ரீல்ஸ் மோகத்தால் பிரியும் குடும்பங்கள்… ஒரே வீட்டில் இருந்தும் பேசிக்கொள்ளாத அவலம்!

ஒரே அறையில் குடும்பத்தினர் அனைவரும் ஒன்றாக அமர்ந்திருக்கிறார்கள். ஆனால், ஒருவர் கூட மற்றவர்களுடன் பேசுவதில்லை. ஒவ்வொருவரும் தங்களது செல்போனில் ரீல்ஸ் மற்றும் ஷார்ட் வீடியோக்களை பார்த்துக்கொண்டிருக்கிறார்கள். வீட்டில் இருப்பவர்களை அருகில் இருப்பவர்களாகக்கூட கவனிக்காத இந்தக் காட்சி, தற்போது பல குடும்பங்களில் சாதாரணமாக மாறி வருகிறது.

குறுகிய நேரத்தில் பொழுதுபோக்கை வழங்கும் ரீல்ஸ் மற்றும் ஷார்ட் வீடியோக்கள், நேரத்தை கடத்துவதற்கான எளிய வழியாகத் தோன்றலாம். ஆனால், ஒரு வீடியோ முடிந்தவுடன் அடுத்த வீடியோவை தொடர்ந்து பார்க்கும் பழக்கம், நாளடைவில் கட்டுப்படுத்த முடியாத அளவுக்கு அதிகரிக்கலாம். இதன் பாதிப்பு வெறும் ஸ்க்ரீன் டைமுடன் முடிவதில்லை; குடும்பத்தினருடனான உரையாடல், உணர்வுப்பூர்வமான நெருக்கம் மற்றும் தம்பதியரின் உறவிலும் தாக்கத்தை ஏற்படுத்தக்கூடும்.

ரீல்ஸ் ஏன் தொடர்ந்து பார்க்கத் தூண்டுகிறது?

ஒவ்வொரு முறையும் ஸ்க்ரோல் செய்யும்போது புதிதாகவும் எதிர்பாராத வகையிலும் ஒரு வீடியோ கிடைப்பது ரீல்ஸின் முக்கிய ஈர்ப்புகளில் ஒன்று. அடுத்த வீடியோ நகைச்சுவையாக இருக்குமா, சுவாரஸ்யமாக இருக்குமா அல்லது ஆச்சரியப்படுத்துமா என்பது தெரியாததால், அதைத் தெரிந்துகொள்ளும் ஆர்வத்தில் தொடர்ந்து ஸ்க்ரோல் செய்யும் நிலை ஏற்படுகிறது.

இது ‘Variable Reward’ எனப்படும் வெகுமதி முறையுடன் தொடர்புடையதாகக் கூறப்படுகிறது. சில நிமிடங்களுக்கு தொடங்கும் இந்தப் பழக்கம், எப்போது ஒரு மணி நேரமாக மாறுகிறது என்பதே தெரியாமல் போகலாம்.

வேகமான வீடியோக்கள் கவனிக்கும் முறையை மாற்றுமா?

ரீல்ஸ் போன்ற குறுகிய வீடியோக்கள் சில நொடிகளிலேயே புதிய தகவல்களை வழங்கும் வகையில் உருவாக்கப்படுகின்றன. இதுபோன்ற வேகமான உள்ளடக்கத்தை தொடர்ந்து பார்ப்பது, மெதுவான செயல்பாடுகள் மற்றும் நீண்ட உரையாடல்களில் ஆர்வம் குறைய வழிவகுக்கலாம் என நிபுணர்கள் தெரிவிக்கின்றனர்.

மேக்ஸ் மருத்துவமனையின் முதன்மை ஆலோசனை மனநல மருத்துவர் டாக்டர் பங்கஜ் குமார் கூறுகையில், பல்வேறு வயதினரிடையே ஷார்ட் வீடியோ பயன்பாடு அதிகரித்துள்ள நிலையில், அதை அளவுக்கு அதிகமாகப் பயன்படுத்துவது உறவுகளையும் பாதிக்கக்கூடும் என தெரிவித்துள்ளார்.

