ஈரானுக்கும் அமெரிக்காவுக்கும் இடையே அமைதி தொடர்பான புரிதல் ஒப்பந்தம் எட்டப்பட்டுள்ளது.. இதனை ஈரானின் சட்ட மற்றும் சர்வதேச விவகாரங்களுக்கான வெளியுறவுத்துறை துணை அமைச்சர் காசெம் கரிபாபாதி உறுதிப்படுத்தியுள்ளார். இரு நாடுகளுக்கும் இடையே சமீபகாலமாக நிலவி வந்த மோதல்களை முடிவுக்குக் கொண்டுவருவதில் இது ஒரு முக்கிய மைல்கல்லாக அமைந்துள்ளது.
ஈரானுடனான அமைதி ஒப்பந்தம் நிறைவடைந்துவிட்டதாகவும், ஹார்முஸ் நீரிணையில் அமெரிக்கக் கடற்படை விதித்திருந்த முற்றுகை விலக்கிக்கொள்ளப்படும் என்றும் அமெரிக்க அதிபர் டொனால்ட் டிரம்ப் அறிவித்ததைத் தொடர்ந்து இந்தத் தகவல் வெளியானது. இருப்பினும், இறுதி ஒப்பந்தம் தொடர்பான அடுத்தகட்டப் பேச்சுவார்த்தைகள், ஆரம்பக்கட்டப் புரிதலில் குறிப்பிடப்பட்டுள்ள பல்வேறு வாக்குறுதிகளை வாஷிங்டன் நிறைவேற்றுவதைப் பொறுத்தே அமையும் என்று ஈரான் கூறியுள்ளது.
ஈரானின் அரசு சார்ந்த ‘பிரஸ் டிவி’ (Press TV) ஊடகத்தின் தகவலின்படி, இந்த ஒப்பந்தத்திற்கான அதிகாரப்பூர்வ கையெழுத்திடும் விழா வெள்ளிக்கிழமை நடைபெறவுள்ளது. கையெழுத்திடப்பட்ட பிறகு, புரிந்துணர்வு ஒப்பந்தத்தின் (MoU) விவரங்கள் பொதுமக்களுக்கு வெளியிடப்படும் என்று ஈரானிய அதிகாரிகள் தெரிவித்தனர்.
ராஜதந்திர மற்றும் ராணுவ ரீதியான வெற்றியை ஈரான் உரிமை கோருகிறது
இந்த ஒப்பந்தம் குறித்துப் பேசிய கரிபாபாதி, ஈரான் தனது முக்கிய நிலைப்பாடுகளை ஒப்பந்த வரைவு ஆவணத்தில் வெற்றிகரமாகச் சேர்த்துள்ளதாகக் கூறினார். மேலும், இந்த முடிவானது ராஜதந்திரம் மற்றும் ராணுவ எதிர்ப்பு ஆகிய இரண்டின் கூட்டு விளைவு என்றும் அவர் விவரித்தார்.
“தங்கள் தீய நோக்கங்களை நிறைவேற்றத் தாக்குதலைத் தொடங்கிய எதிரிகள், தங்கள் அனைத்து இலக்குகளிலும் தோல்வியைச் சந்தித்தனர். அதேவேளையில், இஸ்லாமியக் குடியரசான ஈரான் போரில் பெரும் வெற்றிகளை ஈட்டியது. இந்தப் புரிந்துணர்வு ஒப்பந்தம் வெறும் ராஜதந்திரத்தின் விளைவு மட்டுமல்ல, இது ஈரானின் ராணுவ சாதனைகளுக்கும் கடமைப்பட்டுள்ளது. ஆட்சியின் எதிரிகளை எதிர்கொண்டபோது நாங்கள் இழந்த தியாகிகளின் புனிதமான இரத்தத்திற்கும் இது கடமைப்பட்டுள்ளது,” என்று கரிபாபாதி கூறினார்.
அதிகாரப்பூர்வ கையெழுத்திடும் நிகழ்வுக்குப் பிறகு, புரிந்துணர்வு ஒப்பந்தத்தின் விவரங்கள் வெளியிடப்படும். “வெள்ளிக்கிழமையன்று அதிகாரப்பூர்வமாக ஒப்பந்தம் கையெழுத்தாகும்; அத்துடன், பேச்சுவார்த்தைகளுக்கான எதிர்கால ஏற்பாடுகளைத் தீர்மானிக்க இரு தூதுக்குழுக்களின் தலைவர்களும் ஆலோசனை நடத்துவார்கள்,” என்று அவர் மேலும் கூறினார்.
இறுதி ஒப்பந்தத்திற்காக ஈரான் முன்வைத்துள்ள கோரிக்கைகள்
ஒரு முழுமையான ஒப்பந்தத்தை எட்டுவதற்கான 60 நாள் பேச்சுவார்த்தைக் காலத்தில் உடனடியாக ஈடுபடப்போவதில்லை என்பதை ஈரான் தெளிவுபடுத்தியுள்ளது. விரோதப் போக்குகளை முடிவுக்குக் கொண்டுவருதல், பொருளாதாரத் தடையை நீக்குதல் மற்றும் ஈரானின் முடக்கப்பட்ட சொத்துக்களை விடுவித்தல் ஆகிய விவகாரங்களில் அமெரிக்கா தனது வாக்குறுதிகளை நிறைவேற்றியுள்ளதா என்பதை ஈரான் முதலில் மதிப்பீடு செய்யும்.
“அமெரிக்கா இந்த வாக்குறுதிகளை நிறைவேற்றுவதைப் பொறுத்தே 60 நாள் பேச்சுவார்த்தையில் ஈடுபடுவது அமையும்,” என்று கரிபாபாடி கூறினார்.
அமெரிக்காவின் நோக்கங்கள் மீது நம்பிக்கை வைப்பதற்கான ஒரு அறிகுறியாக இந்த ஒப்பந்த ஆவணத்தைக் கருதக்கூடாது என்றும் அவர் வலியுறுத்தினார். “இந்த புரிந்துணர்வு ஒப்பந்தம் என்பது எதிரியை நம்புவதைக் குறிக்காது..அமெரிக்கா தனது வாக்குறுதிகளைச் செயல்படுத்துவதை நாங்கள் தொடர்ந்து கண்காணிப்போம்.” என்று அவர் கூறினார்..
