இந்து சமய வழிபாட்டில் பெருமாளின் திருவருளைப் பெறுவதற்குரிய உன்னதமான மாதமாக புரட்டாசி மாதம் போற்றப்படுகிறது. இம்மாதத்தின் அனைத்து நாட்களும் சிறப்புமிக்கவை என்றாலும், இதில் வரும் சனிக்கிழமைகளில் விரதமிருந்து வழிபடுவது மகத்தான பலன்களைத் தரும். பெருமாளின் அருளைப் பெறுவதோடு மட்டுமல்லாமல், சனி பகவானின் கெடுபலன்கள் மற்றும் ஏழரைச் சனி தோஷங்களில் இருந்து விடுபட்டு அவரின் அருளாசியைப் பெறவும் புரட்டாசி சனிக்கிழமை வழிபாடே மிக சிறந்த நாளாகும்.
புரட்டாசி சனிக்கிழமைகளில் விரதமிருந்து தளிகை படைத்து வழிபட்டால் சனி தோஷங்கள் விலகி, குடும்பத்தில் செல்வச் செழிப்பும் அமைதியும் நிலைக்கும் என்பது ஐதீகம். மேலும், புரட்டாசி சனிக்கிழமையில் பெருமாளை முறைப்படி வணங்கும்போது மகாலட்சுமி தாயாரின் பூரண ஆசியும் ஒருங்கே கிட்டும். இதுவரை புரட்டாசி சனிக்கிழமை வழிபாட்டை செய்ய தவறியவர்கள் கூட, புரட்டாசி கடைசி சனிக்கிழமையன்று முழு மனதுடன் மாவிளக்கு ஏற்றி வழிபட்டால் மாதம் முழுவதும் வழிபட்டதற்கான முழு பலன்களையும் பெற முடியும்.
புரட்டாசி கடைசி சனிக்கிழமையன்று பச்சரிசி மாவு, வெல்லம் மற்றும் ஏலக்காய் கலந்து மாவிளக்கு செய்து, நெய் தீபம் ஏற்றி பெருமாள் படத்தின் முன் வைத்து வழிபட வேண்டும். விரளி மஞ்சள் மற்றும் குண்டு மஞ்சள் இரண்டையும் வாங்கி பெருமாளின் திருவடிகளில் வைத்து வணங்குவதுடன், மஞ்சள் வஸ்திரம் சாற்றி வழிபடுவதால் வீட்டில் சுப காரியத் தடைகள் நீங்கி அதிர்ஷ்டம் பெருகும். மேலும், துளசி மாலை சாற்றி அர்ச்சனை செய்து வழிபடுவது பெருமாளுக்கு மிகுந்த மகிழ்ச்சியைத் தரும்.
அன்றைய தினம் காலை முதல் மாலை வரை சாதம் தவிர்க்கப்பட்டு பால், பழங்கள் மட்டும் அருந்தி விரதம் அனுஷ்டிக்கலாம். மஞ்சள் நிற ஆடை உடுத்தி, “ஓம் நமோ நாராயணாய” என்ற திருமந்திரத்தை 108 முறை ஜபித்து, விஷ்ணு சகஸ்ரநாமம் பாராயணம் செய்வது வாழ்வில் ஸ்திரத்தன்மையை உண்டாக்கும். இல்லத்தில் வழிபாட்டை நிறைவு செய்த பிறகு, அருகிலுள்ள பெருமாள் கோவில் மற்றும் சனீஸ்வரர் சந்நிதிக்கு சென்று நல்லெண்ணெய் தீபம் ஏற்றி வழிபட்டால் கடன் தொல்லைகள், குடும்ப சச்சரவுகள் மற்றும் காரியத் தடைகள் நீங்கி வாழ்வில் அனைத்து வளங்களும் கைகூடும்.
Read More : குடும்ப அட்டைதாரர்களுக்கு குட் நியூஸ்! ஞாயிற்றுக்கிழமையும் ரேஷன் கடைகள் இயங்கும்! உணவுத்துறை அறிவிப்பு!