தொடர்ந்து புதுப்புது தகவல்கள் மற்றும் உடனடி தூண்டுதல்களுக்கு பழகிவிட்டால், குடும்ப உறுப்பினருடன் சாதாரணமாகப் பேசுவது கூட சுவாரஸ்யம் குறைந்ததாகத் தோன்றலாம். இதனால் அர்த்தமுள்ள உரையாடல்களில் ஈடுபடும் ஆர்வம் படிப்படியாக குறைய வாய்ப்புள்ளது.

‘Phubbing’ என்றால் என்ன?

செல்போன் பயன்பாடு உறவுகளை பாதிக்கும் முக்கியமான வழிகளில் ஒன்று ‘Phubbing’. அதாவது, நம்முடன் நேரில் இருக்கும் ஒருவரை கவனிக்காமல், செல்போனில் கவனம் செலுத்துவது.

உதாரணமாக, வேலை முடிந்து கணவன், மனைவி இருவரும் ஒன்றாக அமர்ந்திருந்தாலும், தங்களது நாள் எப்படி சென்றது என்று பேசுவதற்குப் பதிலாக செல்போனில் ரீல்ஸ் பார்க்கலாம். அதேபோல், குடும்பத்தினர் அனைவரும் சாப்பிட ஒன்றாக அமர்ந்திருந்தாலும், ஒவ்வொருவரும் தங்களது செல்போனில் மூழ்கியிருக்கலாம்.

உடல் ரீதியாக அனைவரும் அருகில் இருந்தாலும், அவர்களின் கவனம் வேறு இடத்தில் இருக்கும் நிலை உருவாகிறது.

குடும்பத்தில் உணர்வு ரீதியான இடைவெளி அதிகரிக்கலாம்

எந்தவொரு உறவாக இருந்தாலும் தொடர்ந்து உரையாடுவதும், ஒருவருக்கொருவர் நேரம் ஒதுக்குவதும் அவசியம். ஆனால், உரையாடலைவிட செல்போன் பயன்பாடு தொடர்ந்து முன்னுரிமை பெறும்போது, குடும்பத்தினருடன் இயல்பாக நடைபெறும் சிறிய உரையாடல்கள் குறையத் தொடங்கலாம்.

ஒருவரின் நாள் எப்படி சென்றது என்று கேட்பது, பிரச்னைகளைப் பகிர்ந்து கொள்வது, ஒன்றாக சிரிப்பது அல்லது அமைதியாக சிறிது நேரம் ஒன்றாக அமர்ந்திருப்பது போன்ற தருணங்கள் குறையும்போது, நாளடைவில் உணர்வு ரீதியான இடைவெளி உருவாகலாம்.

இதனால், செல்போன் பயன்படுத்துபவர் தன்னைப் புறக்கணிக்க வேண்டும் என்ற நோக்கமின்றி இருந்தாலும், அருகில் இருப்பவர்கள் தாங்கள் முக்கியமற்றவர்கள் அல்லது கவனிக்கப்படவில்லை என்ற உணர்வைப் பெறக்கூடும்.

அதிக நேரம் ஸ்க்ரோல் செய்வது தனிமையை அதிகரிக்குமா?

ஒவ்வொருவரின் விருப்பத்திற்கேற்ப சமூக வலைதளங்களில் உள்ளடக்கங்கள் தொடர்ந்து பரிந்துரைக்கப்படுகின்றன. இதனால் ஒருவர் தனக்கு பிடித்த அல்லது ஏற்கெனவே ஆர்வம் கொண்ட விஷயங்களையே தொடர்ந்து பார்ப்பதற்கு வாய்ப்பு அதிகரிக்கிறது.

நிஜ வாழ்க்கை உரையாடல்களைவிட ஷார்ட் வீடியோக்கள் அதிக சுவாரஸ்யமாகத் தோன்றத் தொடங்கினால், ஒருவர் படிப்படியாக சமூக தொடர்புகளில் இருந்து விலகக்கூடும். இது தனிமை மற்றும் பிறரிடம் இருந்து துண்டிக்கப்பட்ட உணர்வுக்கு வழிவகுக்கலாம்.

