பாகிஸ்தானில் பிஸ்கட் விற்று குடும்பத்தின் பசியைப் போக்கப் போராடிய சிறுவனுக்கு, பெண் ஒருவர் அளித்த எதிர்பாராத உதவி இணையத்தில் நெகிழ்ச்சியை ஏற்படுத்தியுள்ளது.
தெருவோரத்தில் பிஸ்கட் விற்பனை செய்துகொண்டிருந்த சிறுவன், காரில் சென்ற கன்வல் யூனிசாவிடம் பிஸ்கட் வாங்குமாறு கேட்டுள்ளான். அப்போது அவனிடம் பேசிய கன்வலுக்கு, அவனது குடும்பச் சூழல் தெரியவந்தது. தந்தையை இழந்த நிலையில், தாய்க்கு உதவவும் குடும்பத்தின் உணவுத் தேவையைப் பூர்த்தி செய்யவும் சிறுவன் பிஸ்கட் விற்று வருவது அவரை நெகிழச் செய்தது.
சிறுவனின் கதையைக் கேட்டதும், அவனுக்குத் தேவையான உதவியைச் செய்ய கன்வல் முடிவு செய்தார். உடனடியாக அவனை அருகிலிருந்த பெரிய கடைக்கு அழைத்துச் சென்ற அவர், குடும்பத்திற்குத் தேவையான பொருட்களைத் தாராளமாகத் தேர்ந்தெடுத்துக் கொள்ளுமாறு கூறினார்.
இதுவரை பிஸ்கட் விற்றுக் கிடைக்கும் சிறிய வருமானத்தில் குடும்பத்தைச் சமாளித்து வந்த சிறுவனுக்கு, அன்றைய நாள் மறக்க முடியாத அனுபவமாக மாறியது. அரிசி, மளிகைப் பொருட்கள் உள்ளிட்ட அத்தியாவசியப் பொருட்களை மகிழ்ச்சியுடன் தேர்ந்தெடுத்த அவன், தனது குடும்பத்திற்குத் தேவையானவற்றை வாங்கிக்கொண்டான்.
இந்தச் சம்பவத்தை வீடியோவாகப் பதிவு செய்த கன்வல், சமூக வலைதளத்தில் பகிர்ந்ததுடன், அடிப்படைத் தேவைகள்கூட கிடைக்காத சூழலில் சாதாரணப் பொருட்கள்கூட ஆடம்பரமாகத் தோன்றும் என்ற கருத்தையும் பதிவிட்டார்.
இந்த வீடியோ 14 மில்லியனுக்கும் அதிகமான பார்வைகளைப் பெற்று வைரலாகியுள்ளது. குடும்பத்திற்காக உழைக்கும் சிறுவனின் நிலையைப் பார்த்து பலரும் வருத்தம் தெரிவித்துள்ளதுடன், அவனது தேவையை உணர்ந்து உதவிய கன்வலின் செயலையும் பாராட்டி வருகின்றனர்.
ஒரு சிறிய உதவி, ஒருவரின் அன்றைய நாளை மட்டுமல்லாமல், அவரது குடும்பத்தின் கவலையையும் ஓரளவு குறைக்க முடியும் என்பதை இந்தச் சம்பவம் உணர்த்தியுள்ளது.
Also Read: ரகசிய வணிக தரவுகளை திருடும் AI முகவர்கள்!. இந்திய நிறுவனங்களுக்கு மத்திய அரசு அதிரடி எச்சரிக்கை!
