியாக கழற்றி, சோப்பு போட்டுக் கழுவி, நன்றாக காயவைத்த பின்னரே மீண்டும் குக்கர் மூடியில் பொருத்த வேண்டும். மேலும், குக்கரைப் பயன்படுத்தாத நேரங்களில் மூடியை இறுக்கமாகப் பூட்டாமல் லேசாக திறந்து வைப்பது உள்ளே ஈரப்பதம் தங்குவதை தடுக்கும். ஒருவேளை கேஸ்கட்டில் சிறிய வெடிப்புகள் தென்பட்டாலோ அல்லது துர்நாற்றம் வீசினாலோ அதனை உடனடியாக மாற்றிப் புதியதைப் பயன்படுத்துவதே ஆரோக்கியத்திற்கு பாதுகாப்பானது என நிபுணர்கள் அறிவுறுத்துகின்றனர்.
Read More : தமிழ்த்தாய் வாழ்த்து கட்டாயம் முதலில் பாட வேண்டும்..!! தமிழ்நாடு அரசு அரசாணை வெளியீடு..!!