சாப்பிடும்போது, ஓய்வெடுக்கும்போது, குடும்பத்தினருடன் பேசும்போது அல்லது தூங்கச் செல்வதற்கு முன்புகூட செல்போன் இல்லாமல் இருக்க முடியவில்லை என்றால், அது கவனிக்க வேண்டிய அறிகுறியாக இருக்கலாம்.

ரீல்ஸ் பார்க்கும் பழக்கத்தை குறைப்பது எப்படி?

செல்போனை முழுமையாக பயன்படுத்துவதை நிறுத்த வேண்டிய அவசியமில்லை. அதற்குப் பதிலாக, பயன்படுத்தும் நேரத்திற்கு சில கட்டுப்பாடுகளை உருவாக்குவது முக்கியம்.

1. குறிப்பிட்ட நேரத்தை ‘Phone-Free’ நேரமாக மாற்றுங்கள்

வீட்டில் சில நேரங்களில் செல்போன் பயன்படுத்தாமல் இருப்பதை வழக்கமாக்கலாம். குறிப்பாக உணவு சாப்பிடும் நேரத்தில் செல்போனை ஒதுக்கி வைத்து, குடும்பத்தினருடன் பேசுவதற்கு முக்கியத்துவம் கொடுக்கலாம்.

2. தூங்குவதற்கு முன்பு ஸ்க்ரோல் செய்வதை தவிர்க்கவும்

படுக்கைக்கு அருகில் செல்போனை வைத்திருப்பதைத் தவிர்த்து, தூங்குவதற்கு முன்பு நீண்ட நேரம் ஸ்க்ரீன் பார்ப்பதை குறைக்கலாம்.

3. குடும்பத்துடன் நேரம் செலவிடுங்கள்

தினமும் குறைந்தது 30 நிமிடங்களாவது செல்போன் இல்லாமல் குடும்பத்தினருடன் பேசுவது, நடைப்பயிற்சி செல்வது, தேநீர் அருந்துவது, விளையாடுவது அல்லது ஒன்றாக அமர்ந்திருப்பது போன்ற செயல்களில் ஈடுபடலாம்.

4. ஷார்ட் வீடியோ ஆப்களுக்கு நேர வரம்பு வையுங்கள்

செல்போனில் இருக்கும் Screen Time வசதியைப் பயன்படுத்தி சமூக வலைதளங்கள் மற்றும் ஷார்ட் வீடியோ ஆப்களுக்கு தினசரி நேர வரம்பை நிர்ணயிக்கலாம். தேவையற்ற அறிவிப்புகளை முடக்குவதும் அடிக்கடி செல்போனை எடுத்து பார்க்கும் எண்ணத்தை குறைக்க உதவும்.

முக்கியமானது இணைப்பு… முழுமையான விலகல் அல்ல!

ரீல்ஸ் அல்லது ஷார்ட் வீடியோக்கள் அனைத்துமே தீங்கு விளைவிப்பவை என்று கூற முடியாது. ஆனால், அவற்றை தொடர்ந்து பார்ப்பது தூக்கம், வேலை, உடல் செயல்பாடு, குடும்ப உரையாடல் அல்லது உறவுகளை பாதிக்கும் அளவுக்கு சென்றால் அது பிரச்னையாக மாறுகிறது.

செல்போன் உலகம் முழுவதும் உள்ள கோடிக்கணக்கான மக்களுடன் நம்மை இணைக்கிறது. ஆனால், அதை அளவுக்கு அதிகமாகப் பயன்படுத்தும்போது, நம் அருகில் அமர்ந்திருக்கும் குடும்பத்தினரையே கவனிக்காமல் போகும் நிலை ஏற்படலாம். எனவே, குடும்பத்துடன் இருக்கும் நேரத்தில் செல்போனை சிறிது நேரம் ஒதுக்கி வைத்து, நேரடி உரையாடலுக்கும் உறவுகளுக்கும் முக்கியத்துவம் கொடுப்பது அவசியம்.

Also Read: லிவ்-இன் உறவில் திடீர் தகராறு… டிராலி பேக்கில் பெண்ணின் சடலம்!